އެމެރިކާ މަނަވަރެއް ރާއްޖެ އަތުވެއްޖެ

ރަޙުމަތްތެރި ކަމުގެ ދަތުރެއްގައި އެމެރިކާގެ މަނަވަރު ''ޔޫއެސްއެސް ރޮޑްނީ އެމް ޑާވިޝް'' މިއަދު ރާއްޖެ އައިސްފައިވާކަމަށް މޯލްޑިވިސް ނެޝަނަލް ޑިފެންސް ފޯސް (އެމްއެންޑީއެފް) އިން ހާމަކޮށްފިއެވެ.

އެ މަނަވަރުން ސިފައިންނާ ގުޅިގެން ގިނަ ޙަރާކާތްތަކެއް ހިންގުމަށް ވަނީ ހަމަޖެހިފައިވާކަމަށް ސިފައިން ހާމަކުރެއެވެ. އޭގެތެރޭގައި އިންޑިއާ ކަނޑުގެ ސަރަޙައްދާއި ގުޅޭ ކަންކަމުގެ މަޢުލޫމާތު ބަދަލުކުރުމުގެ ތަމްރީނު ޕްރޮގްރާމްތަކެއް ހިންގުމަށް ހަމަޖެހިފައިވާކަމަށްވެސް ސިފައިން ހާމަކުރެއެވެ. 

މީގެއިތުރުން، ދިވެހި ސިފައިންނާއެކު އެކުވެރިކަމުގެ ފުޓްބޯޅަ މެޗަކާއި ބާސްކެޓް ބޯޅަ މެޗަކާއި ވޮލީ މެޗެއް ވެސް ކުޅުމަށް ވަނީ ހަމަޖެހިފައެވެ. ޔޫއެސްއެސް ރޮޑްނީ އެމް ޑާވިޝް ރާއްޖެއަށް ކުރަމުންދާ ދަތުރު ނިންމާލުމަށްފަހު ފުރުމަށް ހަމަޖެހިފައިވަނީ މިމަހުގެ ނުވަ ވަނަ ކަމަށް އެމްއެންޑީއެފުން ބުނެއެވެ.