ދުވާފަރަށްއެރި ނަގޫރޯޅިއެއްގައި މޫދަށް ވެއްޓުނު މީހަކު ސަލާމަތް ކޮށްފި
16 އޮކްޓޯބަރ 2014 21:42
މޫދަށް ވެއްޓުނު މީހާ ސަލާމަތްކުރި އީމާން-ފޮޓޯ: ޕޮލިސް
މިއަދު އިރު އޮއްސެމުންދިޔަ ވަގުތު ރ.ދުވާފަރަށް އެރި ނަގޫރޯޅިއެއްގައި މޫދަށްވެއްޓުނު މީހަކު ގެނބެމުންދަނިކޮށް ފުލުހު މީހަކު އޭނާ ސަލާމަތް ކޮށްފިއެވެ.
ފުލުހުން ބުނެފައިވަނީ ނަގޫރޯޅިއެރި އިރު އެމީހާހުރީ ބަނދަރު މަތީގައި ކަމަށެވެ. މޫދަށް ވެއްޓިފައިވަނީ 26 އަހަރުގެ ދިވެހި ފިރިހެނެއް ކަމަށްވެސް ފުލުހުން ހާމަކުރައްވާފައިވެއެވެ.
"އޭނާ މޫދަށް ވެއްޓި އޮއިވަރާއެކު ބޭރަށްދާ މަންޒަރު އެވަގުތު ދުވާފަރު ޕެޓްރޯލް ކުރުމުގައި ހަރަކާތްތެރިވި ފުލުހުންގެ ވެހިކަލްގައި ތިބި ފުލުހުންނަށް ފެނުމާއެކު ފުލުހުންގެ ވެހިކަލްގައި އިން ޕޮލިސް ކޯފްރަލް މުޙައްމަދު އީމާން ވަނީ މޫދަށް ފުންމާލާ ފަތާފައިގޮސް ގެނބެމުން ދިޔަ މީހާ ސަލާމަތް ކޮށްފައެވެ." ފުލުހުން ބުނެފައިވެއެވެ.
މިހާދިސާގައި މޫދަށް ވެއްޓި ގެނބެމުން ދަނިކޮށް ސަލާމަތްކުރި މީހާއަށް ލޮނު ބޮވިފައި ވުމުގެ ސަބަބުން ރ.ދުވާފަރު ސިއްޙީމަރުކަޒުގައި ދަނީ ފަރުވާ ދެމުން ކަމަށްވެސް ފުލުހުން ހާމަކޮށްފައިވެއެވެ.
މި ނަގޫރޯޅީގެ ސަބަބުން ދުވާފަރު ބަނދަރުގައި އަޅާފައި ހުރި ބައެއް އޮޑިދޯނިފަހަރުގެ ވާތައް ކަނޑައިގެން ގޮސްފައިވެއެވެ. އަދި ބަނދަރު މަތީގައި ޕާކުކޮށްފައި އޮތް ކާރެއް ކަހާލައިގެން ގޮސް 30 ފޫޓު ދުރުގައި ހުރި ހޮޅިދަނޑިއެއްގައި ޖެހުމުގެ ސަބަބުން ކާރަށް އެކިވަރުގެ ގެއްލުންތައް ލިބިފައި ވާކަމަށްވެސް ފުލުހުން ހާމަކޮށްފައިވެއެވެ.
ކިޔުންތެރިންގެ ހިޔާލު