ހައިހީލްއަކުން ތަޅައި މަންމަގެ ބޯ ދަރިފުޅު ފަޅައިލައިފި

ހައްދުންމަތީ ގަމު މަތިމަރަދޫ ދެމައިންގެ މެދުގައި މިއަދު ހިނގި ޒުވާބެއްގައި ދަރިފުޅު އޭނާގެ މަންމަގެ ބޮލަށް ހަމަލާދީ ބޯ ފަޅައިލައިފިއެވެ.

އުމުރުން 71 އަހަރުގެ މަންމަ އަށް 24 އަހަރުގެ އަންހެން ދަރިފުޅު ހަމަލާދީފައިވަނީ ޒުވާބު ކުރުމަށްފަހު މަންމަ ޖޯލީގައި އޮއްވައެވެ. މަންމައަށް ހަމަލާދީފައިވަނީ އަންހެން ދަރިފުޅުގެ ހައިހީލް އިންނެވެ.

ހަމަލާއަށްފަހު މަންމަވަނީ ގަމުރީޖަނަލް ހޮސްޕިޓަލަށް ގެންގޮސްފައެވެ. އެ ހޮސްޕިޓަލް ހިންގެވުމާ ޙަވާލުވެ ހުންނެވި މުޙައްމަދު ޢަބްދުއްސަމަދު ވިދާޅުވީ އެ މީހާގެ ބޯވަނީ އެއް ސެންޓިމީޓަރ ފަޅައިގެން ގޮސްފައި ކަމަށެވެ. އަދި ބޯވަނީ ވަރަށް ބޮޑަށް ދުޅަވެފައި ކަމަށެވެ. މިހާރުވެސް އޭނާ އޮތީ ހޮސްޕިޓަލުގައި އެޑްމިޓް ކޮށްފައެވެ. މިހާރު ބާއްވާފައިއޮތީ ބޯ އަނބުރާތީ ކަމަށްވެސް އޭނާ ވިދާޅުވިއެވެ.

މިދެމައިން ޒުވާބުކުރަން ޖެހުނު ސަބަބަބެއް އެނގިފައެއް ނުވެއެވެ. ނަމަވެސް ދޭތެރެ ދޭތެރެއިން މިދެމައިން ޒުވާބުކުރާ ކަމަށް މައުލޫމާތު ލިބިފައިވެއެވެ. މި އަންހެން މީހާގެ ބޯފަޅާލައިފައިވަނީ އޭނާގެ 3 ކުދިންގެ ތެރެއިން އެންމެ ހަނގު ކުއްޖާ ކަމަށްވެސް މައުލޫމާތު ލިބިފައިވެއެވެ.

މިކަމާ ގުޅިގެން ފުލުހުން ބުނީ މަންމައަށް ހަމަލާދިން ކުއްޖާ މިހާރު ވަނީ ފުލުހުންގެ ބެލުމުގެ ދަށުގައި ކަމަށެވެ. އެހެން ކަމުން ތަހުގީގު ކުރަމުންދާ މައްސަލައަކަށްވާތީ އިތުރު މައުލޫމާތު ދެވެންނެތް ކަމަށެވެ. މިހާދިސާ ހިނގާފައިވަނީ މިއަދު މެންދުރު 1:30 އެހައިކަންހާއިރުއެވެ.