ރާސްޓަސް މެދުވެރިކޮށް ޕޯސްޕެއިޑް ބިލަށް ފައިސާ ދެއްކޭނެ ޚިދުމަތެއް ތައާރަފްކޮށްފި

އުރީދޫ މޯލްޑިވްސްއިން މިއަދު ރާސްޓަސްއިން ޕޯސްޓްޕެއިޑް ބިލް ދެއްކުމުގެ ޚިދުމަތް ތަޢާރަފްކޮށްފިއެވެ.

މިޚިދުމަތް މެދުވެރިކޮށް ކަސްޓަމަރުންނަށް ފަސޭހަކަމާއިއެކީ ރާއްޖޭގެ އެކިކަންކޮޅުތަކުގައި ހުންނަ ރާސްޓަސް ޑީލަރުން މެދުވެރިކޮށް މޯބައިލް ބިލަށް ފައިސާ ދެއްކޭނެއެވެ. މޯބައިލް ނަންބަރާއި ބިލަށް ދައްކަވަން ޖެހޭ ފައިސާ ދެއްވުމުން ރާސްޓަސް ޚިދުމަތް ދޭ ފަރާތް މެދުވެރިކޮށްވަގުތުން ބިލަށް ފައިސާ ދެއްކޭނެ ކަމަށް އުރީދޫން ބުނެއެވެ. 

"އަޅުގަނޑުމެންގެ ކަސްޓަމަރުންގެ އަދަދު ރާއްޖޭގެ އެކިކަންކޮޅުތަކުގައި އިތުރުވަމުން ދާހިނދު، ކަސްޓަމަރުންނަށް ފަސޭހައިން ރާއްޖޭގެ ކޮންމެ ތާކުންވެސް ޚިދުމަތްތައް ހޯދަން އެހީވެދޭ ޚިދުމަތްތައް އަޅުގަނޑުމެން މިގެނެސްދެނީ. ރާސްޓަސް މެދުވެރިކޮށް ބިލް ދެއްކުމުގެ ޚިދުމަތް މެދުވެރިކޮށް މިހާރު އަޅުގަނޑުމެންގެ ކަސްޓަމަރުންނަށް ޕްރީޕެއިޑްއެއް ރީޗާޖުކުރާހާ ފަސޭހައިން ކޮންމެ ތާކުންވެސް ބިލަށް ފައިސާދައްކާލެވޭނެ" އުރީދޫގެ ސީއީއޯ ވިކްރަމް ސިންހަ ވިދާޅުވިއެވެ.

މިޚިދުމަތް މިހާރު ރާއްޖޭގެ އަތޮޅުތެރޭގެ ރާސްޓަސް ޑީލާސް މެދުވެރިކޮށް ލިބޭނެކަމަށް އުރީދޫން ބުނެއެވެ.  މީގެ އިތުރުން، އުރީދޫއިން ބިލް ދެއްކޭނެ އިތުރު ގޮތްތައް ވަނީ ތަޢާރަފްކޮށްފައެވެ. އޭގެ ތެރޭގައި އޮންލައިން my.ooredoo.mv މެދުވެރިކޮށް، އުރީދޫގެހުރިހާ ފިހާރަތަކުގެ އިތުރުން ބޭންކް އޮފް މޯލްޑިވްސްގެ އިންޓަނެޓް ބޭންކިންގ ޚިދުމަތް މެދުވެރިކޮށްވެސް ބިލަށް ފައިސާ ދެއްކޭނެކަމަށް ރުއީދޫން ހާމަކުރެއެވެ.