ފަލަސްތީނަކީ މިނިވަން ދައުލަތެއްގޮތައި ބަލައިގަތުމަށް އިނގިރޭސިވިލާތުގެ މަޖިލީހުން ނިންމުމުން އެމްޑީޕީން މަރުހަބާކިޔައިފި
15 އޮކްޓޯބަރ 2014 9:55
ފަލަސްތީނަކީ މިނިވަން ދައުލަތެއް ކަމަށް ބަލައިގަންނަން އިނގިރޭސިވިލާތުގެ ގާނޫނު ހަދާ މަޖިލީހުން ފާސްކުރުމުން އިދިކޮޅު ޕާޓީ އެމްޑީޕީން އެކަމަށް މަރުހަބާ ކިޔައފިއެވެ.
ފަލަސްތީނުގެ ދައުލަތް ޤަބޫލުކުރުމަށް އިނގިރޭސިވިލާތުގެ ޕާލަމެންޓުން ތާޢީދުކޮށް ފާސްކުރުމަކީ ފަލަސްތީނުގެ މިނިވަންކަމަށް ގޮވާލާ އެ ޤައުމުގެ ރައްޔިތުން ކުރަމުންދާ ވޭންހުރި ބޮޑު މަސައްކަތަށާއި އެ ޤައުމުގެ ރައްޔިތުންގެ ޙައްޤަށްޓަކައި ލިބިގެން ދިއަ ވަރަށް ބޮޑު ކުރިއެރުމެއް ކަމަށް އެމްޑީޕީ އިން ނެރުނު ބަޔާންގައި ބުނެފައިވެއެވެ.
“އަދި އެކަމަކީ މިނިވަން ދައުލަތެއްގެ ގޮތުގައި ފަލަސްތީނު އޮތުމަށް އަބަދުވެސް ތާޢީދުކުރާ ސިޔާސަތެއްގެ މައްޗަށް އެކުލެވިގެންވާ ދިވެހިރައްޔިތުންގެ ޑިމޮކްރެޓިކް ޕާޓީ(އެމްޑީޕީ) އާއި، އެންމެހައި ދިވެހި ރައްޔިތުންނާއި އަދި ދުނިޔޭގެ އެންމެހައި މުސްލިމުންނާއި މިނިވަންކަމަށް ތާޢީދުކުރާ އެންމެހައި ފަރާތްތަކަށް ލިބިގެންދިއަ ހިތްހަމަޖެހުމަކާއި އުފަލެކެވެ.” އެމްޑީޕީ އިން ނެރުނު ބަޔާނުގައި ބުނެފައިވެ އެވެ.
އެމްޑީޕީގެ ރައީސް މުހައްމަދު ނަސީދު ވެސް ވަނީ ފަލަސްދީނަން މިނިވަން ދައުލަތަކަށް ވުމުން އެކަމަށް މަރުހަބާ ވިދާޅުވެ ޓުވީޓް ކުރައްވައިފައެވެ.
ފަލަސްތީނަކީ މިނިވަން ދައުލަތެއް ކަމަށް ބަލައިގަތުމަށް އިނގިރޭސި ވިލާތުގެ އިދިކޮޅު ލޭބަރ ޕާޓީން ހުށައެޅި ގަރާރު ފާސްވީ 274 މެމްބަރުންގެ ވޯޓާއެކުގަ އެވެ. ގަރާރާ ދެކޮޅަށް ވޯޓު ދެއްވީ އެންމެ 12 މެމްބަރުންނެވެ.
ކިޔުންތެރިންގެ ހިޔާލު