ފިލިތެޔޮ ރިސޯޓުގެ ބަޔަކު ކިޑްނެޕް ކޮށްފައިވަނީ އަމަން ބެލެހެއްޓުމުގައި ސަރުކާރު ނުކުޅެދުމުން- އެމްޑީޕީ

މޫނު ނިވާކޮށްގެން ތިބި ބަޔަކު ސްޕީޑް ލޯންޗެއްގައި ގޮސް ފިލިތެޔޮ ރިސޯޓަށް އަރައި، އެ ރިސޯޓުގެ ދެ މީހަކު ކިޑްނެޕް ކޮށްފައިވަނީ ރާއްޖޭގެ އަމަން ބެލެހެއްޓުމުގައި ސަރުކާރު ނުކުޅެދެމުންދާ މިންވަރުގެ ސަބަބުން ކަމަށް އެމްޑީޕީން ބުނެފިއެވެ.

ދެ މީހަކު ކިޑްނެޕް ކުރުމަށްފަހު ގިނަ ޢަދަދެއްގެ ފައިސާއާއެކު ތިޖޫރީއެއް ފޭރިގަނެގެން ގޮސްފައިވާ ކަމަށް އެމްޑީޕީން މިއަދު ނެރެފައިވާ ބަޔާނެއްގައި ބުނެފައިވެއެވެ.

"މިޙާދިސާއިން އެނގެނީ ރާއްޖޭގެ ރައްތަކުގައި ފާޅުކަން ބޮޑުގޮތެއްގައި ހިންގާ ޖަރީމާތައް ފުޅާވެ، އިތުރު ދަރަޖައަކަށް މިހާރު އެކަން ދަމުންދާކަމާއި، ރާއްޖޭގެ ފަތުރުވެރިކަމުގެ ސިނާޔަތަށް ވެސް ނުރައްކާ ކުރިމަތިވަމުންދާކަމެވެ. އަދި މިފަދަ ޖަރީމާތައް ހުއްޓުވުމުގައާއި އަމަން ބެލެހެއްޓުމުގައި ސަރުކާރު އެއްކޮށް ފޭލުވެ ނުކުޅެދިފައިވާކަމެވެ." އެމްޑީޕީގެ ބަޔާނުގައި ބުނެފައިވެއެވެ.

ފަތުރުވެރިން ޒިޔާރަތްކުރާ ރިސޯޓުތަކަށާއި ފަތުރުވެރިކަން ހިންގާ ފަރާތްތަކަށާއި އަދި ފަތުރުވެރިންނަށް ވެސް މިފަދަ ނުރައްކަލާ ބިރުވެރިކަމާ ކުރިމަތިލާންޖެހިފައިވާކަން ފެނުމަކީ ރާއްޖޭގެ ފަތުރުވެރިކަމަށާއި އިޤްތިޞާދަށް ބޮޑެތި ގެއްލުން ލިބޭނޭ ކަމަށްވެސް އެބަޔާނުގައި ބުނެފައިވެއެވެ.

އެބަޔާނުގައި ބުނެފައިވަނީ ރިސޯޓުތަކާއި ފަތުރުވެރިންނާއި ފަތުރުވެރިކަން ހިންގާ ފަރާތްތަކަށް އަމާންކަމާއި ރައްކާތެރިކަން ކަށަވަރުކޮށްދެއްވުމަށް ސަރުކާރަށް ގޮވާލާ ކަމަށެވެ.