ރައީސް ޔާމީން ޓީއޭއެމް އާ ބައްދަލު ކުރުމުން އެމްސީއެސްއޭ އިން ކަންބޮޑު ވުން ފާޅުކޮށްފި
30 ސެޕްޓެމްބަރ 2014 14:45
ޓީޗާސް އެސޯސިއޭޝަން (ޓީއޭއެމް) ގެ ކަންބޮޑުުވުން ތަކާއެކު ރައީސުލްޖުމްހޫރިއްޔާއާ ބައްދަލު ކުރެއްވުމަށް އެޖަމިއްޔާއިން އެދުމުން ރައީސް އެފުރުސަތު ދެއްވުމުން މޯލްޑިވްސް ސިވިލްސާވަންޓްސް އެސޯސިއޭޝަން (އެމްސީއެސްއޭ) އިން ހިތްމަހަމަ ނުޖެހުން ފާޅުކޮށްފިއެވެ.
އެމްސީއެސްއޭގެ ރައީސް މުޙައްމަދު ޝައުގީ ވިދާޅުވީ އެޖަމިއްޔާގެ ކަންބޮޑުވުންތަކެއް ހުރެގެން ރައީސާ ބައްދަލު ކުރުމަށް އެދުމުން އެފުރުސަތު ލިބިފައި ނުވާ ކަމަށެވެ. ނަމަވެސް ޓީޗަރުންނާ ބައްދަލު ކުރެއްވުމަކީ ވަރަށް ބޮޑު ތަފާތު ކުރުމެއް ކަމަށް ދެކިވަޑައިގަންނަވާ ކަމަށެވެ.
"އަޅުގަނޑުމެންނާ ބައްދަލު ނުކުރެއްވީ އަޅުގަނޑުމެންގެ ސިޔާސީ މަގުސަދެއް އޮތީ ކަމަށް ހީފުޅު ކުރައްވާފައި ކަމަށް ވެދާނެ،" ޝައުގީ ވިދާޅުވިއެވެ. އޭނާ ވިދާޅުވީ އެޖަމިއްޔާއަކީ އެއްވެސްކަހަލަ ސިޔާސީ ފިކުރެއްގައި މަސައްކަތް ކުރާ ޖަމިއްޔާއެއް ނޫން ކަމަށެވެ. އަދި އެފަދަ މަގުސަދެއް އޮތް ޖަމިއްޔާއެއްވެސް ނޫން ކަމަށެވެ. އޭނާ ވިދާޅުވީ އެޖަމިއްޔާއިންވަނީ 17 ވަނަ ރައްޔިތުންގެ މަޖިލިހުގެ ރައީސާވެސް ބައްދަލު ކުރައްވަން މަސައްކަތް ކުރައްވާފައި ކަމަށެވެ. ނަަމަވެސް އެފުރުސަތުވެސް ލިބިފައި ނުވާކަމަށެވެ.
އެމްސީއެސްއޭ އަކީ ސިވިލްސާވިސްގެ މުވައްޒަފުންގެ ކުރިއެރުމަށް މަސައްކަތް ކުރަމުން އަންނަ ޖަމިއްޔާއެއް ކަމަށްވެސް އޭނާ ވިދާޅުވިއެވެ. އެގޮތުން ސިވިލްސާވިސްގެ މުވައްޒަފުން ގާނޫނާއި، ގަވާއިދަށް ހޭލުންތެރި ކުރުވައި ތަމްރީން ކުރުމަށް މަސައްކަތް ކޮށްފައިވާނެ ކަމަށެވެ. މިކަންކަން ކުރަމުން ގެންގޮސްފައިވަނީ ސަރުކާރާ ގުޅިގެން ކަމަށްވެސް ވިދާޅުވިއެވެ. މުސްތަގުބަލުގައިވެސް މިމަސައްކަތް ކުރައްވާނެ ކަމަށް ޝައުގީ ވިދާޅުވިއެވެ.
ޓީޗަރުންނަށް ރަނގަޅު ގޮތެއް ހައްދަވައި ދެއްވާނެ ކަމަށް ރައީސާއި، ނާއިބް ރައީސް ވަނީ ވިދާޅުވެފައެވެ. ނަމަވެސް ޝައުގީ ވިދާޅުވީ ރަނގަޅުގޮތަށް ކަންތައް ކޮށްދެއްވާނީ ހަމައެކަނި ޓީޗަރުންނަށް ކަމަށް ގަބޫލު ނުކުރައްވާ ކަަމަށެވެ. ސިވްލްސާވިސްގެ ހުރިހާ މުވައްޒަފުންނަށްވެސް އެ ރަނގަޅުގޮތް ފެންނާނެ ކަމަށް އުންމީދު ކުރައްވާ ކަމަށް އޭނާ ވިދާޅުވިއެވެ.
ހަމައެކަނި ޓީޗަރުންގެ މުސާރަ ބޮޑުކުރުމަކީ އެއްގޮތަކަށްވެސް އިންސާފުވެރި ގޮތެއް ނޫންކަމަށްވެސް އޭނާ ވިދާޅުވިއެވެ. އޭނާ ވިދާޅުވީ ހަޅުތާލެއް ކޮށްލަން ޓީޗަރުން ބުނާއިރަށް މުސާރަ ބޮޑުކުރުމަކީ ސިވިލްސާވިސްގެ އެހެން މުވައްޒަފުންނަށް ކުރެވޭ ބޭ އިންސާފެއް ކަމަށެވެ.
މީގެ ކުރިން ސިވިލްސާވަންޓް އެސޯސިއޭޝަނުންވަނީ އެމީހުންގެ ކަންބޮޑުވުންތަކާއި މުސާރައިގެ ހަމަހަމަކަން ގެނައުމަށް އެދި ރައީސް އޮފީހަށާއި، ހިޔުމަންރައިޓްސް ކޮމިޝަނަށާއި، ސިވިލްސާވިސް ކޮމިޝަނަށް ޕެޓިޝަނެއް ހުށަހަޅަން މަސައްކަތް ކޮށްފައެވެ. ނަމަވެސް އެފަހަރު އެކަން ނުކޮށް ހުއްޓާލީ ސަރުކާރުން ދެއްވި ޔަގީން ކަމެއްގެ މައްޗަށް ބަރޯސާވެގެން ކަމަށްވެސް އޭނާ ވިދާޅުވިއެވެ.
"ހަމައެކަނި ޓީޗަރުންގެ މުސާރަ ބޮޑުކޮށްގެން ފުދޭކަށްނެތް. މިދޭތެރެއަކުން އަޅުގަނޑުމެން ޕެޓިޝަނެއް ހުށަހެޅުމުގެ ކަންތައް ވަރަށް ބާރަށް ކުރިއަށް ގެންދިޔައިން. އެންމެފަހުން ސަރުކާރުންދިން ޔަގީންކަމާއި، ސަރުކާރުގެ ފަރާތްތަކުގެ ޕްރެޝަރާހެދި ހުއްޓާލަންޖެހުނީ،" ޝައުގީ ކުރިން ވިދާޅުވެފައިވެއެވެ.
ކިޔުންތެރިންގެ ހިޔާލު