މިއަހަރުގެ ބަޖެޓަށްވުރެ ހަ ބިލިއަން ރުފިޔާ ބޮޑު ބަޖެޓެއް އަންނަ އަހަރަށް ހުށަހަޅައިފި

މިއަހަރުގެ ބަޖެޓަށްވުރެ 6.3 ބިލިއަން ރުފިޔާ ބޮޑު ބަޖެޓެއް އަންނަ އަހަރަށް ހުށަހަޅައިފިއެވެ.

ފިނޭސް މިނިސްޓަރ އަބްދުﷲ ޖިހާދު މިއަދު މަޖިލީހަށް ހުށަހެޅުއްވި 2015 ވަނަ އަހަރުގެ ލަފާކުރާ ބަޖެޓުގެ ޖުމްލަ އަދަދަކީ 24.3 ބިލިއަން ރުފިޔާ އެވެ. 

ފިނޭންސް މިނިސްޓަރ ވިދާޅުވީ ބަޖެޓުގައި ޕަބްލިސް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ޕްރޮޖެކްޓްތަކަށް 6 ބިލިއަން ރުފިޔާ ހިމަނާފައިވާކަމަށެވެ. އޭގެތެރޭގައި ހިމެނޭ ބައެއް ބޮޑެތި މަޝްރޫތަކުގެ ތެރޭގައި އައިޖީއެމް ހޮސްޕިޓަލް މަރާމާތު ކުރުމާ، މާލެ ހުޅުމާލޭ ބްރިޖް ޕްރޮޖެކްޓާ، ހުޅުލޭ އެއާޕޯޓު ތަރައްގީކުރުން ހިމެނޭކަމަށް އޭނާ ވިދާޅުވިއެވެ. 

ބަޖެޓުގައި ކެޕިޓަލް ހަރަދުގެ ގޮތުގައި 8.5 ބިލިއަން ރުފިޔާ ކަނޑައަޅާފައިވެއެވެ. އަދި ރިކަރަންޓު ހަރަދުގެ ގޮތުގައި 15.8 ބިލިއަން ރުފިޔާ ކަނޑައަޅާފައިވެއެވެ. 

މި ހިނގާ 2014 ވަނަ އަހަރުގެ ދަރުލަތުގެ ބަޖެޓުގެ ޖުމްލަ އަދަދަކީ 17.95 ބިލިއަން ރުފިޔާއެވެ. މިއަހަރުގެ ބަޖެޓު ޑެފެސިޓު މިއަހަރުގެ ބަޖެޓު ޑެފެސިޓް 4.5 ބިލިއަން ރުފިޔާއަށް އަރާނެކަމަށް ފިނޭސް މިނިސްޓަރ ވަނީ އަންދާޒާ ކުރައްވައިފައެވެ.