ބާރު ސްޕީޑެއްގައި ދުއްވާފައި ދިޔަ ކާރެއް ފިހާރައެއްގެ ތެރެއަށް ވަތް މައްސަލައިގައި ދެ މީހަކު ހައްޔަރުކޮށްފި

މަޖީދީމަގަށް ނުކުތް ކާރެއް ކޮންޓްރޯލުން ނެއްޓިގެންގޮސް މަޖީދީމަގުގައިހުރި ފަހަމާސް ފިހާރަތެރެއަށް ވަދެ ބޮޑެތި ގެއްލުންތަކެއް ލިބިފައިވާ މައްސަލަ އާއި ގުޅިގެން ކާރު ދުއްވަން ތިބިކަމަށް ތުހުމަތު ކުރެވޭ 2 މީހުން ހައްޔަރުކޮށްފިއެވެ.

ފުލުހުން ބުނީ އެ މައްސަލަ ފުލުހުންނަށް ހުށަހަޅާފައިވަނީ މިއަދު ހެނދުނު 6:44 ހާއިރުކަމަށެވެ. އެ ދެމީހުން ހައްޔަރު ކޮށްފައިވަނީ އެ ސަރަހައްދުގައި ތިބި އާންމުންނާ ގުޅިގެންކަމަށް ފުލުހުން ބުނެއެވެ.  ހައްޔަރުކޮށްފައިވަނީ ޢުމުރުން 21 އަހަރުގެ ފިރިހެނަކާއި 18 އަހަރުގެ ފިރިހެނެއްކަމަށް ފުލުހުން ބުނެއެވެ. 

އެތަނުން 21 އަހަރުގެ މީހާއަކީ ތޫނު ހަތިޔާރު ބޭނުން ކުރުމާއި މަސްތުވާ އެއްޗެތީގެ މައްސަލަ ތަކުގެ ކުށުގެ ރެކޯޑް އޮންނަ މީހެއްކަމަށް ފުލުހުން ބުނެއެވެ. އަދި 18 އަަހަރުގެ މީހާއަކީ މުދަލަށް ގެއްލުން ދިނުމާއި މަސްތުވާތަކެތީގެ ކުށުގެ ރެކޯޑް އޮންނަ މީހެއްކަމަށް ފުލުހންގެ ވެބްސައިޓުގައި ބުނެފައިވެއެވެ. މި ޙާދިސާގައި، އެސަރަޙައްދު ޕާކިން ޒޯނުގައި ޕާކުކޮށްފައި ހުރި 3 ސައިކަލެއް ކާރާއެކު ފިހާރަތެރެއަށްވަދެ އެ 3 ސައިކަލުވެސް ވަނީ ބޭނުން ނުކުރެވޭ ވަރަށް ހަލާކުވެފައިަކަމަށް ފުލުހުން ހާމަކުރެއެވެ. އޭގެ އިތުރުން ޒޯނުގައި ހުރި އިތުރު 3 ސައިކަލަކަށްވެސް ވަނީ ބޮޑެތި ގެއްލުންތައް ލިބިފައިކަމަށް ފުލުހުން ބުނެއެވެ.

މިއަދު ހެނދުނު ހިނގި މި ޙާދިސާގައި ފަހަމާސް ފިހާރައަށް ބޮޑެތި ގެއްލުންތަކެއް ލިބިފައިވާއިރު ފިހާރަ ތެރޭގައި ހުރި ގިނައަދަދެއްގެ މުދަލަށްވެސް ބޮޑެތި ގެއްލުންތަކެއް ލިބިފައި ވާކަމަށް ފުލުހުން ބުނެއެވެ.