ރައީސް ނަޝީދު ގެންދަވަނީ ރާއްޖެ ބަދުނާމު ކުރަމުން- ނިހާން

ކުރީގެ ރައީސުންނަށް ލިބިދީފައިވާ ހުރިހާ ޢިނާޔަތްތަކެއް ބޭނުން ކުރުމަށްފަހުވެސް ރައީސް ނަޝީދު ގެންދަވަނީ ރާއްޖެއިން ބޭރުގައި ރާއްޖެ ބަދުނާމުވާ ވާހަކަ ދައްކަވަމުން ކަމަށް ޕީޕީއެމްގެ ޕާލިމެންޓްރީ ގްރޫޕުގެ ލީޑަރު އަދި ރައްޔިތުންގެ މަޖިލީހުގެ ވިލިމާފަންނު ދާއިރާގެ މެންބަރު އަޙުމަދު ނިހާން ޙަސަން މަނިކު ވިދާޅުވެއްޖެއެވެ.

މިއަދު ހަވީރު ނޫސްވެރިންނަށް މަޢުލުމާތު ދެއްވަމުން ނިހާން ވިދާޅުވީ ރައީސް ނަޝީދަށްވެސް މުސާރައިގެ ގޮތުގައި ފަންސާސްހާސް ރުފިޔާ ދައުލަތުން ދެމުންދާ ކަމަށެވެ. އަދި އޮފީސް ހިންގެވުމަށް އެއްލައްކަ ހަތްދިހަފަސްހާސް ރުފިޔާއާއި، ބޮޑީގާޑުންވެސް ދައުލަތުން ދެމުން ގެންދާ ކަމަށެވެ. އަދި ރާއްޖެއިން ބޭރަށް ވަޑައިގަންނަވާއިރު އެގައުމަކީ ރާއްޖޭގެ ޑިޕްލޮމެޓިކް މިޝަންއެއް ހުންނަ ގައުމެއްނަމަ އެތަނެއްގެ ކާރުވެސް ބޭނުން ކުރައްވަމުން ގެންދަވާ ކަމަށެވެ.

މި ޢިނާޔަތްތައް ލިބިވަޑައިގަންނަވަމުންވެސް ރާއްޖެ ބަދުނާމު ކުރައްވަމުންދާތީ އެކަމާ ކަންބޮޑުވާ ކަމަށްވެސް ވިދާޅުވިއެވެ. ރައީސް ނަޝީދު ރާއްޖެ ބަދުނާމުވާ ވާހަކަ ދައްކަވަމުން ގެންދަވާތީ އެފަދަ ވާހަކަ ނުދެއްކެވުމަށް އެތައް ފަހަރަކު ދަންނަވާފައި ވާނެ ކަމަށްވެސް ނިހާން ވިދާޅުވިއެވެ.

ނިހާން ވިދާޅުވީ ރައީސް ނަޝީދުގެ ޢަމަލުފުޅު އިސްލާހު ނުކުރައްވައި ކުރިއަށް ގެންދަވާތީ ކުރީގެ ރައީސުންނަށް ދެއްވަމުން ގެންދަވާ ޢިނާޔަތް ކަނޑައިލުމަށް މާދަމާގެ މަޖިލިސް ޖަލްސާއަށް ހުށަހަޅާ އިސްލާހު ފާސްކުރަން ޖެހިފައިވާ ކަމަށެވެ.

ނިހާން ވިދާޅުވީ ރާއްޖޭގެ އިންޓެލިޖެންސް މިހާރަށްވުރެ ވަރުގަދަކޮށް ރާއްޖެއާއި ރައްޔިތުންގެ ސަލާމަތްތެރިކަން ކަށަވަރު ކުރަންޖެހޭ ކަމަށެވެ.