މިނިވަންކަމާއި ސިޔާދަތަށް އުނިކަމެއް އަތުވެދާފަދަ ކަންކަމުން ދުރުވެ ތިބުން މުހިންމު: ރައީސް ޔާމުިން

ދިވެހިރާއްޖޭގެ މިނިވަންކަމާ ސިޔާދަތަށް އުނިކަމެއް އަތުވެދާނެކަންކަމުން ދުރުވެ ތިބުމަށް ރައީސުލްޖުމްހޫރިއްޔާ އަބްދުﷲ ޔާމިން އިލްތިމާސް ކުރައްވައިފިއެވެ.

ދިވެހިރާއްޖޭގެ ނަޞްރުގެ ދުވަހުގެ މުނާސަބަތުގައި، ރައީސް ޔާމިން ނެރުއްވި ހިތާބުގައި ވިދާޅުވެފައިވަނީ، 1988 ވަނަ އަހަރުގެ ނޮވެންބަރު މަހުގެ 3 ވަނަ ދުވަހު ރާއްޖެއަށް ކުރިމަތިވި ނުރައްކާތެރި ބިރުވެރި ޢުދުވާނީ ޙަމަލާއަކީ ފަހަކަށްއައިސް ރާއްޖެއަށް ކުރިމަތިވި އެންމެ ބިރުވެރި ޙަމަލާކަމަށެވެ. އެދުވަހުގެ ހާދިސާއަކީ، ދިވެހި ރައްޔިތުންގެ ހިތްތަކުން ދުވަހަކުވެސް ފިލައިގެންދާނެ ހާދިސާއެއް ނޫނެވެ. އެހާދިސާގެ ބިރުވެރިކަން މިއަދުވެސް ހިތްތަކަށް ވަދެގެންދާކަމަށެވެ. 

"އެދުވަހުގެ ޙަމަލާއިން މާތްވެގެންވާ އިސްލާމްދީނާއި، ދިވެހި ޤައުމާއި، ދިވެހި ރައްޔިތުން ސަލާމަތްކޮށްދެއްވުމަށް ރާއްޖޭގެ ސިފައިން ވެވަޑައިގެންނެވި މަތިވެރި ޤުރްބާނީގެ މަތިން އަޅުގަނޑު މި ފުރްޞަތުގައި ހަނދާންކުރަން. އަދި ދިވެހި ޤައުމުގެ މިނިވަންކަމަށް ޖިހާދު ކުރައްވައި، މިނިވަންކަން ރައްކާތެރި ކުރައްވައި، އެ ޢުދުވާނީ ޙަމަލާގައި ޝަހީދުވެވަޑައިގެންނެވި ހިތްވަރުގަދަ އަބްޠާލުން އެކުރެއްވި ޖިހާދަށް ފަޚްރުވެރިވާ ޙާލު، އެހުރިހާ ބޭފުޅުންގެ ފުރާނައަށް މާތްﷲ ސުވަރުގޭގެ ދާއިމީ ނިޢުމަތް މިންވަރުކޮށްދެއްވުން އެދި އެކަލާނގެ ޙަޟުރަތުގައި ދުޢާ ދަންނަވަން،" ރައީސް ޔާމިން ވިދާޅުވިއެވެ.

3 ނޮވެންބަރުގެ ޢުދުވާނީ ޙަމަލާގައި، މާތްﷲގެ ވާގިފުޅާއެކު، ދިވެހިންނަށް ނަޞްރު ލިބުނީ، ދިވެހި ރައްޔިތުން އެދުވަހު ދައްކަވައިދެއްވި އެކުވެރިކަމާއި، އުޚުއްވަތްތެރިކަމާއި، އެއްބައިވަންތަކަމުގެ ސަބަބުންކަމަށް ރައީސް ވިދާޅުވިއެވެ.

ނަޞްރުގެ ދުވަސް މިއަދު ފާހަގަކުރަމުންދާއިރު، ދިވެހިރާއްޖެއަށް މާޒީގައި ކުރިމަތިވި ކޮންމެ ޢުދުވާނެއް ކުރިމަތިވެފައިވަނީ، އެކަމުގައި ދިވެހިންގެ ތެރެއިން ޤައުމާއި ދީނަށް ލޯތްބެއް ނެތް، ޤައުމަށް ޚިޔާނާތްތެރިވި ޚާއިނުންގެ ބަޔަކު ޝާމިލުވެގެންކަން މިއީ މިއަދުވެސް އަޅުގަނޑުމެން ހަނދާންކުރަންޖެހޭނެ ކަމެއްކަމަށް ވެސް ރައީސް ވިދާޅުވިއެވެ.

"އަދި މިކަންކަމުން އަޅުގަނޑުމެން ޢިބްރަތް ހާސިލުކުރަން ޖެހެއެވެ. އެހެންކަމުން، މާޒީން ޢިބްރަތް ހާސިލުކޮށް، ދީނާއި ޤައުމަށް ލޯބިކުރާ މީހަކަށްވުމަށް، ރާއްޖޭގެ ރައްޔިތުންނަށް މިއަދު އަޅުގަނޑު އިލްތިމާސް ކުރަން،" 

ނަޞްރުގެ ދުވަހުގެ ޒިކުރާ އާކުރަމުންދާއިރު، ދިވެހި ޤައުމުގެ މިނިވަންކަމާއި ސިޔާދަތާއި، އަމިއްލަވަންތަކަމަށް އުނިކަމެއް އަތުވެދާފަދަ ކަންކަމުން އަޅުގަނޑުމެން ދުރުހެލިވެ ތިބުމަކީ، ވަރަށް މުހިންމު ކަމެއްކަމަށް ރައީސް ވިދާޅުވިއެވެ.

"ބޭރުގެ އެކި ފަރާތްތަކުން ފޯރުވުމަށް މަސައްކަތް ކޮށްފާނެ އެކި ނުފޫޒުތަކާ ދޭތެރޭގައި، އަޅުގަނޑުމެން އަބަދުވެސް ތިބެންޖެހޭނީ ސަމާލުވެއެވެ. ރާއްޖޭގެ އެއްބައިވަންތަކަމާއި އަމިއްލަވަންތަކަން ދިފާޢު ކުރުމުގެ މަތިވެރި ޢަޒުމުގައި،"