ސިފައިންގެ އައު ކޮމްބެޓު ޔުނީފޯމް އިފްތިދާހުކޮށްފި

ސިފައިންގެ އައު ކޮމްބެޓް ޔުނީފޯމް ތަޢާރަފު ކުރުމާއި ސިފްކޯ ހިޔާ 300 ފްލެޓް ލިބުނު ފަރާތްތަކަށް އެކަމުގެ ލިޔުން ހަވާލުކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ސިފައިންގެ އައު ކޮމްބެޓް ޔުނީފޯމް އިފްތިތާޙްކޮށްދެއްވީ މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ ކާނަލް (ރިޓަޔަރޑް) މުޙައްމަދު ނާޒިމެވެ.

އަލަށް ބޭނުން ކުރަން ފަށާ ކޮމްބެޓް ޔުނިފޯރމަކީ ދިވެހި ސިފައިން ހަނގުރާމައެއްގައި ހަރަކާތްތެރިވާން ޖެހިއްޖެ ޙާލަތެއްގައި ޓެކްޓިކަލް އެޑްވާންޓޭޖެއް ލިބޭނެފަދަ ގޮތަކަށް ތައްޔާރުކުރެވިފައިވާ ޑިޖިޓަލް ޕެޓާރން އެއް އެކުލެވިފައިވާ ޔުނިފޯރމެއް ކަމަށް އެމްއެންޑީއެފުން ހާމަކުރެއެވެ.

ޑިޖިޓަލް ޕެޓަރން ކޮމްބެޓް ޔުނިފޯރމް ތަކަކީ ވަރަށް ބޮޑު ދިރާސާ ތަކެއް ކުރެވި ކުރިއަރާފައިވާ ޓެކްނޮލޮޖީގެ ބޭނުން ހިފައިގެން ފަރުމާ ކުރެވިފައިވާ، ޚާއްސަ ފޮއްޗަކުން ތައްޔާރު ކުރެވިފައިވާ ޔުނިފޯރމެއް ކަމަށް ސިފައިން ބުނެއެވެ.

މި ޔުނިފޯރމްގެ ފޮއްޗަކީ ދިވެހިރާއްޖެ ފަދަ ހޫނު ޤައުމުތަކުގެ މާހައުލާއި ގުޅޭ، ހޫނުގަދައިރުވެސް ފިނިކަން ދަމަހައްޓައިދޭނެ ފޮއްޗެއްކަމަށް ވެސް ސިފައިންގެ ވެބްސައިޓުގައި ބުނެފައިވެއެވެ.

މީގެ ކުރިން ސިފައިން ބޭނުންކުރި ކޮމްބެޓް ޔުނީފޯމް ބޭނުންކުރަން ފަށާފައިވަނީ 1998 ވަނަ އަހަރުގެ އޭޕްރީލް 21 ވަނަ ދުވަހުއެވެ.