ރިޟްވާން ގެއްލުނު މައްސަލާގައި ހުށަހެޅި ޕެޓިޝަން ބޭރުކޮށްފި

މިނިވަން ނިއުސްގެ ނޫސްވެރިޔާ އަޙްމަދު ރިޟްވާން ގެއްލުނު މައްސަލައިގައި 5،055 މީހުން ސޮއިކޮށް ރައްޔިތުންގެ މަޖިލީހުގެ ޤައުމީ ސަލާމަތުގެ ކޮމިޓީ އަށް ހުށަހެޅި ޕެޓިޝަން އެކޮމިޓީން މިއަދު ބަލައިނުގެން ބޭރުކޮށްފިއެވެ.

އާއިލާގެ ފަރާތުން މި ޕެޓިޝަން އެކޮމިޓީއަށް ހުށަހެޅުއްވީ މާފަންނު އުތުރު ދާއިރާގެ މެމްބަރު އިމްތިޔާޒު ފަހްމީ އެވެ. އޭނާ ވިދާޅުވީ ޕެޓިޝަން ބަލައިނުގަނެވުނު ސަބަބެއް ކަމަށް ވިދާޅުވެފައިވަނީ މަޖިލީހުގެ ގަވާއިދުގައި، ޕެޓިޝަން ހުށަހެޅޭނެ ދާއިރާތައް ބަޔާންކުރާ 199 އަދި ޕެޓިޝަން އިބާރާތް ކުރާނެ ގޮތް ބަޔާންކުރާ 200 ވަނަ މާއްދާ އަށް ނުފެތޭތީ ކަމަށެވެ.

"އަޅުގަނޑު މަޖިލިހަށް ގޮސް އަމީން އާންމު އަޙުމަދު މުޙައްމަދާ ވާހަކަ ދެއްކިން. އެ ދެމާއްދާއިން ގަވާއިދަށް ނުފެތެނީ ކޮންބައެއްތޯ ސުވާލު ކުރުމުން ބައްލަވާފައި ވިދާޅުވި އެއީ އޮޅުމަކުންނޭ. ދެން ވިދާޅުވީ ޕެޓިޝަންގައި އާއިލާގެ އެއްބޭފުޅެއްގެ ސޮއިނެތިގެންނޭ. އެކަމަކު ސޮއިކޮށްފައިވާ ތަންވެސް އެބޭފުޅުންނަށް ދެއްކިން. ދެންނޭނގޭ އެބޭފުޅުން ކަންތައް ކުރައްވާނެ ގޮތެއް،" އިންތި ވިދާޅުވިއެވެ.

އޭނާ ވިދާޅުވީ މަޖިލީހުގެ އެއްވެސް ކޮމިޓީއަކުން ރިޟްވާންގެ މައްސަލަ ބަލައިގެންފައިނުވާ ކަމަށެވެ. އެންމެ ފަހުން އާއިލާގެ ފަރާތުން ހުށަހެޅި ޕެޓިޝަންވެސް "އެވަޅުލީ" އިންތި ވިދާޅުވިއެވެ. އިންތި ވިދާޅުވީ ޕެޓިޝަން ބަލައިނުގަންނަން ދެއްކެވި އުޒުރަކީ އެއްވެސް ހުއްޖަތެއް ނޫން ކަމަށެވެ. އެއީ ރިޟްވާންގެ މައްސަލައިގައި "މިސަރުކާރުގެ ސިޔާސަތު" ކަމަށްވެސް އޭނާ ވިދާޅުވިއެވެ.މިިކަމާ ގުޅިގެން މަޖިލީހުގެ ބަހެއް އަދި ލިބޭގޮތެއް ނުވެއެވެ.

އިންތި ވިދާޅުވީ އާއިލާގެ ފަރާތުން ހުށަހެޅި ޕެޓިޝަނަކީ މަޖިލީހުގެ އިދާރީ ބޭފުޅުން ވިދާޅުވި ގޮތަށް ހުރިހާކަމެއް ފުރިހަމަ ކޮށްގެން ހުށަހެޅި ޕެޓިޝަނެއް ކަމަށެވެ. ނަމަވެސް ޕެޓިޝަން ބަލައިނުގަތުމުން އަޖައިބުވި ކަމަށެވެ.

ރިޟްވާން ގެއްލިފައިވަނީ މިއަހަރުގެ އޮގަސްޓްމަހުގެ 7 ވަނަ ދުވަހުގެ ރެއިން ފެށިގެންނެވެ. އޭނާ ހޯދުމުގެ މަސައްކަތް ފުލުހުން މިހާރުވެސް ދަނީ ކުރަމުންނެވެ. އޭނާ ހޯދުމަށްފަހު މައިންބަފައިންނާ ހަވާލު ކޮށްދޭނެ ކަމަށް ހޯމްމިނިސްޓަރ ޢުމަރު ނަސީރު ވަނީ ވިދާޅުވެފައެވެ.