ފުލުހުންގެ ބައެއް ވެރިން ގެންދަނީ ތަހުގީގަށް ހުރަސްއަޅަމުން: ރައީސް ނަޝީދު
14 އޮކްޓޯބަރ 2014 9:14
ފުލުހުންގެ ބައެއް ވެރިން ތަހުގީގަށް ހުރަސްއަޅަމުން ގެންދާކަމަށް ރައީސް މުހައްމަދު ނަޝީދު ވިދާޅުވެއްޖެއެވެ.
އައްޑޫ ސިޓީއަށް ކުރެއްވި ދަތުރުފުޅު ނިންމަވާލެއްވުމަށްފަހު މާލެ ވަޑައިގެން ނޫސްވެރިންނާ ބައްދަލުކުރައްވައި ވާހަކަ ދައްކަވަމުން ރައީސް ނަޝީދު ވިދާޅުވީ، އެމްޑީޕީން އެ ސިޓީގައި ބޭއްވި ޖަލްސާއަށް ހަމަލާދިން މީހުން ދޫކޮށްލުމަށް އަމުރުކޮށްފައިވަނީ މާލޭގައި ހުރި ފުލުހުންގެ އިސްވެރިއެއް ކަމަށް މައުލޫމާތު ލިބިލައްވާފައިވާކަމަށެވެ.
"އަޅުގަނޑު ކައިރީގައި ފުލުހުންގެ އިސް ބޭފުޅަކު ވިދާޅުވީ މާލެ އިން މީހަކު ފޯނުކޮށްފައި ހަމަ މިހާރު ދޫކޮށްލަން ބުނީމަ ތިމަންނާމެންނަށް ދޫކޮށްލަން ޖެހުނީއްޔޭ. އެއީ ވަރަށް ހިތާމަވެރި ކަމެއް ފުލުހުންގެ މުއައްސަސާގެ ތެރެއަށް ސިޔާސީ ބޭފުޅުން ފާޑުކިޔައި ހެއްދެވުމަކީ،"
ރައީސް ނަޝީދު ވިދާޅުވީ، އައްޑޫގައި ބޭއްވި ޖަލްސާގައި އެމްޑީޕީ މެމްބަރުންނަށް ހަމަލާ ދިނުމަށް ގޭންގުތަކަށް ނިންބަތްވާ 60 ވަރަކަށް މީހުންނަށް ފައިސާ ދީފައިވާކަމަށް މައުލޫމާތު ލިބޭކަމަށެވެ. އެހެން ނަމަވެސް ހަމަލާދޭން އައިސްފައިވަނީ 40 ވަރަކަށް މީހުންކަމަށްވެސް އެމަނިކުފާނު ވިދާޅުވިއެވެ.
"މިކަން ކޮށްފައި ވަނީ 60 ގޭންގް ކުދިންނަށް ފައިސާ ދީގެން. އެމީހުން ހަތިޔާރާ އެކީގައި އަޅުގަނޑުމެންނާ ދިމާލަށް ގެނައުމަށް ރޭވިފައި އޮތީ. އެހެންނަމަވެސް އޭގެ ތެރެއިން އާދެވުނީ ސާޅީހަކަށް ކުދިންނަށް. މައުލޫމާތު ލިބިފައި އެބަހުރި އައީ ކާކުގެ ޕިކަޕެއްގައިތޯ އައީ. އަދި ކޮންކޮން ދިމާލަކުންތޯ އެހީތެރިކަން ފޯރުކޮށްދިނީ،" ނަޝީދު ވިދާޅުވި އެވެ.
ކިޔުންތެރިންގެ ހިޔާލު