ރާއްޖެއަށް މިހާރު ކުރަމުންދަނީ ހުޅަނގު މޫސުމުގެ ވިއްސާރަ

ރާއްޖެއަށް މިހާރު ކުރަމުންދާ ވިއްސާރައަކީ ހުޅަނގު މޫސުމުގެ ވިއްސާރަ ކަމަށް ރާއްޖޭގެ މޫސުމާ ބެހޭ އޮފީހުން ބުނެފިއެވެ.

އެއޮފީހުން މިރޭ ބުނީ ހުޅަނގު މޫސުމުގެ ވިއްސާރަ އާންމުކޮށް ނިމެނީ ނޮވެމްބަރ މަހުގެ މެދުތެރޭގައި ކަމަށެވެ. އެހެން ކަމުން "މިހާރު މިކުރަނީ ހުޅަނގުމޫސުމުގެ ފަހުކޮޅުގައި ކުރާ ވިއްސާރަ" މޫސުމާ ބެހޭ އޮފީހުގެ ބޭފުޅަކު ވިދާޅުވިއެވެ.

އެއޮފީހުން ބުނީ ކުރިއަށްއޮތް 24 ގަޑިއިރު ތެރޭގައިވެސް ވިއްސާރަ ކުރާނެ ކަމަށެވެ. ނަމަވެސް ވައިގަދަވާނެ ކަމަށް ލަފާނުކުރެވޭ ކަމަށެވެ. މިހާރު އާންމުކޮށް ވައިޖެހެނީ ގަޑިއަކު 8 މޭލަށް ކަމަށްވެސް އެތަނުން ބުންޏެވެ. ނަަމަވެސް ވިލާގަނޑުގައި ކުޑަކޮށް ވައިގަަދަވިޔަސް އިރުކޮޅަކުން މަޑުވާނެ ކަމަށެވެ.

"އެއީވެސް ދަތުރުފަތުރު ނުކުރެވޭ ވަރަށް ގަދަވާ ވާހަކައެއްނޫން. ދަތުރުފަތުރު ނުކުރުމަށް އަޅުގަނޑުމެން ރެކޮމެންޑް ނުކުރަން. ވާރޭ ވެހުނަސް ވައިގަދައެއްނޫން. އެހެންވީމާ ދަތުރު ފަތުރު ކުރެވޭނެ،" މޫސުމާ ބެހޭ އޮފީހުން ވާހަކަ ދެއްކެވި ބޭފުޅާ ވިދާޅުވިއެވެ.

އޭނާ ވިދާޅުވީ މ. އަތޮޅުން ފެށިގެން އުތުރަށް ވިއްސާރަ ކުރާނެ ކަމަށެވެ. ނަމަވެސް ލ. އަތޮޅުން ފެށިގެން ދެކުނަށް އުޑުމަތި ބަނަވިޔަސް ވިއްސާރަ ކުރާނެ ކަމަށް ނުބެލެވޭ ކަމަށްވެސް ވިދާޅުވިއެވެ.

މިއީ އަރަބިކަނޑުގައި އުފެދިފައިވާ ތޫފާނާ އެއްވެސް ވަރަކަށް ގުޅުންހުރި ވިއްސާރައެއް ނޫންކަމަށްވެސް މޫސުމާބެހޭ އޮފީހުންވަނީ ބުނެފައެވެ.

މިހާރު ކުރަމުންދާ ވިއްސާ އަންނަ ހޯމަ ދުވަހާ ހަމައަށް ދެމިގެން ހިނގައިދާނެ ކަމަށް ލަފާ ކުރެވޭ ކަމަށް މޫސުމާ ބެހޭ އޮފީހުންވަނީ ބުނެފައެވެ. އޭގެ ފަހުން މޫސުން ރަނގަޅުވާނެ ކަމަށް ލަފާކުރާ ކަމަށް އެއޮފީހުން މިރޭ މައުލޫމާތު ދިނެވެ.

ރޭ ފަތިހުން ފެށިގެން މިއަދު ހަވީރާ ހަމައަށް މާލެއަށްވަނީ 103 މިލިމިޓަރުގެ ވާރޭވެހިފައެވެ. އަދި ބައެއް ގޭގެއަށް ކޮންމެވެސް ވަރަކަށް ފެން ވަދެފައިވާ ކަމުގެ މަޢުލޫމާތުވެސް ވަނީ ލިބިފައެވެ.

މާލޭގެ މަގުތަކުގައި ބޮޑުވެފައިވާ ފެން ހިންދުމުގެ މަސައްކަތް ސިފައިން މިހާރުވެސްދަނީ ކުރަމުންނެވެ. ފެންބޮޑުވުމުގެ ސަބަބުން ސްކޫލްތަކަށް ނުދެވިފައިތިބި ބައެއް ދަރިވަރުން ސްކޫލަށް ގެންގޮސްދިނުމަށް ފުލުހުންވެސް ވަނީ އެހީތެރިވެފައެވެ.