އޭސީތަކުގެ ފިނިހޫނުމިން 25 ޑިގުރީގައި ބެހެއްޓުމަށް އެސްޓީއޯއިން ކެމްޕޭނެއް ފަށައިފި

އެއާ ކޮންޑިޝަން (އެސީ) ތަކުގެ ފިނިހޫނުމިން 25 ޑިގުރީގައި ބެހެއްޓުމަށް އަހުލުވެރިކުރުމުގެ ކެމްޕޭނެއް އެސްޓީއޯއިން ފަށައިފިއެވެ.

ދުނިޔޭގެ ތިމާވެށީގެ ދުވަހުގެ މުނާސަބަތުގައި ފެށި ކެމްޕޭނުގެ ޝިއާރަކީ "އިޓްސް ކޫލް އެޓް 25" (25 ގައި ވެސް ފިނިވާނެ) އެވެ. އެ ޝިއާރުގެ މަގުސަދަކީ އޭސީގެ ފިނިހޫނުމިން އާންމުގޮތެއްގައި 25 ޑިގުރީ ސެލްސިއަސްގައި ބެހެއްޓުމެވެ. 

ކެމްޕޭނު އިފްތިދާހު ކޮށްދެއްވަމުން  އެސްޓީއޯގެ މެނޭޖިން ޑިރެކްޓަރު އާދަމް އާޒިމް ވިދާޅުވީ، ރާއްޖޭގައި ކޮންމެ މަހަކު 300 މިލއަން ޑޮލަރާ 500 މިލިއަން ޑޮލަރާ ދެމެދުގެ އަދަދަކަށް ތެޔޮ ހަރަދު ކުރާ ކަމަށެވެ. އެއީ 75 އާއިލާގެ ގެދޮރު ބިނާކުރާ މިންވަރުގެ ފައިސާ ކަމަށްވެސް އޭނާ ވިދާޅުވިއެވެ. 

އެންވަޔަރަންމަންޓް މިނިސްޓަރު ތޯރިގު އިބްރާހިމް ވިދާޅުވީ ކަރަންޓު އެންމެ ގިނައިން ބޭނުން ކުރެވޭ އެއް ވަސީލަތަކީ އޭސީ ކަމަށެވެ.  އޭނާ ވިދާޅުވި އޭސީގެ ފިނިހޫނުމިން 16 ޑިގުރީގައި ބެހެއްޓުމާ 25 ޑިގުރީގައި ބެހެއްޓުމުން ވެސް ފިނި ވާނީ ދާދި އެއްހަމައެއްގައި ކަމަށެވެ. އޭސީތަކުގެ ފިނިހޫނުމިން 25 ގައި އާންމުކޮށް ބަހައްޓައިފިނަމަ ކަރަންޓު ބިލުގެ ހަތް ޕަސަންޓު ކުޑަވާނެކަމަށް ވެސް މިނިސްޓަރ ވިދާޅުވިއެވެ. 

"(އޭސީ) 16 އަށް ލާއިފައި ބެހެއްޓުމާއި 25 ގައި ބެހެއްޓުމާ ވާނީ ހަމަ އެއްވަރެއް. 16 ގައި ބެހެއްޓުމުގެ ބަދަލުގަ އެ އަދަދު މަތިކޮށްލެވޭ ކޮންމެ ފަހަރަކު ކަރަންޓު ބިލުން ހަތް ޕަސެންޓް މަދުވެގެން ދާނެ،" ތޯރިގު ވިދާޅުވި އެވެ.