ވަކީލަކު އިންތިޚާބު ކުރުމަށް 71 ރަށެއްގައި ވޯޓުލާނެ -އޭޖީ އޮފީސް

ގާނޫނީ ވަކީލުންގެ ތެރެއިން ޖުޑީޝަލް ސާވިސް ކޮމިޝަނަށް ބޭފުޅަކު އައްޔަން ކުރުމަށް ބާއްވާ އިންތިޚާބުގައި މާލޭސިޓީ ހިމެނޭ ގޮތަށް 71 ރަށެއްގައި ވޯޓުލުން އޮންނާނެ ކަމަށް އެޓަރނީ ޖެނެރަލް އޮފީހުން ބުނެފިއެވެ.

ވަކީލަކު އިންތިޚާބު ކުރުމަށް ބާއްވާ އިންތިޚާބު އޮންނާނީ މި އޮކްޓޯބަރމަހު 30 ވާ ބުރާސްފަތި ދުވަހުއެވެ. މި އިންތިޚާބުގައި 5 ބޭފުޅުން ވާދަ ކުރައްވައެވެ. އެއީ ބ. މާޅޮސް، ޖަވާހިރުމާގޭ، ރުޝްދުﷲ އިބްރާހީމާއި، މ. ބަޑިކުޅިމާގެ އަނަސް ޢަބްދުއްސައްތާރާއި، އއ. މަތިވެރި، ފިނިވާގޭ، ލަތީފާ ގާސިމާއި، މ. މުލަކު، ސިތާރާވާދީ، މުޙައްމަދު ފައިސަލާއި، ހ. ހިޔާކަން، ޙުސައިން ޝަމީމެވެ.

ޝަމީމަކީ ކުރިން ޑެޕިޔުޓީ ޕޮރޮސެކިޔުޓަރ ޖެނެރަލްގެ މަގާމް އަދާ ކުރައްވާފައިވާ ބޭފުޅެކެވެ. ލަތީފާ ގާސިމަކީ ޖުޑީޝަލް ސާރވިސް ކޮމިޝަންގެ މެންބަރުކަން ކުރައްވާފައިވާ ބޭފުޅެކެވެ.

މިއިންތިޚާބުގައި ވޯޓުލުމަށް 102 ވަކީލުން ރަޖިސްޓްރީ ކޮށްފައިވާ ކަމަށްވެސް އޭޖީ އޮފީހުން ބުނެފައިވެއެވެ.

މި އިންތިޚާބު އޮބްޒާވް ކުރަން ބޭނުންވާ ފަރާތްތަކުން މާދަމާ މެންދުރުފަހު 3.00 ގެ ކުރިން އޭޖީ އޮފީހަށް މަޢުލުމާތު ހުށަހެޅުމަށް އެއޮފީހުންވަނީ އެދިފައެވެ. މީގެކުރިން ދެފަހަރެއްގެ މަތިން މިއިންތިޚާބު ބޭއްވުމަށް މަސައްކަތް ކޮށްފައިވެއެވެ. ނަމަވެސް އިންތިޚާބު ލަސްވެފައިވަނީ ދިމާވި މައްސަލަތައް ސްޕްރީމްކޯޓަށް ހުށަހެޅި އެކޯޓުގެ އަމުރަކާ ގުޅިގެންނެވެ.