ރައީސް ނަޝީދުވެސް މަސައްކަތް ކުރައްވަންވާނީ ގައުމަށް ފައިދާވާ ގޮތަށް- ރިޔާޒު ރަޝީދު

ރާއްޖޭގެ ކުރީގެ ރައީސް މުޙައްމަދު ނަޝީދުވެސް މަސައްކަތް ކުރައްވަންވާނީ ގައުމަށް އެންމެ ފައިދާވާނެ ގޮތަށް ކަމަށް ޕީޕީއެމްގެ ޕާލަމެންޓްރީ ގްރޫޕުގެ ޑެޕިޔުޓި ލިޑަރު އަދި ވިލުފުށީ ދާއިރާގެ މެންބަރު ރިޔާޒު ރަޝީދު މިއަދު ވިދާޅުވެއްޖެއެވެ.

ނޫސްވެރިންނަށް މަޢުލޫމާތު ދެއްވަމުން މިއަދު ހަވީރު އޭނާ ވިދާޅުވީ ރައީސް ނަޝީދަކީ ކުރީގެ ރައީސެއްގެ ޙައިސިއްޔަތުން ދައުލަތުން ފުރިހަމަ ޝަރަފާއި އިއްޒަތް އަރުވާފައިވާ ބޭފުޅެއް ކަމަށެވެ.

އެމަނިކުފާނަކީ ގައުމަށް ފައިދާހުރި ގޮތަކަށް މަސައްކަތް ކުރައްވަން ޖެހޭ ބޭފުޅަކަށްވިޔަސް އެކަން އެމަނިކުފާނުގެ ޢަމަލުފުޅުން ފެނިގެން ނުދާ ކަމަށް ރިޔާޒު ވިދާޅުވިއެވެ. ރައީސް ނަޝީ ގެންދަވަނީ ރާއްޖެއާއި ރާއްޖެއިން ބޭރުގައި ރާއްޖެ ބަދުނާމުވާ ގޮތަށް ވާހަކަފުޅު ދައްކަވަމުން ކަމަށްވެސް އޭނާ ވިދާޅުވިއެވެ. އެއި ކުރީގެ ރައީސެއްގެ ފަރާތްޕުޅުން ފެނިގެންވާނެ ކަމެއް ނޫން ކަމަށްވެސް ރިޔާޒު ވިދާޅުވިއެވެ.

އެމަނިކުފާނު އެފަދަ ކަންކަން ކުރިއަށް ގެންދަވާ ކަމަށްވާނަމަ ކުރީގެ ރައީސުންގެ ތެރެއިން އެފަދަ ޢަމަލު ކުރައްވާ ބޭފުޅުނަށް މިހާރު ދެމުންގެންދާ ޢިނާޔަތްތައް ކަނޑާލުމަށްޓަކައި ގާނޫނީ ގޮތުން ފިޔަވަޅު އަޅުއްވާނެ ކަމަށްވެސް ވިދާޅުވިއެވެ. އެކަން ކުރުމަށްޓަކައި ރައީސްކަން ކުރައްވާފައިވާ ބޭފުޅަކަށް ދޭންޖެހޭ ޢިނާޔަތަތުގެ ގާނޫނަށް ރައްޔިތުންގެ މަޖިލީހަށް މާދަމާ އިސްލާހެއް ހުށަހަޅާނެ ކަމަށް ރިޔާޒު ވިދާޅުވިއެވެ.

ރިޔާޒު ވިދާޅުވީ ބޭރުގެ ގައުމުތަކުގައި ރައީސް ނަޝީދު ދައްކަވަމުން ގެންދަވާ ވާހަކަފުޅުތަކުގެ ސަބަބުން ރާއްޖޭގެ އިގްތިސާދަށް ގެއްލުންވާ ކަމަށެވެ. އެހެން ކަމުން އިތުރަށް އެފަދަ ކަމެއް ކުރައްވައިފިނަމަ އަޅާނެ ފިޔަވަޅާއި އެފަދަ ކަމެއް ކޮށްފިނަމަ ދެމުންދާ އިނާޔަތްތައް ހުއްޓުމަކަށް އަންނާނެ ހާލަތްތައް މާދަމާ ހުށަހަޅާ އިސްލާހުގައި ހިމަނާފައިވާނެ ކަމަށް ރިޔާޒު ވިދާޅުވިއެވެ.

"ރާއްޖެ ބަދުނާމުވާ ގޮތަށް ނަޝީދު ދައްކަވާ ވާހަކަތަކުގެ ސަބަބުން ފަތުރުވެރިން އަންނަން ޖެހިލުން ވަމުވަމުންްދޭ. ރާއްޖޭގެ އިގުތިސާދަށް ބޮޑެތި ގެއްލުންތަކެއް ވަމުންދޭ. އިގްތިސާދަށް އަސަރުކުރާނަމަ ރާއްޖެއަށް ލިބޭ އާމްދަނީ މަދުވެގެންދާނެ. އެހެންވީމަ އެ ވާހަކަ ދައްކާ މީހުންނަށް ދެމުންދާ އިނާޔަތްތަކަށް އަސަރުކުރާނެ. އެގޮތުން އެމީހަކަށް ލިބޭ އިނާޔަތްތައް ފަސް އަހަރަށް ނޫނީ ދިހައަހަރަށް އުނިވެގެންދާނެ.،" ފިޔަވަޅު ތަކާ ބެހޭގޮތުން ރިޔާޒު ވިދާޅުވިއެވެ.