ރައީސް އޮފީހުގެ ތަރުޖަމާނުގެ ތުހުމަތުތައް އެމްޑީޕީ އައްޑޫގޮފިން ދޮގުކޮށްފި

ރައީސް އޮފީހުގެ ތަރުޖަމާނު އިބްރާހިމް މުއާޒު އެމްޑީޕީއަށް ކުރެއްވި ތުހުމަތަކީ ގަބޫލު ކުރެވޭނެ ވާހަކައެއް ނޫން ކަމަށް އެމްޑީޕީ އައްޑޫ ގޮފީގެ ރައީސް އަހުމަދު އަދުހަމް ވިދާޅުވެއްޖެއެވެ.

އަދުހަމް ނެރުއްވި ބަޔާނެއްގައި ވިދާޅުވެފައިވަނީ، ހުކުރުދުވަހުގެ ރޭ އެމްޑީޕީން އައްޑޫ ސިޓީގައި ބޭއްވި ޖަލްސާއަށް ހަމަލާ ދިނުމާގުޅިގެން އެކަމަކީ އެމްޑީޕީން އަމިއްލައަށް ކުރި ކަމެއްގޮތަށް ރަމްޒުވާގޮތަށް މުއާޒު ދެއްކެވި ވާހަކަ ތަކަކީ އެމްޑީޕީ އައްޑޫ ސިޓީން ހަރުކަށި އިބާރާތުން ކުށްވެރި ކުރާ ވާހަކަތަކެއް ކަމަށެވެ. އެމްޑީޕީއާ ދެކޮޅަށް ހަމަނުޖެހުން ހިންގި ފަރާތްތައް ތަފާތު ކުރުމެއް ނެތި އިންސާފު ކުރިމައްޗަށް ގެނައުމަށް ވެސް އެމްޑީޕީ އައްޑޫ ގޮފިން ވަނީ ގޮވާލައިފައެވެ. 

"އެންމެހާ ގޮންޖެހުންތަކާއި ނުރައްކަލުގެ ތެރޭގައި ވެސް ޕާޓީގެ ހިންގުމަށް، ޕާޓީގެ ހަރަކާތްތަކަށް އެއްވެސް މަޑުޖެހުމެއް ނާންނާނެ ކަމުގެ ޔަގީންކަން ޕާޓީގެ ލޮބުވެތި މެމްބަރުންނަށް އަރުވަން." 

އެފަދަ ކަންކަން ތަކުރާރުކޮށް އެމްޑީޕީ އަށް އަމާޒުވަމުން ދަނީ، ޕާޓީގެ މަގުބޫލުކަން ފެންނަމުން ދާތީ ކަމަށްވެސް ބަޔާނުގައި ބުނެފައިވެއެވެ. 

ތަންތަނުގައި ހުޅުޖެހުމާއި ހަމަނުޖެހުން ހިންގުމަކީ ފެއިލްވެފައިވާ ވިސްނުމެއް ކަމަށް ރައީސް އޮފީހުގެ ތަރުޖަމާނު ވަނީ ވިދާޅުވެފައެވެ.