މާލެ ފެހިކުރުމުގެ މަސައްކަތް ކުރަންޖެހޭނީ ހައުސިން މިނިސްޓްރީން އަންގާ ގޮތަކަށް-ހޯމްމިނިސްޓަރ

މާލެ ފެހިކުރުމުގެ ކަންކަން ހައުސިން މިނިސްޓްރީން އަންގަވާ ގޮތެއްގެ މަތިންނޫން ގޮތަކަށް ނުކުރުމަށް މާލޭ ސިޓީކައުންސިލަށް އަންގަވާފައިވާނެ ކަމަށް މިނިސްޓަރ އޮފް ހޯމްއެފެއާޒް ޢުމަރު ނަސީރު ވިދާޅުވެއްޖެއެވެ.

"ދުވަސް" އިން ދެންނެވި ސުވާލަކާ ގުޅިގެން ޢުމަރު ފޮނުއްވި އެސްއެމްއެސްގައި ވިދާޅުވެފައިވަނީ "މާލެ ފެހިކުރުމުގެ ކަންތައް މިނިސްޓްރީއޮފް ހައުސިންއިން އަންގަވާ ގޮތެއްގެ މަތިން މެނުވީ ނުކުރުމަށް (މާލެ ސިޓީކައުންސިލަށް) އެންގިފައިވާނެ،" ކަމަށެވެ.

މައުލޫމާތު ލިބިފައިވާ ގޮތުގައި ހޯމްމިނިސްޓަރ ޢުމަރު ނަސީރު މާލޭސިޓީކައުންސިލަށް އަންގަވާފައިވަނީ ފެންފޯއްރުއްތައް އަލުން ނުއިންދުމަށާއި، އިންދައިފިނަމަ ކަނޑާލާނެ ކަމަށެވެ. ނަމަވެސް މިނިސްޓަރ ޢުމަރު އެކަން ދޮގު ކުރެއްވިއެވެ.

މާލޭ ސިޓީކައުންސިލްގެ ޑެޕިޔުޓީ މޭޔަރ ޝިފާ މުޙައްމަދު ވިދާޅުވީ ހޯމްމިނިސްޓަރ ޢުމަރު ނަސީރުގެ ނަމުގައި އެސްއެމްސްއެސްއެއް ކައުންސިލަށް ލިބިވަޑައިގެންނެވި ކަމަށެވެ. އެއިން ދޭހަވީ ފެންފޯއް ރުއްތައް އަލުން އިންދައިފިނަމަ ފުލުހުން ފޮނުވައި ކަނޑާލާނެ ވާހަކަ ކަމަށްވެސް ޝިފާ ވިދާޅުވިއެވެ. ނަމަވެސް މިދުވަސްވަރަކީ އެކި މީހުންގެ ނަމުގައި ތަފާތު އެސްއެމްއެސްތައް ލިބެމުންދާ ދުވަސްވަރަކަށް ވުމުން މިނިސްޓަރު ޢުމަރުގެ ނަމުގައި ލިބިފައިވާ އެސްއެމްއެސްގެ ސައްހަ ކަމާމެދުވެސް ވިސްނަން ޖެހޭކަމަށްވެސް ޝިފާ ވިދާޅުވިއެވެ.

ހޯމްމިނިސްޓަރުގެ އެސްއެމްއެސްގެ އިތުރަށް ހައުސިން މިނިސްޓްރީގެ ސިޓީއެއްވެސް މާލޭ ސިޓީކައުންސިލަށް ލިބިފައިވާ ކަމަށް ޝިފާ ވިދާޅުވިއެވެ. އެސިޓީއާ ބެހޭ ގޮތުން މާބޮޑު ތަފްސީލެއް ޝިފާ ނުދެއްވައެވެ. ނަމަވެސް ފެންފޯއްރުއްތަކުގެ ބުޑުތައް ނެގުމަށް ހައުސިން މިނިސްޓްރީން އެދިފައިވާ ކަމަށް ޝިފާ ވިދާޅުވިއެވެ. ނަަމަވެސް ފެންފޯއްރުއްތައް ކަނޑާލި މައްސަލަ ފުލުހުން ބަލަމުން ދަނިކޮށް ރުއްތަކުގެ ބުޑުތައް ނެގުމަކީ ހެކިނައްތާލުން ކަމަށް ދެކެވަޑައިގަނަވާ ކަމަށް ޝިފާ ވިދާޅުވިއެވެ.

މަޢޫލޫމާތު ލިބިފައިވާ ގޮތުގައި ހައުސިން މިނިސްޓްރީން އެދިފައިވަނީ އެމިނިސްޓްރީން މިހާރު އެކުލަވާލައިފައިވާ މާލެ ރީޑިވެލޮޕްމަންޓް ޕްރޮގްރާމާ އެއްގޮތަށް މާލެ ފެހިކުރުމުގެ މަަސައްކަތް ސިޓީކައުންސިލުން ކުރިއަށް ގެންދިޔުމަށެވެ. އެފަދަ ކަންކަން ކުރަމުންދާއިރު އެމިނިސްޓްރީގެ ހުއްދަ ހޯދައިގެން ކުރުމަށްވެސް އެސިޓީގައި އެދިފައިވާ ކަމަށް މަޢުލޫމާތު ލިބިފައިވެއެވެ.

މޫނު ނިވައިކޮށްގެންތިބި ބަޔަކު ވަނީ މަޖީދީ މަގާއި ޗާންދަނީ މަގުގައި ހައްދާފައިވާ ފެންފޯއްރުއްތައް ކަނޑާލައިފައެވެ. ފުލުހުން ގެންދަނީ އެމަައްސަލަ ބަލަމުންނެވެ.

މާލޭ ސިޓީކައުންސިލުން ބުނެފައިވަނީ އަލުން ފެންފޯއްރުއްތައް އިންދާނެ ކަމަށެވެ. އެގޮތުން ބައެއް ރަށްރަށުން މިހާރުވެސް ފެންފޯއް ރުއްތައް ހަދިޔާ ކުރަމުންދާ ކަމަށް އެކައުންސިލުންވަނީ ބުނެފައެވެ.