ރުއްތައް ކަނޑާލި މައްސަލައިގެ ހަގީގަތް ފޮރުވަން މަސައްކަތްކުރިކަމަށް ތުހުމަތުކުރެވޭ ފުލުހުންގެ ނަންތައް ރައީސް ނަޝީދު އާންމުކުރައްވައިފި

ކުރީގެ ރައީސް މުހައްމަދު ނަޝީދުގެ ވެރިކަމުގައި މާލޭ މަގުތައް މަތީގައި ސިޓީކައުންސިލުން އިންދާފައިހުރި ފެންފޯއް ރުށްތައް ކަނޑާލި މީހުންގެ މައްސަލަ ފޮރުވުމަށް މަސައްކަތްކުރިކަމަށް ތުހުމަތުކުރެވޭ ފުލުހުންގެ ނަންތައް އެމަނިކުފާނު އިއުލާނުކުރައްވައިފިއެވެ.

ފެންފޯއް ރުއްތައް ކަނޑާލާފައިވަނީ މިދިޔަ ބުރާސްފަތި ދުވަހުގެ ރޭގެ ވަގުތެއްގައިއެވެ. އެ މައްސަލައިގައި ޝާމިލުވާކަމަށް ތުހުމަތުކުރެވޭ މީހުންގެ ހަގީގަތް ފޮރުވުމަށް މަސައްކަތްކުރިކަމަށް ތުހުމަތުކުރެވޭ ވަކިވަކި ފުލުހުންގެ ނަންތައް ރައީސް ނަޝީދު އިއުލާނު ކުރައްވާފައިވަނީ މިއަދު މާލޭ ސިޓީކައުންސިލުގައި ބޭއްވި ނޫސްވެރިންގެ ބައްދަލުވުމެއްގައިއެވެ. 

އެ ބައްދަލުވުމުގައި ނަޝީދު ވިދާޅުވީ، އެމަނިކުފާނު އެ މައްސަލަ ތަހުގީގު ކުރައްވާފައިވާކަމަށެވެ. އެތަހުގީގެ މައުލޫމާތު ސިޓީކައުންސިލަށް ހިއްސާ ކުރައްވާނެކަމަށެވެ. 

މީޑިއާއަށް މައުލޫމާތު ދެއްވަމުން އެ މަނިކުފާނު ވިދާޅުވެފައިވަނީ، ފެންފޯއް ރުއްތައް ކަނޑާލި ރޭ،  ދަންވަރު 03:00 ހާއިރު  މާފަންނު ޕޮލިސް ސްޓޭޝަނުގައި ދުއްވާ ކާރަކުން ހަތިޔާރެއް ގެންގުޅުނު ދެ މީހަކު އަރާތިބި ސައިކަލެއްގައި ޖައްސައި ވައްޓާލައި، އެ ދެ މީހުން ހައްޔަރުކޮށް ފުރަގަހަށް ބިޑި އެޅުވި ކަމަށެވެ. އެ ދެ މީހުން ހައްޔަރުކުރީ މާފަންނު ސަހަރާއާ ހިސާބުން ކަމަށް އެމަނިކުފާނު ވިދާޅުވި އެވެ. ނަޝީދު ވިދާޅުވީ ފުލުހުން ހައްޔަރުކުރި ދެ މީހުން މޫނު ނިވާކުރަން އަޅައިގެން ތިބި ހުޑް ވެސް ފުލުހުން ނުނަގަކަމަށެވެ. އެކަން އެގޮތަށް ކުރީ އެއީ އެސްއޯ ފުލުހުންކަން އެނގޭތީކަމަށް ވެސް ނަޝީދު ވިދާޅުވިއެވެ. 

އެމީހުން ހައްޔަރު ކުރި ފުލުހުންގެ ސާވިސް ނަންބަރު ނަޝީދު ވަނީ އާންމު ކުރައްވައިފައެވެ. އެއީ ސްޓޭޝަނުގެ އޭ ޝިފްޓުގައި މަސައްކަތް ކުރާ ކޯޕްރަލް އަހުމަދު ޝިނާޒް ސާވިސް ނަންބަރު 1812 އާއި ޝަމްރޫހް ސާވިސް ނަންބަރު 2367 ކަމަށް ނަޝީދު ހާމަކުރެއްވިއެވެ. 

މޫނު ނިވާކޮށްގެން ތިބި ދެ މީހުން ހައްޔަރުކޮށްގެން ކޮމާންޑް ސެންޓަރުގެ ޑިއުޓީ އޮފިސަރަކަށް ހުރި ސަބް އިންސްޕެކްޓަރ މުހައްމަދު ސަބާހު ސާވިސް ނަންބަރު 1925 އަށް ފޯނުން ގުޅައިގެން ހާދިސާގެ މައުލޫމާތު ދެމުން ދަނިކޮށް އެތަނަށް ސްޕެޝަލް އޮޕަރޭޝަންސްގެ (އެސްއޯ) ގެ ސަބް އިންސްޕެކްޓަރ އަބްދުﷲ އިބްރާހިމް ސާވިސް ނަންބަރު 1647 (އާންމު ނަމުން ނަމަ ޑީޑީ) އައިސް އޭނާ އާއި އެކުއެކީގައިހެން އައި ސްޕެޝަލް އޮޕަރޭޝަންސްގައި ދުއްވާ ވެހިކަލަށް ހައްޔަރުކޮށްފައިތިބި ދެމީހުން އެރުވުމަށް މާފަންނު ސްޓޭޝަންގެ ފުލުހުންނަށް އެންގި ކަމަށް ނަޝީދު ވިދާޅުވިއެވެ.

ނަޝީދު ވިދާޅުވީ ހައްޔަރު ކުރި ދެމީހުން އެސްއޯގެ ވެހިކަލަށް އެރުވުމަށް އެންގި ވަގުތު އެތަނަށް މާފަންނު ޕޮލިސް ޝިފްޓު އޭގެ ޓީމް ލީޑަރެއް ކަމަށްވާ ސާޖަންޓް މުހައްމަދު ޖައިޝަމް ސާވިސް ނަންބަރު 1717 އާއި ކޯޕްރަލް އާދަމް ޒުބައިރު ސާވިސް ނަންބަރު 2724ވެސް އައި ކަމަށެވެ. އަދި ސާޖަންޓް ޝައިޖަމް އެވަގުތު އިން ޑިއުޓީ އޮފިސަރު މުހައްމަދު ސަބާހު އަށް ގުޅައި އެކަމާއި ހިތްހަމަ ނުޖެހިގެން ވާހަކަ ދެއްކުމުންވެސް ހައްޔަރު ކުރި ދެ މީހުންވެސް އެސްއޯ ވެހިކަލަށް ލުމަށް އެންގި ކަމަށްވެސް ރައީސް ނަޝީދު ވިދާޅުވި އެވެ.

އެސްއޯ ވެހިކަލް ފަހަތުން ސައިކަލުގައި ވެހިކަލް ދާ ތަނެއް ބެލުމަށް މާފަންނު ޕޮލިސްގައި މަސައްކަތްކުރާ ލާންސްކޯޕްރަލް ވާސިފް މުހައްމަދު ސާވިސް ނަންބަރު 4292 އާއި ކޮންސްޓަބަލް ޖާދުﷲ ސައީދު ސާވިސް ނަންބަރު 4777 ދިޔަ ކަމަށް ނަޝީދު ވިދާޅުވިއެވެ.  އަދި އެ ދެ ފުލުހުންނަށް ފެނުނީ ސްޕެޝަލް އޮޕަރޭޝަންގެ ވެހިކަލް ހައްޔަރުކުރި ދެ މީހުންނާއި އެކު އިސްކަންދަރު ކޮށްޓަށް ވަންތަންކަމަށް ވެސް ނަޝީދު ވިދާޅުވިއެވެ.

"މިކަން މިގޮތަށް ހިނގައި މާފަންނު ޕޮލިސްގެ ފުލުހުން ހިންހަމަނުޖެހިފައި ތިބުމުން ޗީފް އިންސްޕެކްޓާ ފަތުހުﷲ ވަހީދު ދަންވަރު ޕޮލިސް ސްޓޭޝަންއަށް އައިސް ކުދިންނާ ވާހަކަ ދެއްކި.މާފަންނު ޕޮލިސް ސްޓޭޝަންގެ ދަންވަރު ޑިއުޓީ އަދާކުރި ޝިފްޓް އޭގެ ސްޕަވައިޒަރަކީ ސްޓޭޝަން އިންސްޕެކްޓާ ޖާދުﷲ އިބްރާހިމް މަނިކު. އެބޭފުޅާއައަށް ވެސް އެ ހުރިހާ މައުލޫމާތެއް އެނގޭނެ.  އަދި މިމަހުގެ 26 ވަނަ ދުވަހު ސްޓޭޝަން އިންސްޕެކްޓަރ ޖާދުﷲ ވަނީ ސެންޓްރަލް އޮޕަރޭޝަން ކޮމާންޑްގެ ޑެޕިއުޓީ ހެޑް، ސްޕްރިންޓެންޑެންޓް އަބްދުﷲ ޝަރީފް ސާވިސް ނަންބަރު 1134 ކައިރިއަށް ހާޒިރު ކޮށްފައި،"  ކަމަށްވެސް ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ ރުއްތައް ކެނޑި މީހުން ހައްޔަރުކުރިރޭ ފުލުހުން ތަފްސީލުކޮށް ލިޔެފައިވާ ރިޕޯޓުން ބައެއް އުނިކުރުމަށް އަންގައި އެވާހަކަ ނުދެއްކުމަށް އަންގާފައިވާކަމަށެވެ. 

"މައްސަލަ އާއި ގުޅޭ ހުރިހާ ވާހަކައެއް ސާޖަންޓް ޖައިޝަމް ހާދިސާ ރިޕޯޓްގައި ދޮޅު ސަފްހާއަށް ތަފްސީލުކޮށް ލިޔެފައި ވަނިކޮށް، މާފަންނުގެ ޕޮލިސް ސްޓޭޝަންގެ އިންޗާޖް ސަބްއިންސްޕެކްޓަރ އަބްދުލް މަތީން ކައިރިއަށް ހާޒިރުކުރި. އެ ރިޕޯޓުން ބޮޑު ބައެއް އުނިކޮށް، މުޅި ރިޕޯޓް ބައި ސަފްހާ އަށް ބަދަލުކުރި ކަމަށާއި، އަދި އެ ވާހަކަތައް ނުދެއްކުމަށް ސްޓޭޝަންގެ ފުލުހުންނަށް ދަނީ އަންގަމުން،" ރައީސް ނަޝީދު ވިދާޅުވިއެވެ.