ތިނަދުއާއި، ކުޅުދުއްފުށީ ފެންހިންދާ ނިޒާމް ގާއިމް ކުރުމުގެ މަޝްރޫޢަށް އަމަލީސިފައެއް ނާދޭ: ކައުންސިލް
30 ސެޕްޓެމްބަރ 2014 13:15
ހުވަދު އަތޮޅުދެކުނުބުރީ ތިނަދު އާއި ތިލަދުންމަތީ ދެކުނުބުރީ ކުޅުދުއްފުށީގައި ފެން ބޮޑުނުވާނެ ނިޒާމެއް ގާއިމް ކުރުމުގެ ޢަމަލީ މަސައްކަތް އަދިވެސް ނުފެށޭ ކަމަށް އެެދެރަށުގެ ކައުންސިލުން ބުނެފިއެވެ.
އެދެރަށުގައި ފެންބޮޑުވުމުން ހައްލުކުރުމުގެ ނިޒާމެއް ގާއިމް ކުރުމުގެ މަސައްކަތް އެންވަޔަރަމެންޓް މިނިސްޓްރީން ހަވާލުކޮށްފައިވަނި މާލެ ވޯޓާ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) އާއެވެ.
ތިނަދޫ ކައުންސިލުން ބުނީ އެމަޝްރޫއުއަކީ 2013 ވަނަ އަހަރު ހިންގުމަށް ހަމަޖެހިފައިވާ މަޝްރޫއެއް ކަމަށެވެ. ނަމަވެސް މިހާތަނަށް އެއްވެސް އަމަލީ ސިފައެއް އައިސްފައެއް ނުވާކަމަށެވެ.
"މީގެ ދެއަހަރުކުރިން ސާވޭ ތަކެއްވެސް ހަދައިފައިވޭ ނަމަވެސް އެއްެވެސް އަމަލީ ސިފައެއް އައިސްފައެއް ނުވޭ،" ތިނަދޫ ކައުންސިލުގެ އިސްބޭފުޅަކު ވިދާޅުވިއެވެ. ތިނަދޫގައި ފެން ބޮޑުވުމުގެ ސަބަބުން އިއްޔެ ވަނީ އެރަށުގެ ތިން ސުކޫލުގެ ކިޔެވުން ބަންދު ކޮށްފައެވެ. އަދި ތިނަދޫގެ 100 އެއްހާ ގެއަށް ފެން ވަދެފައިވާ ކަމަށް ކައުންސިލުން މައުލޫމާތުދިނެވެ.
ހދ. ކުޅުދުއްފުށީ ކައުންސިލުން ހާމަކުރި ގޮތުގައި އެރަށުގައި ވެސް ގާއިމު ކުރުމަށް ހަމަޖެހިފައިވާ ފެންހިންދުމުގެ މަޝްރޫއަށް މިހާތަނަށް އެއްވެސް އަމަލީ ސިފައެއް އައިސްފައި ނުވެއެވެ. ނަމަވެސް މީގެ ހަފްތާއްހާ ދުވަސް ކުރިން މަގުތަކުގެ ސާވޭއެއް ހިންގި ކަމަށެވެ. އަދި ރޯޑްކޯޕަރޭޝަނާ ގުޅިގެން އަލަށް ހަދާ މަގުތަކުގައި ފެހިންދުމުގެ ނިޒާމުގެ ހަރުކުރުމުގެ މަސައްކަތް ކުރިޔަށް ގެންދިއުމަށް ހަމަޖެހިފައިވާކަމަށް ކައުންސިލްގެ ރައީސް ވިދާޅުވިއެވެ.
ކިޔުންތެރިންގެ ހިޔާލު