އައިއެސް ފަދަ ޖަމާޢަތްތަކުން ގެންދަނީ ޒުވާނުންގެ ސިކުނޑިތަކާ ކުޅެމުން - ރައީސް ޑރ. ވަޙީދު

އިސްލާމިކް ސްޓޭޓް (އައިއެސް) ފަދަ ހަރުކަށި ޖަމާޢަތްތަކުން ގެންދަނީ ހަރުކަށި ފިކުރު ޒުވާނުންގެ ސިކުނޑިއަށް ވައްދައި އެމީހުން މަގުއޮޅުވަމުން ކަމަށް ރާއްޖޭގެ ކުރީގެ ރައީސް ޑރ. މުޙައްމަދު ވަޙީދު ޙަސަން މަނިކު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމުގެ ޚާއްސަ މަންދޫބެއްގެ ހައިިސިއްޔަތުން އދ. ގެ އާންމު މަޖިލީހުގައި މިރޭ ތަގުރީރު ކުރައްވަމުންނެވެ.

އެމަނިކުފާނު ވިދާޅުވީ ހައްދުފަހަނަޅައިފައިވާ އައިއެސް ފަދަ ޖަމާޢަތްތަކުން ގެންގުޅޭ ދީނީ ހަރުކަށި ފިކުރަކީ އަބަދުވެސް ރާއްޖެއިން ދެކޮޅު ހަދާ ކަމެއް ކަމަށެވެ.

އެފަދަ ޖަމާޢަތްތަކުން ގެންގުޅޭ ހަރުކަށި ފިކުރުގެ ސަބަބުން މާތްވެގެންވާ އިސްލާމްދީނުގެ ތަސައްވަރު ހުތުރުވަމުންދާ ކަމަށެވެ. އަދި އިލާހީ ދީނުގެ ޙަގީގަތްވެސް މީހުންނަށް އޮޅެމުންދާ ކަަމަށެވެ. އެމަނިކުފާނު ވިދާޅުވީ އިސްލާމްދީނަކީ އޯގާތެރި ކަމުގެ ދީން ކަމަށެވެ.

ދީނީ ހަރުކަށި ފިކުރު ނައްތާލެވޭނީ ދުނިޔެ އެއްބައިވެ އެންމެ ގުޅިގެން މަސައްކަތް ކޮށްގެން ކަމަށްވެސް ޑރ. ވަޙީދު ވިދާޅުވިއެވެ. އައިއެސް ފަދަ ޖަމާޢަތްތަކުގެ ޢަމަލުތައް "ރާއްޖެއިން އެންމެ ހަރުކަށި އިބާރާތުން ކުށްވެރިކުރަން. އަދި އެފަދަ ފިކުރުތަކާ ދެކޮޅު ހަދަން،" އެމަނިކުފާނު ވިދާޅުވިއެވެ.

މިރޭގެ ތަގުރީރުގައި ޑރ. ވަޙީދު ވިދާޅުވީ ދުނިޔޭގައި ނަސްލީ އަދި ޖިންސީ ތަފާތުކުރުންތަކެއް ގެންގުޅޭ ކަމަށެވެ. ނަމަވެސް ރާއްޖޭގައި އެފަދަ ތަފާތުކުރުންތަކެއް ނެތް ކަމަށެވެ. ތަޢުލީމް އުނގެނުމުގައިވެސް ދެ ޖިންސުގެ މީހުންނަށް ހަމަހަމަ ފުރުސަތު ރާއްޖެއިން ލިބިދީފައިވާ ކަމަށް އެމަނިކުފާނު ވިދާޅުވިއެވެ. އުނގެނުމާއި ވަޒީފާގެ ފުރުސަތު ރާއްޖޭގައި އެއްވެސް ތަފާތެއް ނުކުރިޔަސް މުޅި ދުނިޔެއަށް ބަލާއިރު އަންހެނުންގެ ދައުރު ހަނިކަމަށް އެމަނިކުފާނު ވިދާޅުވިއެވެ. އެކަން ހައްލު ކުރުމަށް ދުނިޔޭގެ ފެންވަރުގައި މަސައްކަތްތަކެއް ކުރަންޖެހޭ ކަމަށް ވިދާޅުވިއެވެ.

މިޖަލްސާގައި ރައީސް ވަޙީދު ވިދާޅުވީ ފަލަސްތީނުގެ ޣައްޒާއަށް އިޒުރޭލުން ދީފައިވާ ހަމަލާތަކަކީ ހިތާމަވެރި ހަމަލާތަކެއް ކަމަށެވެ. އޭގެ މަތިން ހަނދާންނެތޭހާ ދުވަހެއް އަދިނުވާ ކަމަށެވެ.

ހަނގުރާމައަށްފަހުވެސް ޣައްޒާގެ ޙާލަތު ހަމައަށް ނޭޅޭކަމަށް ވިދާޅުވިއެވެ. މިކަން ޙައްލު ކުރުމަށްޓަކައި ފަލަސްތީނުގެ ބިމުގައިވެސް އެމީހުންގެ މިނިވަން އަމިއްލަ ވެރިކަމެއް ގާއިމްވާންޖެހޭނެ ކަމަށް ވިދާޅުވިއެވެ. އަދި ފަލަސްތީނާއި އިޒުރާލާ ދެމެދު ސުލްހަ ގާއިމް ކޮށްދިނުމަށް ދުނިޔޭގެ ގައުމުތައް މެދުވެރިވެގެން ކާމިޔާބު ކުރުވަނިވި ސުލްހައިގެ ވާހަކަތަކެއް ދެކެވެން ޖެހޭކަމަށްވެސް ވިދާޅުވިއެވެ. މިފަދަ ވާހަކަތައް ބާއްވައި އެކަމުން މައްސަލައަށް ހައްލު ލިބެންޖެހޭ ކަމަށްވެސް ރައީސް ވަޙީދު ވިދާޅުވިއެވެ.

އިންސާނީ ޙައްގުތައް ހިމާޔަތް ކުރުމަކީ ރާއްޖެއިން ވަރަށް ބޮޑަށް މަސައްކަތް ކުރާ ކަމެއް ކަމަށް އެމަނިކުފާނު ވިދާޅުވިއެވެ. ނަމަވެސް އިންސާނީ ޙައްގުތައް ކަށަވަރު ކޮށްދިނުމަކީ ރާއްޖެއަށް ދިމާވެފައިވާ ގޮންޖެހުމެއް ކަމަށްވެސް ވިދާޅުވިއެވެ. ނަމަވެސް މީހުން ހޭލުންތެރިކޮށްގެންނާއި، ރަނގަޅު ސިޔާސަތުތަކެއް ގާއިމް ކުރެވިގެން އެ ގޮންޖެހުންތަކުން އަރައިގަނެވޭނެ ކަމަށްވެސް ވިދާޅުވިއެވެ.