ފަރެސްމާތޮޑާގެ ގޮނޑުދޮށް ހިމާޔަތްކުރުމުގެ އެއްބަސްވުމުގައި ސޮއިކޮށްފި

ހުވަދުއަތޮޅު ދެކުނުބުރީ ފަރެސްމާތޮޑާގެ ގޮނޑުދޮށް ހިމާޔަތް ކުރުމުގެ މަސައްކަތުގެ އެއްބަސްވުމުގައި އެމް.ޓީ ހޯގާޑާ ތިމާވެއްޓާ ބެހޭ މިނިސްޓްރީއާ ދެމެދު މިއަދު ސޮއި ކޮށްފިއެވެ.

މި މަސައްކަތުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް އެންވަޔަރަންމަންޓް އެންޑް އެނަރޖީ ޠާރިޤް އިބްރާހީމެވެ. އެމް.ޓީ.ސީ.ސީގެ ފަރާތުން ސޮއިކުރެއްވީ އެމް.ޓީ. ހޯގާޑްގެ ޕްރޮޖެކްޓްސް ޑިރެކްޓަރ ކެނެތު ހޯމް އެވެ.

މި މަޝްރޫޢަކީ ޔޫ.އެން.ޑީ.ޕީގެ އެހީއަކާއެކު ކުރިއަށްގެންދާ މަޝްރޫޢެއް ކަމަށް ތިމާވެއްޓާ ބެހޭ މިނިސްޓްރީން ބުނެފައިވެއެވެ. މި މަޝްރޫޢުގެ ދަށުން ގދ. ފަރެސްމާތޮޑާގެ ހުޅަނގު ދެކުނު ފަރާތުގައި 734 މީޓަރުގެ ބޮޑު ހިލައިގެ ތޮށްޓެއް ލުމަށްވަނީ ހަމަޖެހިފައެވެ.

އެކުންފުންޏާ މިމަސައްކަތް ޙަވާލުކޮށްފައިވަނީ 7 މަސް ދުވަހުގެ ތެރޭގައި މަސައްކަތް ނިންމުމަށެވެ. މި މަޝްރޫޢުގެ ޖުމްލަ އަގަކީ 37,802,962.85 މިލިއަން ރުފިޔާއެވެ. މި މަޝްރޫޢުގެ ޢަމަލީ މަސައްކަތަށްދާ ޚަރަދުގެ ބާކީބައި ޚަރަދުކުރަން ހަމަޖެހިފައިވަނީ ޕަބްލިކް ސެކްޓަރ އިންވެސްޓްމެންޓް ޕްރޮގްރާމް (ޕީ.އެސް.އައި.ޕީ)ގެ ދަށުން ކަމަށްވެސް ތިމާވެއްޓާ ބެހޭ މިނިސްޓްރީން ބުނެފައިވެއެވެ. މި މަޝްރޫޢުގެ އިތުރުންވެސް ނ. ހޮޅދޫ، ރ. މަޑުއްވަރީ، ކ. ވިލިނގިލި، ކ. މާފުށި، މ. ނާލާފުށި އަދި ގދ. ތިނަދޫގައި ވަނީ ގޮނޑުދޮށް ހިމާޔަތްކުރުމުގެ މަސައްކަތް މިއަހަރު ފަށާނެ ކަމަށް މިނިސްޓްރީން ހާމަކޮށްފައިވެއެވެ.