އީދު ބަންދާ ދިމާކޮށް ދެ ސަރަހައްދެއްގައި ފުލުހުންގެ ހާއްސަ އޮޕަރޭޝަންތަކެއް ފަށައިފި
7 އޮކްޓޯބަރ 2014 11:47
އަލްހާ އީދު ބަންދާ ދިމާކޮށް ވިލިމާލެއާ އައްޑޫ ސިޓީގައި ހާއްސަ އޮޕަރޭޝަންތަކެއް ފަށާފައިވާކަމަށް ފުލުހުން ހާމަކޮށްފިއެވެ.
ފުލުހުން ބުނީ ވިލމާލެގައި އޮޕަރޭޝަންތައް ފަށާފައިވަނީ އެ އަވަށަށް ގިނަ ބަޔަކު ޒިޔާރަތްކުރުމުގެ އިތުރުން ވިލިމާލޭގައި އީދު ފާހަގަކުރުމަށް ތަފާތު ހަރަކާތްތައް ކުރިއަށް ގެންދަމުން ދާތީކަމަށެވެ. ފުލުހުން ކުރަމުން އަންނަ މަސައްކަތްތަކުގެ ތެރޭގައި ރަށުތެރެ ބެލެހެއްޓުމާ މީހުން އެއްވެ އުޅޭ ސަރަހައްދުތަކުގެ ސަލާމަތީ ކަންކަން ބެލެހެއްޓުން ހިމެނޭކަމަށް އެ މުއައްސަސާއިން މައުލޫމާތުދެއެވެ. އީދު ކުޅިވަރުތައް ކުރިއަށްދާ މަގުތަކާއި ސަރަހައްދުތަކުގައި ފުލުހުން ދަނީ ސަލާމަތީގޮތުން އަޅަންޖެހޭ ފިޔަވަޅު އަޅައި ކުޅިވަރު ކުރިއަށް ގެންދިއުމުގައި މަގުމަތި ބެލެހެއްޓުމާއި ކުޅިވަރު އޮންނަ ސަރަހައްދުތަށް ބެލެހެއްޓަމުންކަމަށް ފުލުހުން ބުނެއެވެ. .އީދު ޗުއްޓީ ނުމެންދެން މިމަސައްކަތްތަށް ކުރިއަށް ގެންދާނެ ކަމަށް ފުލުހުން މައުލޫމާތުދެއެވެ.
އީދު ފާހަގަކުރުމުގެ ގޮތުން އައްޑޫ ސިޓީގެ އަވަށްތަކުގައި ތަފާތު ހަރަކާތްތަކެއް ކުރިއަށް ގެންދާ ހަރަކާތްތަކުގެ ސެކިއުރިޓީ ބެލެހެއްޓުމުގެ މަސައްކަތް އައްޑޫ ސިޓީގައި މަސައްކަތް ކުރާ ފުލުހުން ކުރަމުން އަންނަ ކަމަށްވެސް ފުލުހުންގެ ވެބްސައިޓުގައި ބުނެފައިވެއެވެ. އެ ސިޓީގައި ކުށަށް މަގުފަހިވާނެކަމަށް ބެލެވޭ ސަރަޙައްދުތަކަށް ޚާއްޞަ ސަމާލުކަމެއްދީގެ ބެލަހައްޓަމުން އަންނަކަމަށް ފުލުހުން ހާމަކުރެއެވެ. ގުރޫޕްތައް ޙަރަކާތްތެރިވާ ސަރަޙައްދުތައް އިތުރަށް ބަލަހައްޓަމުން އަންނަކަމަށްވެސް އެ މުއައްސަސާއިން ބުނެއެވެ. އީދުގެ އެކިއެކި ކުޅިވަރުތައް ހިނގާ ސަރަހައްދުތަކުގެ ސަލާމަތީ ކަންކަން ވަރުގަދަކޮށް އެއްގަމު ދަތުރުފަތުރުގެ ނިޒާމުގައި ކުރިމަތިވާ މައްސަލަތައް މަދުކޮށް އެކްސިޑެންޓުތައް މަދުކުރުމަށް އިސްކަންދީގެން ފުލުހުން މަސައްކަތްކުރަމުން އަންނަކަމަށްވެސް ހާމަކުރެއެވެ. އެ ސިޓީގައި އެއްގަމާއި ކަނޑުގެ ދަތުރުފަތުރުތައް ކުރާ ފަރާތްތަކުގެ ރައްކާތެރިކަމުގެ ގޮތުންވެސް މަސައްކަތްތަކެއް ކުރަމުން އަންނަކަމަށް ފުލުހުން ހާމަކުރެއެވެ.
ކިޔުންތެރިންގެ ހިޔާލު