ފަލަސްތީނަކީ ގައުމެއްގެ ގޮތުގައި ބަލައިގަތުމަށް ސްވެޑެން އިން ނިންމައިފި
6 އޮކްޓޯބަރ 2014 23:26
ސްވެޑެންގެ ޕްރައިމް މިނިސްޓަރ ސްޓެފެން ލޮއެފްވެން
ފަލަސްތީނަކީ ގައުމެއްގެ ގޮތުގައި ބަލައިގަތުމަށް ސްވެޑެންއިން ނިންމައިފިއެވެ.
ސްވެޑެންގެ ނިންމުމާ ގުޅިގެން އިޒްރޭލުން ވަނީ ނުރުހުންފާޅުކޮށްފައެވެ. ސްވެޑެންގެ ނިންމުމަށް ނުރުހުން ފާޅުކުރުމަށް އިޒްރޭލުން ވަނީ އެގައުމުގައި ހުންނަ ސްވެޑެންގެ އެމްބެސެޑަރު ކާރލް މަގުނަސް ވެސް އިޒްރޭލުގެ ފޮރިން މިނިސްޓްރީއަށް ހާޒިރުކޮށްފައިއެވެ. އިޒްރޭލުން ބުނެފައިވަނީ ސްވެޑެންގެ ނިންމުމުގެ ސަބަބުން އިޒްރޭލާ ފަލަސްތީނާ ދެމެދު ހުރި މައްސަލަތައް އިތުރަށް ހޫނުވާނެކަމަށެވެ.
ނަމަވެސް ސްވެޑެންގެ ޕްރައިމް މިނިސްޓަރ ސްޓެފެން ލޮއެފްވެން ހުކުރު ދުވަހު ވިދާޅުވެފައިވަނީ އިޒްރޭލާ ފަލަސްތީނުގެ ހަމަނުޖެހުންތަކަށް ހައްލެއް އަންނަނީ އެއީ ދެގައުމެއްގެ ގޮތުގައި ބަލައިގަނެގެން ކަމަށެވެ.
"ދެ ގައުމުގެ ހަމަޖެހުން އަންނަނީ އިޒްރޭލަކީ ވެސް ފަލަސްތީނަކީ ވެސް ދެ ގައުމުގެ ގޮތުގައި ބަލައިގަނެގެން. މިހެންކަމުން ފަލަސްތީނަކީ ގައުމެއްގެ ގޮތުގައި ބަަލައިގަންނާނަން،" ލޮއެފްވެން ވިދާޅުވިއެވެ.
ބައިނަލްއަގުވާމީ މަޝްރަހުގައި ފަލަސްތީނު މިހާރު ބަލައިގަނެފައި އޮންނަނީ ޓެރިޓަރީއެއްގެ ގޮތުގައެވެ. ޕަލަސްތީނަކީ ގައުމެއްކަމަށް ކަނޑައަޅަން ފެނޭތޯ ޔުނައިޓެޑް ނޭޝަންސް (ޔޫއެންގައި) 2012 ވަނަ އަހަރު ނެގި ވޯޓުގައި ވެސް ސްވެޑެން އިން ވޯޓު ދީފައިވަނީ ގައުމެއްގެ ގޮތުގައި ބަލައިގަންނަން ފެންނަކަމަށެވެ.
ކިޔުންތެރިންގެ ހިޔާލު