އެހެން މީހުންގެ ހައްގުތަކަށް ރައްކާތެރިވުމަށް ރައީސް ޔާމިން އިލްތިމާސް ކުރައްވައިފި

އެހެން މީހުންގެ ހައްގުތަކަށް ރައްކާތެރިވުމަށް ރައީސުލް ޖުމްހޫރިއްޔާ އަބްދުﷲ ޔާމިން އިލްތިމާސް ކުރައްވައިފިއެވެ.

ހިޖުރީ އައު އަހަރު ފެށުމުގެ މުނާސަބަތުގައި ރައީސް ޔާމިން ނެރުއްވި ހިތާބުގައި ވިދާޅުވެފައިވަނީ އިސްލާމްދީނަކީ އެކުވެރިކަމަށާއި އިންސާނީ ކަރާމާތަށް ގޮވާލާ ދީނެއްކަމަށެވެ.  އެހެން މީހުންގެ ޙައްޤުތަކަށް ރައްކާތެރިވެ، އެ ކަންކަމަށް އިޙްތިރާމް ކުރުމުގެ ޢަޒުމް ކަނޑައެޅުއްވުމަށް މި މުނާސަބަތުގައި، ދިވެހި ލޮބުވެތި ރައްޔިތުންނަށް  އިލްތިމާސް ކުރައްވާކަމަށެވެ.  އަޅުގަނޑުމެންގެ މެދުގައި މިއޮތް އުޚުއްވަތްތެރި ކަމުގެ ގުޅުމަށް ބުރޫއަރާފަދަ އެއްވެސް ކަމެއް ނުވަތަ އެއްވެސް ޢަމަލެއް، އެއްވެސް ފަރާތަކުން ނުހިންގުމަށް ރައީސް ޔާމީނުގެ ހިތާބުގައި ވަނީ އިލްތިމާސްކުރައްވައިފައެވެ.

"ޤައުމީ މަޞްލަޙަތަށްވުރެ އަމިއްލަ މަޞްލަޙަތު ކުރިއަށް ނުނެރުއްވުމަށް އަޅުގަނޑު އިލްތިމާސް ކުރަމެވެ. ހަމައެހެންމެ، ހިޖުރައިގެ މަތިވެރި ހާދިސާއިން ޢިބްރަތް ލިބިގަނެ، އިސްލާމީ އުޚުއްވަތްތެރި ކަމުގެ ރިވެތި ނަމޫނާ ދެއްކެވުމަށްވެސް އަޅުގަނޑު ގޮވާލަން،" 

ހިޖުރީ އާ އަހަރަކާ ކުރިމަތިލާއިރު، އިސްލާމީ އުންމަތަށް މިއަދު ކުރިމަތިވެފައިވާ ގޮންޖެހުންތަކާއި ނުރައްކާތަކުގެ މަތިންވެސް ހަނދާންކުރަން ޖެހޭކަމަށް ރައީސް ޔާމީނު ވިދާޅުވިއެވެ. އަދި އެކަންކަމުން ޢިބްރަތް ޙާޞިލްކޮށް، އަޅުގަނޑުމެންގެ މެދުގައި މިއޮތް އެކުވެރިކަމާއި އެއްބައިވަންތަކަމުގެ ގުޅުމަށް އެއްވެސް ބުރުލެއް އެރިޔަނުދީ، އެއްބައިވަންތަ ބައެއްގެ ގޮތުގައި އަބަދުވެސް ދެމިތިބުމުގެ ޢަޒުމް ކަނޑައަޅަން އެބަޖެހޭކަމަށް ވެސް އެމަނިކުފާނުގެ ހިތާބުގައި ވިދާޅުވެފައިވެއެވެ. 

"ހިޖުރީ އާ އަހަރެއް ފެށުމާ ގުޅިގެން، ދިވެހިރާއްޖޭގެ ލޮބުވެތި އުޚުތުންނަށާއި އަޚުންނަށް، މި އުފާވެރި މުނާސަބަތުގެ ތަހުނިޔާ ދަންނަވައި ހެޔޮއެދުންތައް އަރިސްކުރުމަކީ، އަޅުގަނޑަށް ލިބޭ ވަރަށް މަތިވެރި އުފަލެއް. ހަމައެޔާއެކު، އިސްލާމީ ޤައުމުތަކުގެ ވެރިންނަށާއި، ބައިނަލްއަޤްވާމީ އިސްލާމީ ޖަމާޢަތްތަކުގެ ވެރިންނަށްވެސް މިމުނާސަބަތުގެ ތަހުނިޔާ ދަންނަވައި، ހެޔޮއެދުންތައް އަރިސްކުރަން،" 

ހިޖުރައިގެ އެ ހާދިސާއަކީ، މުސްލިމް އަޚުންނާއި އުޚުތުންގެ މެދުގައި ޤާއިމްކުރެވިފައި އޮންނަންޖެހޭ ލޯތްބާއި، އެކުވެރިކަމާއި އެއްބައިވަންތަކަމުގެ ގާތް ގުޅުން ހަނދާންކޮށްދޭ މުހިންމު ހާދިސާއެއް ކަމަށްވެސް ރައީސް ޔާމިން ވޮދާޅުވިއެވެ. 

"ހިޖުރީ ތާރީޚުގެ ފެށުން ގުޅިފައިވަނީ، އިސްލާމީ ތާރީޚުގެ ވަރަށް ޢިބްރަތްތެރި ހާދިސާއެއް ކަމަށްވާ ކީރިތި ރަސޫލާ مُحَمَّـدرســول اللّـه صـلّى الله علـيـه وسـلّم، މައްކާ ދޫކުރައްވައި މަދީނާއަށް ކުރެއްވި މަތިވެރި ހިޖުރައިގެ ހާދިސާއާއެވެ. ހިޖުރައިގެ އެ ހާދިސާއަކީ، މުސްލިމް އަޚުންނާއި އުޚުތުންގެ މެދުގައި ޤާއިމްކުރެވިފައި އޮންނަންޖެހޭ ލޯތްބާއި، އެކުވެރިކަމާއި އެއްބައިވަންތަކަމުގެ ގާތް ގުޅުން ހަނދާންކޮށްދޭ މުހިންމު ހާދިސާއެއް. މުސްލިމުންގެ މެދުގައި އޮންނަންޖެހޭ އެކުވެރިކަމާއި އަޚުވަންތަކަމުގެ ގާތް ގުޅުން ބަދަހިކުރުމަށް އިސްލާމްދީން ގޮވާލާފައިވާ މިންވަރު، ހިޖުރައިގެ ހާދިސާއިން ހަނދާނަށް ގެނުވާ،" ރައީސް ޔާމީނުގެ ހިތާބުގައި ވިދާޅުވެފައިވެއެވެ.