ވަޒީފާގެ ފުރުސަތު ދިވެހިންނަށް އިތުރު ކުރުމަށް ރައީސް އިލްތިމާސް ކުރައްވައިފި

ފަތުރުވެރިކަމަކީ އެތަކެއް ވަޒީފާގެ ފުރްޞަތު އުފައްދާ ދާއިރާއެއް ކަމަށާއި އެދާއިރާއިން ވަޒީފާދޭ އިރު ވަޒީފާގެ ފުރުސަތު ދިވެހިންނަށް އިތުރު ކުރުމަށް ކަމާ ބެހޭ ފަރާތްތަކަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމް އިލްތިމާސް ކުރައްވައިފިއެވެ.

އެމަނިކުފާނު މިކަމަށް އިލްތިމާސް ކުރެއްވީ ދުނިޔޭގެ ފަތުރުވެރިކަމުގެ ދުވަހާ ގުޅިގެން ދެއްވި ޚިތާބުގައެވެ. އެމަނިކުފާނު ވިދާޅުވެފައިވަނީ އެދާއިރާއިން ލިބޭ ފުރްޞަތުތަކުގެ ބޭނުން އެންމެ ފުރިހަމައަށް ހޯދުމަށް ގިނަގުނަ މަސައްކަތްތަކެއް ކުރަން ޖެހިފައިވާ ކަމަށެވެ. އެދާއިރާއިން ހުޅުވައިލެވޭ ވަޒީފާގެ ފުރުޞަތުތަކުގެ ބޭނުން، އެންމެ ފުރިހަމަ ގޮތުގައި ހިފުމަކީވެސް ވަރަށް މުހިންމު ކަމެއް ކަމަށް ވިދާޅުވެފައިވެއެވެ.

އެމަނިކުފާނު ވިދާޅުވީ ރާއްޖެއަށް ޒިޔާރަތް ކުރާ ފަތުރުވެރިންގެ ޢަދަދު އިތުރުވަމުން އަންނަ ކަމަށާއި އެންމެ ބޮޑަށް އިތުރުވެގެން އަންނަނީ ޗައިނާއިން ކަމަށްވެސް ވިދާޅުވިއެވެ. އެހެން ކަމުން އެގައުމުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު މިހާރަށްވުރެ އިތުރުކުރުމަށްޓަކައި ރާއްޖޭގެ ޤައުމީ އެއަރލައިނުން ޗައިނާގެ އިތުރު މަންޒިލްތަކަށދަތުރުތައް ކުރުމަށް ހަމަޖެހިފައިވާ ކަމަށެވެ.

"ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވަމުން ދިޔުމަކީ، ރާއްޖޭގެ އިޤްތިޞާދަށާއި، ރާއްޖޭގެ އިޖުތިމާޢީ ތަރައްޤީއަށް އެކަމުގެ އަސަރު ހެޔޮގޮތުގައި ކުރަމުންދާނެ ކަމެއްކަން ޔަޤީނެވެ. އަދި އެއީ، ރާއްޖެއަށް ވަންނަ ބޭރު ފައިސާގެ އަދަދު އިތުރުވެ، ވަޒީފާގެ އިތުރު ފުރުޞަތުތައް ތަނަވަސްވެގެންދާނެ ކަމެއްވެސް މެއެވެ."

އެމަނިކުފާނު ވިދާޅުވެފައިވަނީ ދިވެހި ޒުވާނުން، އާހިތްވަރަކާއެކު ފަތުރުވެރިކަމުގެ ދާއިރާއަށް ނިކުތުމަށް ގޮވާލައްވާފައެވެ. "ވިޔަފާރިކުރުމަށް ވިޔަސް ނުވަތަ ވަޒީފާއަށް ކަމަށްވިޔަސް ފަތުރުވެރި ކަމުގެ ދާއިރާއަކީ ޒުވާނުންނަށް ފުރުޞަތު އޮތް ދާއިރާއެއްކަން ކަށަވަރުކުރުމަށް ސަރުކާރުން މަސައްކަތް ކުރާނެއެވެ. ފަތުރުވެރިކަމަކީ ޒުވާނުންގެ ޞިނާޢަތެކެވެ. ރާއްޖޭގެ އިޤްތިޞާދީ ދާއިރާގައި އަދި ޚާއްޞަކޮށް ފަތުރުވެރިކަމުގެ ދާއިރާއިން ޒުވާނުންނަށް ކުރިއަށް ދެވޭނެ މަގުތައް ތަނަވަސްކޮށްދީ، ވަޒީފާގެ ފުރުޞަތުތައް އިތުރަށް ހުޅުވާލަދިނުމަކީ ސަރުކާރުގެ އަމާޒެވެ." އެމަނިކުފާނު ވިދާޅުވެފައިވެއެވެ.

ފަތުރުވެރިކަމުގެ ދާއިރާއިން އިތުރު 5 ރިޒޯޓެއް މިއަހަރުގެ ތެރޭގައި ބީލަމަށް ލައި، އެ ރިޒޯޓުތައް ތަރައްޤީ ކުރުމަށްޓަކައި ބަޔަކާ ހަވާލުކުރެވޭނެ ކަމަށްވެސް ރައީސް ވިދާޅުވިއެވެ. ރާއްޖޭގެ އެކި ސަރަޙައްދުތަކަށް ފަތުރުވެރިކަން ޢާންމުކުރުމަށް ސަރުކާރުން މަސައްކަތް ކުރައްވަމުން ގެންދަވާ ކަމަށްވެސް ވިދާޅުވިއެވެ.

ރައީސް ވިދާޅުވީ ފަތުރުވެރިކަމުން ސީދާގޮތެއްގައި ފައިދާ ލިބިދޭ ފަރާތްތައް އިތުރުކުރުމުގެ ގޮތުން އަމިއްލަ ފަރުދުންނަށާއި، ކުދި އަދި މެދު ފަންތީގެ ވިޔަފާރިތަކަށް ވަނީ ފުރުސަތު ހުޅުވާފައި ކަމަށެވެ. އެ ގޮތުން ތުނބުރި ގެސްޓްހައުސް އައިލެންޑް ޕްރޮޖެކްޓް ތަޢާރުފްކޮށް، ތަރައްޤީ ކުރުމަށް ކުރަންޖެހޭ މަސައްކަތްތައް ކުރިއަށްދާ ކަމަށްވެސް ވިދާޅުވިއެވެ.

ރާއްޖޭގެ ފަތުރުވެރިކަމުގެ މައިގަނޑު ރައުސްމާލަކީ، މި ރާއްޖޭގެ ޤުދްރަތީ މުއްސަނދިކަން ކަމަށާއި، ރާއްޖޭގެ ރަށްތަކާއި ފަރުތަކާއި ފަޅުތަކާ، މިތަންތަނުގެ ދިރުން ގުޅިލާމެހިފައިވަނީ މުޖުތަމަޢާއި މި ޞިނާޢަތް ދެމެހެއްޓެނިވި ގޮތެއްގައި ތަރައްޤީ ކުރުމާ ކަމަށްވެސް ވިދާޅުވިއެވެ. އެހެން ކަމުން ރާއްޖޭގެ ޤުދްރަތީ ރީތިކަން، އަންނަން އޮތް ޖީލުތަކަށް ފޯރުކޮށްދިނުމަށްޓަކައި ކުރަންޖެހޭ އެންމެހައި ކަންތައްތައް އެންމެން ކުރުމަށް އެމަނިކުފާނު އިލްތިމާސް ކުރެއްވިއެވެ.