ގައިދީން ފިލިމައްސަލަ މަޖިލީހަށް ހުށަހަޅައިފި

މާފުށީޖަލުން ހުކުރު ދުވަހުގެރޭ ދެ ގައިދީން ފިލި މައްސަލަ މަޖިލީހަށް ހުށަހަޅައިފިއެވެ.

ޖަލުން ފިލާފައިވާ ދެ މީހުންނަކީ މިދިޔަ ހުކުރު ދުވަހުގެރޭ ގ. ކޯޒީ އިބްރާހިމް ޝަހުމް އާދަމާއި ގއ. މާމެންދޫ ޖަވާހިރުވާދީ ފަރިޔާޝް އަހުމަދެވެ. ދެ މީހުންނަކީ ވެސް އުމުރު ދުވަހުގެ ޖަލު ހުކުމެއް ތަންފީޒު ކުރަމުން ދިޔަ ދެމީހުންނެވެ. 

އެ މައްސަލަ ކުއްލި މައްސަލައެއްގެ ގޮތުގައި ހުށަހަޅާފައިވަނީ މިދިޔަ އެމްޑީޕީގެ ޕާލިމެންޓަރީ ގުރޫޕުގެ ނައިބުރައީސް އިމްތިޔާޒް ފަހުމީއެވެ. މަޖިލީހަށް ކުށްލި މައްސަލައެއް ހުށަހަޅާފައިވާއިރު، މެމްބަރަކު ކޮންމެހެން ބޭރަށް ނުކުންނަން ޖެހިވަޑައިގެންފިނަމަ ސަލާމަތަށާއި ރައްކާތެރިކަމަށް އިތުރު ސަމާލުކަމެއް ދެއްވުމަށް މޯލްޑިވިސް ނެޝަނަލް ޑިފެންސް ފޯސް (އެމްއެންޑީއެފް) އިން ވަނީ އަންގާރަ ދުވަހު އަންގައިފައެވެ.

މީގެއިތުރުން އެމްއެންޑީއެފުންވަނީ މަޖިލީހުގެ މެންބަރުންނަށް ސެކިއުރިޓީ ހަމަޖައްސައިދޭން ވެސް އަންގައިފައެވެ. މާދަމާއިން ފެށިގެން ކޮންމެ ދުވަހަކު ހެނދުނު 7:00 އިން މެންދަމު 1:00 އަށް ސެކިއުރިޓީދޭން ނިންމާފައިވާކަމަށް މަޖިލިސް އިދާރާއިން ވަނީ ބުނެފައެވެ. 

ފުލުހުން ބުނީ ޝަހުމް އާއި ފަރިޔާޝްގެ މައުލޫމާތު އެނގި ހުރެ މޯލްޑިވްސް ޕޮލިސް ސާވިސްއާ ހިއްސާ ނުކުރާ ފަރާތްތަކާ މެދު ގާނޫނީ ގޮތުން އަޅަންޖެހޭ ފިޔަވަޅު އަޅާނެ ކަމަށް ފުލުހުން ބުނެފައިވެއެވެ.

ދެ މީހުންނާ ބެހޭ އެއްވެސް މައުލޫމާތެއް ލިބިފައިވާ ނަމަ އެ މައުލޫމާތެއް މޯލްޑިވްސް ޕޮލިސް ސާވިސްގެ ހޮޓްލައިން ނަމްބަރު 3322111 އަށް ނުވަތަ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓްގެ ނަމްބަރު 9911099 އަށް ގުޅުއްވައި ހިއްސާ ކުރެއްވުން އެދޭކަމަށް ފުލުހުން ބުނެއެވެ.