ގައުމީ ސަލާމަތަށް ނުރައްކާވާ ވާހަކަ ދައްކާ މީހުންނާމެދު ފިޔަވަޅު އަޅާނަން-ސީޕީ

ގައުމީ ސަލާމަތަށް ނުރައްކާވާފަދަ ވާހަކަ ދައްކާ މީހުންނާމެދު ފިޔަވަޅު އަޅާނެ ކަމަށް ކޮމިޝަނަރ އޮފް ޕޮލިސް (ސީޕީ) ޙުސައިން ވަޙީދު ވިދާޅުވެއްޖެއެވެ.

ސީޕީއާ ހަވާލާދީ ޕޮލިސް ލައިފްގައި ބުނެފައިވަނީ ރާއްޖޭގެ މަޞްލަޙަތަށް ނުރަނގަޅު އަސަރު ފޯރާފަދަ ވާހަކަތަކާއި ރާއްޖޭގެ ޤައުމީ ސަލާމަތަށް ނުރައްކާވާފަދަ ވާހަކަތައް ދައްކާ ފަރާތްތަކުގެ މައްސަލަތައް ބަލައި އަޅަންޖެހޭ ފިޔަވަޅުތައް އެފަދަ މީހުންނާ މެދު އަޅުއްވާނެ ކަމަށެވެ.

ސީޕީ ވިދާޅުވެފައިވަނީ ރާއްޖޭގެ ސަލާމަތީ ބާރުތަކާއި ބޭރުގެ ބައެއް ޓެރަރިސްޓް ޖަމާޢަތްތަކާ ގުޅުން އޮންނަކަމަށް ބައެއް ފަރާތްތަކުން ވާހަކަ ދައްކަމުންދަނީ ރަނގަޅު މަޢުލޫމާތު ނޭނގި ކަމަށެވެ. އެފަދަ ވާހަކަތައް ދެއްކުމުގެ ބޭނުމަކީ ސަލާމަތީ ބާރުތަކުގެ އަގުވައްޓާލުން ކަމަށްވެސް ވިދާޅުވިއެވެ. ނަމަވެސް ޤައުމަށް ހެޔޮއެދޭ އެއްވެސް މީހަކު އެފަދަ ކަމެއް ނުކުރައްވާނެ ކަމަށްވެސް ޙުސައިން ވަޙީދު ވިދާޅުވިއެވެ.

އެމަނިކުފާނު ވިދާޅުވެފައިވަނީ ރާއްޖެއަށް ރަނގަޅު މުސްތަޤުބަލަކަށް އެދޭ މީހާ ރައްޔިތުންގެ ގޯސްވާހަކައެއް ނުދައްކާނެ ކަމަށެވެ. އަދި ގައުމުގައި ހުރި ހަރުދަނާ މުއައްސަސާތަކުގެ ބާރު ކެނޑޭފަދަގޮތަކަށް ރާއްޖޭގައިވެސް އަދި ރާއްޖެއިން ބޭރުގައިވެސް ނުދައްކާނެ ކަމަށެވެ.

އެއްވެސް ހަގީގަތެއްނެތް އެފަދަ ވާހަކަ ދެއްކުމަކުން ގަައުމަށް ލިބޭނެ އެއްވެސް ފައިދާއެއް ނޯންނާނެ ކަމަށްވެސް ސީޕީ ވިދާޅުވިއެވެ. އޭގެ ބަދަލުގައި ލިބިގެންދާނީ ބޮޑެތި ގެއްލުން ކަމަށްވެސް ސީޕީ ވިދާޅުވެފައިވެއެވެ.

ޙުސައިން ވަޙީދު ވިދާޅުވީ ރާއްޖޭގެ ސިފައިންނާއި ފުލުހުންނަކީ މިރާއްޖޭގެ ސަލާމަތާއި ރައްކާތެރިކަން ދަމަހައްޓައި މިޤައުމާއި ރައްޔިތުން ރައްކާތެރިކޮށް ޤައުމުގައި ޞުލްޙަ މަސަލަސްކަން ޤާއިމްކޮށް ޤައުމީ ވަހުދަތު ދެމެހެއްޓުމަށް މާތްﷲ ގަންދީ ހުވާކޮށްގެންތިބި ބައެއް ކަމަށެވެ. އެހެން ކަމުން އެފަދަ މިހުންނާ ގުޅުވައިގެން ނޭދެވޭ ވާހަކަ ދެއްކުމުން ހަމަނުޖެހުން އުފެދުމުގެ ފުރުސަތު ފަހިވުމަކީވެސް ވެދާނެ ކަމެއް ކަމަށެވެ. އެހެން ކަމުން އެފަދަ ވާހަކަތައް ނުދެއްކެވުމަށް އެދިވަޑައިގެންނެވިއެވެ.