ބާވީސް ދުވަސްތެރޭ ޖެނެރޭޓަރުތައް ރަށްރަށަށް ފޮނުވައި ނިމޭނެ

ރަށްރަށުގައި 24 ގަޑިއިރުގެ ކަރަންޓް ޔަގީން ކޮށްދިނުމަށް ސަރުކާރުން ފަށައިފައިވާ މަޝްރޫޢުގެ ދަށުން ރަށްރަށަށް ފޮނުވާ 77 ޖެނެރޭޓަރު ސެޓް މިއަދުން ފެށިގެން 22 ދުވަސްތެރޭ ރަށްރަށަށް ފޮނުވައި ނިމޭނެ ކަމަށް ފެނަކަކޯޕަރޭޝަނުން ބުނެފިއެވެ.

މިޖެނެރޭޓަރު ސެޓުތައް ރަށްރަށަށް ގެންދިޔުމުގެ މަސައްކަތް ހަވާލުކޮށްފައިވަނީ ހަމްދު މޯލްޑިވްސް ޕްރައިވެޓް ލިމިޓެޑާއެވެ. މައުލުމާތު ލިބިފައިވާ ގޮތުގައި އެކުންފުނިން މިއަދުވަނީ އިންޖީނުތައް ރަށްރަށަށް ފޮނުވުމުގެ މަސައްކަތް ފަށައިފައެވެ. ނަމަވެސް މިއަދު މާލެއިން ފުރުވާލެވުނީ ކިތައް އިންޖީނުކަމެއް އެނގިފައެއް ނުވެއެވެ.

ފެނަކަ ކޯޕަރޭޝަންގެ މެނޭޖިން ޑިރެކްޓަރ އަހުމަދު ނިމާލު ރޭ ވިދާޅުވީ މިއިންޖީނުތައް ރަށްރަށަށް ގެންގޮސް އަންނަ އަހަރުގެ މެދުތެރޭގައި ރާއްޖޭގެ ހުރިހާ ރަށެއްގައި 24 ގަޑިއިރުގެ ކަރަންޓްގެ ޚިދުމަތް ދޭންފެށޭނެ ކަމަށެވެ. އޭނާ ވިދާޅުވީ ފެނަކައިން މަސައްކަތްކުރަނީ ރަށްރަށަށް ފޮނުވާ އިންޖީނުތައް ވީހާ ވެސް އަވަހަކަށް އިންސްޓޯލް ކުރެވޭތޯއެވެ.

މިއިންޖީނުތައް ރަށްރަށަށް ފޮނުވުން އިފްތިތާހު ކުރުމަށް ރޭ ބޭއްވި ހަފްލާގައި ނިމާލް ވިދާޅުވީ މި 77 ޖެނެރޭޓަރު ސެޓުގެ ސަބަބުން ރާއްޖޭގައި ގައުމީ ރެކޯޑެއް ގާއިމް ކުރެވިގެން ހިނގައްޖެ ކަމަށެވެ. އެހެންކަމުން ރާއްޖެގެ އެތައް ރައްޔިތުންގެ ޝަކުވާތަކަށް ނިމުން އައިސް ކަރަންޓުގެ މައްސަލަ ހައްލުވުމުގެ ހިތްހަމަޖެހުން ރައްޔިތުންނަށް ލިބިގެންދާނެ ކަމަށް އުންމީދު ކުރައްވާ ކަމަށްވެސް ވިދާޅުވިއެވެ.

ރޭގެ ހަފްލާގައިވަނީ އައްޑޫ ސިޓީއަށް ދެ މެގަވޯޓްގެ 2 އިންޖީނާއި، އެއް މެގަވޯޓުގެ 3 އިންޖީނު ހޯދުމުގެ އެއްބަސްވުމެއްގައި ސޮއިކޮށްފައެވެ. އޭގެ ސަބަބުން އެސިޓީގެ ރައްޔިތުންނަށްވެސް ކަރަންޓުގެ މައްސަލަ ހައްލުވެގެންދާނެ ކަމަށް އޭނާ ވިދާޅުވިއެވެ. ރައްޔިތުންނަށް ކަރަންޓްގެ ޚިދުމަތް 24 ގަޑިރު ހޯދައިދިނުމަށް ސަރުކާރުން ގެނެސްފައިވާ 77 ޖެނެރޭޓަރުސެޓަށްވަނީ 150 މިލިއަން ރުފިޔާ ޚަރަދުކޮށްފައެވެ.