ޝަހުމާއި ފަރިޔާޝަށް ހިމާޔަތް ދިން މީހެއްގެ ބަންދުގެ މުއްދަތު އިތުރު ކޮށްފި

މާފުށި ޖަލުން ފިލައިގެން ނިކުތް ނުރައްކާތެރި ދެ ކުށްވެރިން ކަމަށް ޝަހުމާއި، ފަރިޔާޝަށް ހިމާޔަތްދީ އެމީހުން ފިލުވައިގެން ގެންގުޅުނު ކަމުގެ ތުހުމަތުގައި ހައްޔަރު ކޮށްފައިވާ މީހެއްގެ ބަންދުގެ މުއްދަތު އިތުރު ކޮށްފިއެވެ.

މި މައްސަލައާ ގުޅިގެން ދެމީހަކުވަނީ ހައްޔަރު ކޮށްފައެވެ. އޭގެ ތެރެއިން މުއަދަތު އިއްޔެ އިތުރު ކޮށްފައިވަނީ 20 އަހަރުގެ މީހާގެއެވެ. އޭނާގެ ބަންދަށް ކުރިން ދީފައިވަނީ 5 ދުވަހެވެ. ނަމަވެސް އެ މުއްދަތު ހަމަވުމުން، އޭނާގެ ބަންދާމެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ޙާޟިރު ކުރުމުން، މިނިސްޓްރީ އޮފް ހޯމް އެފެއާޒުން ކަނޑައަޅާ ތަނެއްގައި ބަހައްޓައިގެން ތަހުޤީޤު ކުރިއަށް ގެންދިއުމަށް އިތުރު 15 ދުވަސް އެކޯޓުން ވަނީ ދީފައެވެ.

މި މައްސަލައާ ގުޅިގެން ފުލުހުން ހައްޔަރުކުރި 32 އަހަރުގެ މިހާގެ ބަންދަށް ފުރަތަމަ ދީފައިވާ 10 ދުވަހުގެ ބަންދުގެ މުއްދަތު ހަމަވާނީ އަންނަ ނޮވެމްބަރު މަހުގެ 3 ވަނަ ދުވަހު ކަމަށްވެސް ފުލުހުންވަނި ބުނެފައެވެ.

މި މައްސަލައާ ގުޅިގެން ހައްޔަރުކޮށްފައިވާ 20 އަހަރުގެ މީހާއަކީ މަސްތުވާތަކެތީގެ މައްސަލަތަކާއި ފޭރުމުގެ މައްސަލަތަކުގެ އިތުރުން މަރުގެ އިންޒާރުދީ މުދަލަށް ގެއްލުން ދިނުމުގެ މައްސަލަތަކުގެ ރެކޯޑް އޮންނަ މީހެއް ކަމަށްވެސް ފުލުހުން ބުނެފައިވެއެވެ.

ނުރައްކާތެރި 2 ކުށްވެރިން ފިލި މައްސަލަ އާއި ޖަލުން ފިލުމަށްފަހު އެ 2 ކުށްވެރިން ފިލުވައިގެން ގެންގުޅުނު މައްސަލަ ފުލުހުން މިހާރުވެސް ގެންދަނީ ވަރަށް ބޮޑު އިސްކަމެއް ދީގެން ކުރަމުންނެވެ.