ޝަހުމާއި، ފަރިޔާޝް ފިލި މައްސަލައާ ގުޅިގެން ބައްތިރީސް އަހަރުގެ މީހަކު ހައްޔަރު ކޮށްފި

ގަލޮޅު ކޯޒީ އިބްރާހީމް ޝަހުމް އާދަމާއި، ގއ. މާމެންދޫ، ޖަވާހިރުވާދީ، ފަރިޔާޝް އަޙުމަދު މާފުށީ ޖަލުން ފިލި މައްސަލައާ ގުޅިގެން ޢުމުރުން 32 އަހަރުގެ މީހަކު ހައްޔަރު ކޮށްފައިވާ ކަމަށް ފުލުހުން ހާމަ ކޮށްފިއެވެ.

އިސްކަންދަރު ބިލްޑިންގ ގައި ދެންމެ ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ އެމީހާ ހައްޔަރު ކޮށްފައިވަނީ ރޭގެ ވަގުތެއްގައި ކަމަށެވެ. ނަމަވެސް އޭނާއާ ބެހޭ ތަަފްސީލެއް ނުދެއްވައެވެ.

ފުލުހުން ބުނީ އެމީހުން ޖަލުން ފިލުމަށްފަހު ފުލުހުން އެމީހުން އަތުލައިގަތުމާ ހަމައަށް އެމީހުންނަށް އެހީތެރިވި މީހުންގެ މައްސަލަތައް ތަހުގީގު ކުރަމުންދާ ކަމަށެވެ. ނަމަވެސް އެކަމާ ބެހޭގޮތުންވެސް ތަފްސީލެއް ފުލުހުން ނުދެއްވައެވެ.

އެމީހުން ޖަލުން ފިލި ކަމުގެ މައުލޫމާތު ފުލުހުންނަށް ލިބިފައިވަނީ މިމަހުގެ 17 ވަނަ ދުވަހުއެވެ. ނަމަވެސް އެމީހުން ޖަލުން ފިލާފައިވަނީ މިމަހުގެ 16 ވަނަދުވަހުގެ ރޭގެ ވަގުތެއްގައި ކަމަށްވެސް ފުލުހުން ބުންޏެވެ.

އެމީހުން ފިލިކަމުގެ މައުލޫމާތު ލިބުމާއެކު މާލެއާއި، މާލެކައިރީ ބައެއް ރަށްރަށާއި، ރިސޯޓުތައް ފުލުހުން ދިޔައީ ބަލަމުންނެވެ. އަދި އެއްގަމާއި، ކަނޑު އުޅަނދުފަހަރުވެސް ފުލުހުންނާއި ސިފައިން ދިޔައީ ޗެކްކުރަމުންނެވެ. ފުލުހުން ބުނިގޮތުގައި ދެ ކުށްވެރިން ޖަލުން ފިލިކަން އެނގުނީ މިދިޔަ ހުކުރުދުވަހުގެ ރޭ ކަމަށް ވިޔަސް އެކަން ހިނގާފައި ވަނީ އޭގެ އެއް ދުވަސް ކުރިން، ބުރާސްފަތިދުވަހުގެ ރޭގެ ވަގުތެއްގަ އެވެ.

ފުލުހުން މިރޭ ބުނީ އެދެމީހުން ޖަލުން ފިލާފައިވަނީ ގިނަދުވަސްތަކެއް ވަންދެން ރާވައިގެން ކަމަށެވެ. ފުލުހުން ގެންދަނީ މިހުރިހާ ކަމެއް ތަހުގީގު ކުރަމުން ކަމަށްވެސް ފުލުހުން މިރޭ ބުންޏެވެ. ފުލުހުންވަނީ ޝަހުމާއި، ފަރިޔާޝް އަތުލައިގެންފައެވެ. ޝަހުމް އަތުލައިގެންފައިވަނީ ރޭގެ އިރާކޮޅު މާލާގެ ގެސްޓްހައުސްއަކުންނެވެ. އަތުލައިގެންއިރު އޭނާހުރީ ތުނިކޮށް ބޯކޮަށާފައެވެ. އިތުރު ބަދަލެއް ސިފައަކަށް ގެނެސްފައި ނުވާކަމަށް ފުލުހުން ބުނެފައިވެއެވެ. ނަަމަވެސް މާލޭގެ ކެފޭއަކުން ފަރިޔާޝް އަތުލައިގަތްއިރު އޭނާހުރީ ވިގެއް އަޅައިގެން ސިފަބަދަލުކޮށްފައެވެ.