އަލްހާ އީދުން ލިބޭ ފިލާވަޅަކީ ތިމާގެ މަސްލަހަތައްވުރެ ގައުމުގެ މަސްލަހަތު ކުރިއަށް ނެރުން: ރައީސް ޔާމިން

އަލްހާ އީދުން ލިބޭ އެންމެ މުހިންމު އެއް ފިލާވަޅަކީ ތިމާގެ މަސްލަހަތައްވުރެ ގައުމުގެ މަސްލަހަތު އިސްކުރުންކަމަށް ރައީސުލް ޖުމްހޫރިއްޔާ އަބްދުﷲ ޔާމިން ވިދާޅުވެއްޖެއެވެ.

އީދު ދުވަހުގެ މުނާސަބަތުގައި ރައީސް ޔާމިން ފޮނުވާފައިވާ ހިތާބުގައި ވިދާޅުވެފައިވަނީ، އަލްހާ އީދުން ދަސްކޮށްދޭ އެންމެ މުހިންމު އެއް ފިލާވަޅަކީ ގުރުބާނީގެ ފިލާވަޅުކަމަށެވެ. އެއީ ތިމާގެ މަސްލަހަތައްވުރެ އަނެކާގެ މަސްލަހަތު އިސްކުރުމުގެ ފިލާވަޅުކަމަށް ވެސް ރައީސް ވިދާޅުވިއެވެ. 

"އަޟުހާ އީދު އަޅުގަނޑުމެންނަށް ދަސްކޮށްދޭ އެންމެ މުހިންމު ފިލާވަޅަކީ، ގުރުބާނީގެ މަތިވެރި ފިލާވަޅެވެ. ހަމަ އެއާއެކު، ތިމާގެ މަސްލަހަތަށް ވުރެ އަނެކުންގެ މަސްލަހަތު ކުރިއަށް ނެރުމުގެ އިބްރަތްތެރި ފިލާވަޅެވެ. ކޮންމެ ކަމެއްގައި ވެސް ތިމާގެ މަސްލަހަތަށް ވުރެ، ގައުމުގެ މަސްލަހަތަށް އިސްކަން ދިނުމުގެ އަގުހުރި ފިލާވަޅެވެ،"

މައްކާގައި ހުންނަވައިގެން ރައީސް ނެރުއްވި ހިތާބުގައި ވިދާޅުވީ، ދިވެހިރައްޔިތުންނާ މުޅި އިސްލާމީ އުންމަތަށް އީދު ދުވަހުގެ ތަހުނިޔާ ފިނުވުމަކީ އެމަނިކުފާނަށް ލިބިގެންދާ އުފަލެއްކަމަށެވެ. 

"ބަރަކާތްތެރި އަޟުހާ އީދު އަޅުގަނޑުމެންނާ ބައްދަލުކުރާ މި އުފާވެރި މުނާސަބަތުގައި، މި މަތިވެރި މުގައްދަސް ބިމުގައި ހުރެ، ދިވެހިރާއްޖޭގެ ލޮބުވެތި އަހުންނަށާއި އުހުތުންނަށާއި މުޅި އިސްލާމީ އުންމަތަށް، މި އީދުގެ އިހުލާސްތެރި ތަހުނިޔާ އާއި ހެޔޮއެދުންތައް ފޮނުވުމަކީ، އަޅުގަނޑަށް ލިބޭ ވަރަށް މަތިވެރި އުފަލެކެވެ،"