ހިތަދޫ ރީޖަނަލް ހޮސްޕިޓަލް މަރާމާތު ކުރުމުގެ މަސައްކަތް 1.4 މިލިއަން ރުފިޔާއަށް ބަޔަކާ ހަވާލުކޮށްފި
29 އޮކްޓޯބަރ 2014 19:35
ޑިފެންސް މިނިސްޓަރ ނާޒިމް-ފޮޓޯ އެމްއެންޑީއެފް
އައްޑޫ ސިޓީގެ ހިތަދޫ ރީޖަނަލް ހޮސްޕިޓަލުގެ މަރާމާތުގެ މަސައްކަތް ކުރުމަށް ފަލަކް އެންޓަޕްރައިޒަސް ޕްރައިވެޓް ލިމިޓެޑާ މިއަދު ހަވާލުކޮށްފިއެވެ. މިމަސައްކަތް ކުރުމަށް އެކުންފުންޏާ ހަވާލުކޮށްފައިވަނީ 1،485،343.99 (1.4 މިލިޔަން) ރުފިޔާއަށެވެ.
މިމަސައްކަތް ހަވާލުކުރުމުގެ އެއްބަސްވުމުގައި ސޮއިކޮށްފައިވަނީ ހެލްތުމިނިސްޓްރީގައި މިއަދު ބޭއްވި ރަސްމިއްޔާތެއްގައެވެ. ސަރުކާރުގެ ފަރާތުން މިއެއްބަސްވުމުގައި ސޮއިކުރެއްވީ އެކްޓިން ހެލްތު މިނިސްޓަރ އަދި ޑިފެންސް މިނިސްޓަރ ރިޓަޔަރޑް ކާނަލް މުޙައްމަދު ނާޒިމެވެ. ފަލަކް ކުންފުނިން ސޮއިކުރެއްވީ މެނޭޖިން ޑައިރެކްޓަރ ޢަބްދުﷲ ހާނިސް މޫސާ އެވެ.
އެކުންފުންޏާ މިމަސައްކަތް ހަވާލުކޮށްފައިވަނީ 93 ދުވަސްތެރޭގައި ނިންމާ ގޮތަށެވެ. މިއެއްބަސްވުމުގެ ދަށުން އެ ހޮސްޕިޓަލުގައި ވަކިން ހަދާފައިވާ ޕްރައިވެޓް ރޫމްތަކާއި އިންޖީނުގެއާއި މެޑިކަލް ސްޓޯރޭޖާއި، ޖެނެރަލް ސްޓޯރޭހު މަރާމާތް ކުރާނެއެވެ. އަދި އޭއެންސީ ކްލިނިކާއި ލޯންޑްރީވެސް މަރާމާތު ކުރާނެއެވެ.
ކިޔުންތެރިންގެ ހިޔާލު