ތައުލީމީ ނިޒާމުން ބައެއް ކުދިން އަންނަނީ ބާކީ ކުރަމުން: ޑރ. ލުތުފީ
1 އޮކްޓޯބަރ 2014 13:36
ކުރީގެ އެޑިއުކޭޝަން މިނިސްޓަރ ޑރ. މުސްތަފާ ލުތުފީ
ތައުލީމީ ނިޒާމުން ބައެއް ކުދިން ބާކީކުރަމުން އަންނަކަމަށް ކުރީގެ އެޑިއުކޭޝަން މިނިސްޓަރ ޑރ. މުސްތަފާ ލުތުފީ ވިދާޅުވެއްޖެއެވެ.
އެމްޑީޕީ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ލުތުފީ ވިދާޅުވީ، ގްރޭޑް އަށެއްގައި ތައުލީމް ހާސީލްކުރާ ބައެއް ކުދިންނާ، ސާނަވީ ތައުލީމު ފަށާ ބައެއް ކުދިން އެޑިއުކޭޝަން މިނިސްޓްރީން ބާކީކުރަމުން އަންނަކަމަށެވެ. އެކަމަކީ އެމްޑީޕީން ކަންބޮޑުވާކަމެއް ކަމަށް އޭނާ ވިދާޅުވިއެވެ. ތައުލީމީ ނިޒާމުން ކުދިން ބާކީ ކުރަމުން އަންނަ މައްސަލައިގައި އެޑިއުކޭޝަން މިނިސްޓްރީން މައުލޫމާތު ހޯދުމަށް މަސައްކަތްކުރި ނަމަވެސް އެކަމަށް އެ މިނިސްޓްރީން އެއްބާރުލުން ދީފައިނުވާކަމަށް ވިދާޅުވިއެވެ.
ސަރުކާރުން ތައުލީމީ މަންހަޖަށް ގެންނަން އުޅޭ ބަދަލުތަކަށް ވެސް ލުތުފީ ފާޑުވިދާޅުވިއެވެ. އޭނާ ވިދާޅުވީ، ތައުލީމީ މަންހަޖުގެ ގްރޭޑް އެކަކުން ފެށިގެން ގްރޭޑް ތިނެއްގެ ތައުލީމީ މަންހަޖު ބަދަލުކޮށް އާ މަންހަޖަކަށް ކިޔަވައި ދޭން އެޑިއުކޭޝަން މިނިސްޓްރީން ނިންމާފައި ވީނަމަވެސް އެކަމަށް ސްކޫލްތަކާ ބެލެނިވެރިން ތައްޔާރު ވެފައި ނުވާ ކަމަށެވެ.
"އަޅުގަނޑުމެން ކަންބޮޑުވާ އަނެއްކަމަކީ ތައްޔާރުނުވެ މަންހަޖް ތަންފީޒް ކުރަން ފެށުން. އަދި ތައްޔާރެއް ނުވޭ މަންހަޖު ތަންފީޒު ކުރާކަށް. ދެން އަޅުގަނޑުމެން ކަންބޮޑުވާ އަނެއް ކަމަކީ ގްރޭޑް އަށަކުން ނުވަތަ ސާނަވީ ތައުލީމު ފަށާ ހިސާބުން ބައެއް ކުދިން ބާކީ ކުރާ މައްސަލަ،" ޑރ. ލުތުފީ ވިދާޅުވިއެވެ.
ކިޔުންތެރިންގެ ހިޔާލު