ފުލެޓް ފޯމް ހުށަހެޅުމަށް ސަތާރަހާސް ނަންބަރު ދޫކޮށްފި

ގެދޮރުވެރި ކުރުމުގެ މަޝްރޫޢުގެ ދަށުން ހުޅުމާލޭގައި އަޅާ ފްލެޓަށް އެދުމުގެ ފޯމު ބަލައިގަތުމުގެ ނަމްބަރު ވަކި އަދަދެއް ނެތި ދޫކުރުމުގެ މުއްދަތު މިއަދުވަނީ ހަމަވެފައެވެ.

މުއްދަތު ހަމަވިއިރުވަނީ 17،999 ނަންބަރު ދޫކޮށްފައި ކަމަށް ހައުސިން މިނިސްޓްރީން ވަނީ ބުނެފައެވެ. އެމިނިސްޓްރީން ބުނެފައިވަނީ މި ނަންބަރުތަކަށް ޚިދުމަތްދީ ނިމޭނީ 2015 ވަނައަހަރުގެ ފެބްރުއަރީމަހުގެ ފަހުކޮޅު ކަމަށެވެ.

އަދަދެއްނެތި ނަންބަރު ދޫކުރަން އެމިނިސްޓްރީން ފަށައިފައިވަނީ ސެޕްޓެންބަރު މަހުގެ 21 ވަނަ ދުވަހުން ފެށިގެންނެވެ. އޭގެ ކުރިން ދުވާލަކަށް ދޫކުރަމުން ގެންދިޔައީ 175 ނަންބަރެވެ.

ހައުސިން މިނިސްޓްރީގެ ސްޓޭޓް މިނިސްޓަރ ޙަސަން ރަޝީދު ކުރިން ވިދާޅުވެފައިވަނީ ވަކި އަދަދެއްނެތި ނަންބަރު ދޫކުރަން ފެށީ ފޯމު ހުށަހެޅުމަށް ރައްޔިތުންނަށް ދަތިވާން ފެށުމުން ކަމަށެވެ. އަދަދެއްނެތި ނަންބަރު ދޫކުރަން ފެށި ދުވަހުން ފެށިގެން އެނަންބަރަށް ޚިދުމަތް ދޭނެ ތާރީޚުވަނީ އޭގައި ލިޔެފައެވެ. އެހެން ކަމުން ރައްޔިތުންނަށް ފަސޭހަވެގެންދާނެ ކަމަށް އޭނާ ވަނީ ވިދާޅުވެފައެވެ.ހައުސިން މިނިސްޓްރީގެ އިސްބޭފުޅަކު ވިދާޅުވީ މިހާތަނަށް 7000 އަށްވުރެ ގިނަ ފޯމް ވަނީ މިނިސްޓްރީއަށް ހުށަހަޅާފައި ކަމަށެވެ.

ގެދޮރުވެރިކުރުމުގެ މަޝްރޫޢުގެ ދަށުން ހުޅުމާލޭގައި އެޅުމަށް ހަމަޖެހިފައިވަނި 1100 ފުލެޓެވެ. އޭގެތެރެއިން މާލޭގައި ރަޖިސްޓްރީވެފައިވާ މީހުން ހިމެނޭ (ފުރަތަމަ ކެޓަގަރީ) އަށް އެޅުމަށް ހަމަޖެހިފައިވަނީ 440 ފުލެޓެވެ. ދެ ވަނަ ކެޓަގަރީ އަށް އެޅުމަށް ހަމަޖެހިފައިވަނީ 330 ފްލެޓެވެ. ތިން ވަނަ ކެޓަގަރީ އަށް އެޅުމަށް ހަމަޖެހިފައިވަނީ 330 ފްލެޓެވެ.

ހައުސިން މިނިސްޓަރ މުޙައްމަދު މުޢިއްޒު ވިދާޅުވެފައިވަނީ ހުޅުމާލޭގައި އަޅާ ފްލެޓްތައް ނިމޭނީ 2015 ވަނަ އަަހަރުގެ ފަހުކޮޅު ނުވަޔަ 2016 ވަނަ އަހަރުގެ ކުރީކޮޅު ކަމަށެވެ. ފުލެޓުތަކުގައި ދިރިއުޅެން ފެށޭވަރުވާނެ ކަަމަށް އެމަނިކުފާނު ލަފާ ކުރައްވާފައިވަނީ 2016 ވަނައަހަރުގެ ފަހުކޮޅުއެވެ.