އީދުޝޯ ބަލަންތިބި މީހުންނަށް ހަމަލާ ދިން ދެ މީހުން ހައްޔަރުކޮށްފި
9 އޮކްޓޯބަރ 2014 10:08
މާޅޮސްމަޑުލު އުތުރުބުރީ މަޑުއްވަރީގައި އީދު ޝޯ ބަލަންތިބި ބަޔަކަށް އާދިއްތަ ދުވަހުގެ ރޭ ހަމަލައިދިން ކަމުގެ ތުހުމަތުގައި ދެ މީހަކު ހައްޔަރުކޮށްފައިވާކަމަށް ފުލުހުން ހާމަކޮށްފިއެވެ.
އެ މައްސަލައިގައި ހައްޔަރުކޮށްފައިވަނީ 17 އަހަރުގެ ކުއްޖަކާ 27 އަހަރުގެ މީހެކެވެ. 17 އަހަރުގެ ކުއްޖާ ހައްޔަރު ކޮށްފައިވަނީ މިދިޔަ އަންގާރަ ދުވަހުއެވެ. 27 އަހަރުގެ މީހާ ހައްޔަރުކޮށްފައިވަނީ ރޭގެ ވަގުތެއްގައި ކަމަށް ފުލުހުން ހާމަކުރެއެވެ.
ދެވަނަ މީހާ ހައްޔަރު ކުރުމަށް އިއްޔެ މަޑުއްވަރީއަށް ދިޔަ ފުލުހުންގެ ޓީމަށް ހަމަލާދީފައިވެއެވެ. އެހެން ކަމުން އޭނާ ހައްޔަރުކޮށްފައި ވަނީ އެރަށަށް އިތުރު ފުލުހުން ގެންގޮސްގެން ހިންގި އޮޕަރޭޝަނެއްގައިއެވެ. ފުލުހުންގެ ޓީމަށް ރޭ ހަމަލާދިން މައްސަލަ ވެސް ގެންދަނީ ތަހުގީގުކުރަމުންނެވެ.
އެރަށުކައުންސިލުން ބުނެފައިވަނީ ޝޯބަލަން ތިބި މީހުންނާ ދިމާލަށް ގައު އުކައި މާރާމާރީ ހިންގާފައިވާކަމަށެެވެ. ގައު އުކުމުގެ ސަބަބުން ބައެއް މީހުންގެ ކޮނޑާ، ބޮލާއި ދަތް ޕިލައަށް ގެއްލުން ލިބިފައިވާކަމަށް އެ ކައުންސިލުން ހާމަކުރެއެވެ. އެ ހަމަލާގައި ގެއްލުން ލިބުނު ބައެއް މީހުން ވަނީ އެރަށު ސިއްހީމަރުކަޒުގައި އެޑުމިޓުކޮށްފައިއެވެ.
ކިޔުންތެރިންގެ ހިޔާލު