ބޭނުންވާ ވަރަށްވުރެ އިތުރަށް އެން ނުދެމުމަށް އިލްތިމާސް ކޮށްފި

މަސްވެރިކަމަށް ބޭނުންވާ ވަރަށްވުރެ އިތުރަށް އެން ނުދެމުމަށް ފިޝަރީޒް މިނިސްޓްރީން މަސްވެރިންނަށް އިލްތިމާސް ކުރައްވައިފިއެވެ.

އެމިނިސްޓްރީން މިކަމަށް އިލްތިމާސް ކުރައްވާފައިވަނީ އެމުގެ ގޮތުގައި ގިނަޢަދަދެއްގެ ވާލަން ރޮނޑު ހިފުމަށްފަހު ބާކީ ވެފައިވާ ރޮނޑުތައް މަރުވުމުން މާލޭގެ ފަޅުތެރެއަށް އުކާލާފައިވާ މައްސަލާގައި ނެރުއްވާފައިވާ ބަޔާނެއްގައެވެ. "މަސްވެރި ކަމުގައި ބޭނުންކުރުމަށްފަހު ގިނަ ޢަދަދެއްގެ އެން އުކާލަން މެދުވެރިވަނީ މަސްވެރިކަމަށް އެކަށީގެންވާ ވަރަށްވުރެ ގިނައިން އެން ހިފުމުގެ ސަބަބުން ކަމަށްވާތީ މުސްތަޤުބަލުގައި މިފަދަ ހާލަތްތައް މެދުވެރިވުން މަދުކުރުމަށްޓަކައި އެން ދެމުމުގައި މިހާރަށްވުރެ ޒިންމާދާރުވެ، ބޭނުންވާ މިންވަރަށްވުރެ އިތުރަށް އެން ނުދެމުމަށް ސަމާލުވުމަށް އިލްތިމާސް ކުރަމެވެ." އެބަޔާނުގައި ބުނެފައިވެއެވެ.

އެބަޔާނުގައި ބުނެފައިވަނީ އިތުރުވާ އެންތައް މަރުވުމުގެ ކުރިން ފަރެއްގެ ބޭރަށް ދޫކޮށްލެއްވިދާނެ ކަމަށެވެ. މަރުވެގެން އުކާލަންޖެހޭ އެން މީހުން ދިރިއުޅޭ ރަށްރަށުގެ ފަރާއި، ފަޅަށް އުކާނުލުމަށްވެސް މިނިސްޓްރީންވަނީ އިލްތިމާސް ކުރައްވާފައެވެ.

މާލޭގެ އުތުރުފަރާތުގެ ފަޅުގެ ސަރަހައްދަކީ ރާއްޖެ އަންނަ ޓޫރިސްޓުންނާއި ޢާއްމު ފަރާތްތަކުން ބޭނުންކުރާ ޞަރަޙައްދެކެވެ. އެހެން " މަރުވެފައިވާ ގިނަ އަދަދެއްގެ މަސް ކުނިވެ، ފަޅުތެރޭގައި ހުރުމަކީ މާލޭގެ ފަޅު ހަޑިވުމުގެ އިތުރުން އާންމު ޞިއްޙަތަށް ވެސް އޭގެ ނޭދެވޭ އަސަރުކުރުން އެކަށީގެންވާ ކަމެކެވެ. މީގެ އިތުރުން މާލޭ ފަޅުގެ ޞަރަޙައްދަކީ ފެން ދައުރުވުން ކުޑަ މާޙައުލެއް ކަމުގައިވެފައި ގިނަ ޢަދަދެއްގެ މަސް ފަޅުތެރޭގައި ކުނިވެފައި ހުރުމަކީ މިކަމުގެ ސަބަބުން ކަނޑުގެ އެހެން ދިރުންތަކުގެ ޞިއްޙަތަށްވެސް ނޭދެވޭ އަސަރުކުރުން އެކަށީގެންވާ ކަމެކެވެ." މިނިސްޓްރީގެ ބަޔާނުގައި ވެއެވެ.

މާލޭ ފަޅުތެރޭގައި ގިނަ ޢަދަދަކަށް ވާލަންރޮނޑު މަރުވެފައިވާ ކަމުގެ ރިޕޯޓު މިނިސްޓްރީއަށް ކޮށްފައިވަނީ މިމަހުގެ 15 ވަނަ ދުވަހުއެވެ. ރިޕޯޓާ ގުޅިގެން ބެލިބެލުމުން އެއީ އެމުގެ ގޮތުގައި ހިފުމަށްފަހު ދޫކޮށްފައިވާ ރޮނޑުކަން އެނގިފައިވާ ކަމަށް މިނިސްޓްރީން ބުނެފައިވެއެވެ.