ރުއްތައް ކެނޑި މައްސަލަ ޕީއައިސީން ތަހުގީގުކުރަން ފަށައިފި
28 އޮކްޓޯބަރ 2014 23:19
މާލޭ މަޖީދީމަގުގައި އިންދާފައި ހުރި ފެންފޯއް ރުއްތައް ކެނޑި މައްސަލައިގައި ފުލުހުންގެ އެއްވެސް ބައިވެރިވުމެއް ވޭތޯ ސާފުކުރުމަށް ޕޮލިސް އިންޓަރގްރިޓީ ކޮމިޝަން (ޕީއައިސީ) އިން ތަހުގީގެއް ފަށައިފިއެވެ.
ޕީއައިސީން ހާމަކޮށްފައިވާ ގޮތުގައި ރުއްތައް ކަނޑާލި މައްސަލައިގައި ފުލުހުން ބައިވެރިވޭތޯ ސާފުކުރުމަށް ތަހުގީގެއް ހިންގުމަށް ހޯމްމިނިސްޓަރ އުމަރު ނަސީރު ވަނީ ސީޓިއަކުން އެދިވަޑައިގެންފައި ކަމަށެވެ. އެ ކޮމިޝަނުން ހާމަކޮށްފައިވާ ގޮތުގައި އެ މައްސަލަ ތަހުގީގު ކުރުމަށް އުމަރު އެދިވަޑައިގެންފައިވަނީ މިދިޔަ ހޯމަ ދުވަހުއެވެ.
ރުއްތައް ކެނޑި މައްސަލައިގައި އެމްޑީޕީގެ ރައީސް މުހައްމަދު ނަޝީދު ދައްކަވާފައިވާ ވާހަކަފުޅުތަކަށް ވެސް ރިއާއަތްކޮށް ތަހުގީގު ކުރުމަށް ނިންމާފައިވާކަމަށް އެ ކޮމިޝަނުން ބުނެއެވެ.
މާލޭ ސިޓީ ކައުންސިލުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ރައީސް ނަޝީދު ވިދާޅުވެފައިވަނީ ރުއްތައް ކަނޑައިލުމުގައި ބައިވެރިވި މީހުންނަކީ ފުލުހުންގެ ސްޕެޝަލް އޮޕަރޭޝަންސް (އެސްއޯ) ފުލުހުންގެ ތެރޭގައި ހިމެނޭ ބައެއް ކަމަށެވެ. އެ މައްސަލަ ފޮރުވުމަށް ފުލުހުންގެ އިސްވެރިންގެ ބަޔަކު މަސައްކަތްކުރާ ކަމަށްވެސް ރައީސް ނަޝީދު ވަނީ ތުހުމަތު ކުރައްވައިފައެވެ.
މޫނު ނިވައިކޮށްގެން ތިބި ބަޔަކު ނުކުމެ މިމަހު 23 ވަނަ ދުވަހުގެރޭ މާލޭ މަގުމަތީގައި ސިޓީ ކައުންސިލުން އިންދާފައި ހުރި ހުރިހާ ފެންފޯއް ރުއްތަކެއް ވަނީ ކަނޑާލައިފައެވެ.
ކިޔުންތެރިންގެ ހިޔާލު