އިތުރު ރަށްރަށުގައި އިރުން ހަކަތަ އުފެއްދުމުގެ މަޝްރޫޢު އަންނަ އަހަރު ފަށާނަން-ރައީސުލްޖުމްހޫރިއްޔާ
25 ސެޕްޓެމްބަރ 2014 14:22
24 ގަޑިއިރު ކަރަންޓުގެ ޚިދުމަތް ޔަޤީން ކުރުމުގެ ހަފްލާގައި ރައީސް ޔާމީން ވާހަކަފުޅު ދައްކަވަނީ: ފޮޓޯ- ރައީސްއޮފީސް
މިއަންނަ އަހަރު މާލޭގެ އިތުރަށް 5 ރަށެއްގައި އިރުގެ ހަކަތައިން ކަރަންޓު އުފެއްދުމުގެ މަޝްރޫޢު ފަށްޓަވާނެ ކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، 24 ގަޑިއިރު ކަރަންޓުގެ ޚިދުމަތް ޔަޤީން ކުރުމުގެ މަޝްރޫޢުގެ ދަށުން ޖެނެރޭޓަރތައް އަތޮޅުތަކަށް ފޮނުއްވުން ފެށްޓެވުމަށް ރޭ ބޭއްވި ޚާއްޞަ ޙަފްލާގައި ވާހަކަފުޅު ދައްކަވަމުންނެވެ.
ފަސް ރަށުގެ ނަންތައް ވިދާޅުނުވިޔަސް އެމަނިކުފާނު ވިދާޅުވީ މިއަންނަ އަހަރު އައްޑު އަތޮޅު ހިތަދޫން ފެށިގެން ފޭދޫގެ ބައްރާ ހަމައަށް، އިރުން ހަކަތަ އުފައްދާ ސޯލާރ ޕެނަލް ޖަހައިގެން ހަކަތަ އުފެއްދުމުގެ މަސައްކަތް ފަށްޓަވާނެ ކަމަށެވެ. އެމަޝްރޫޢުގެ ސަބަބުން ރައްޔިތުންނަށް ކަރަންޓު ލިބޭ އަގު ހެޔޮވެގެންދާނެ ކަމަށްވެސް ވިދާޅުވިއެވެ.
އެމަނިކުފާނު ވިދާޅުވީ ހަކަތައަކީ ރާއްޖޭގެ އިޤުޞާދުގެ މައި ނާރުކަމަށެވެ. އެހެން ކަމުން މުޅި ރާއްޖެއަށް ހަކަތަ ފޯރު ކޮށްދެއްވުމަކީ ސަރުކާރުގެ ވިސްނުމެއް ކަމަށް ވިދާޅުވިއެވެ. ރައީސް ޔާމީން ވިދާޅުވީ ރާއްޖޭގައި މިހާރު މިބޭނުން ކުރަނީ ވަރަށް އަގު ބޮޑު ހަކަތަ (ތެޔޮ) އެއް ކަމަށެވެ. އެހެން ކަމުން އިޔާދަކުރަނިވި ހަކަތަ އުފެއްދުމަށް ސަރުކާރުން ވަރަށް ގިނަ މަސައްކަތްތަކެއް ކުރަމުން ގެންދާ ކަމަށް ވިދާޅުވިއެވެ.
ކޮންމެ ދިމާއަކުންވެސް ފެންނަނީ ސަރުކާރުގެ މެނިފެސްޓޯގައި ރައްޔިތުންނަށްޓަކައި ވެވަޑައިގެންފައިވާ ވަޢުދުތައް ފުއްދަވަން ކެބިނެޓުން ރެއާއި ދުވާލު މަސައްކަތް ކުރައްވާ ތަން ކަމަށް ރޭގެ ހަފްލާގައި ރައީސް ވިދާޅުވިއެވެ. ސަރުކާރަށް ފާޑުކިޔަމުންދިޔަނަމަވެސް މެނިފެސްޓޯގައިހުރި ބޮޑެތި ކަންކަން ރައްޔިތުންނަށް ފުދެމުންދާތަން މިހާރު ފެންނަމުންދާ ކަމަށްވެސް އެމަނިކުފާނު ވިދާޅުވިއެވެ.
ރައީސް ވިދާޅުވީ އެމަނިކުފާނުގެ ކެބިނެޓަކީ އަމާޒަށް ވާސިލް ވުމަށްޓަކައި އަވަދިނެތި މަސއްކަތް ކުރައްވާ ޚިދުމަތްތެރި ކެބިނެޓެއް ކަމަށެވެ. ކެބިނެޓް ތެރޭގައި އޮތް އެކުވެރިކަމާއެކު، އަމާޒަށް ވާސިލްވުމަށް އެބޭފުޅަކަށް ހަވާލުވެފައި އޮތް މަސްއޫލިއްޔަތު އަދާކުރެއްވުމުގައި ވާދަވެރިވަޑައިގެންނެވުމަށް އެދިވަޑައިގެންނެވިއެވެ. ބޭނުންފުޅަކީ ވީހާވެސް އަވަހަށް ރައްޔިތުންނަށް ބޭނުންވާ ކަންކަން ފުއްދަވައި ދެއްވުން ކަމަށްވެސް ވިދާޅުވިއެވެ.
މެނިފެސްޓޯގައި ހުރި ރައްޔިތުންނަށް ބޭނުންވާ އެކިއެކި ބޮޑެތި ކަންކަމަކީ އެމަނިކުފާނުގެ ޓީމުން ޔަޤީން ކޮށްދޭން ބޭނުންވާ ކަންކަން ކަމުގައިވެސް ރައީސް ވިދާޅުވިއެވެ. އެހެންކަމުން ކެބިނެޓާއި، ކުންފުނިތަކާއި، ސިޔާސީ ގޮތުން މަސައްކަތްކުރައްވާ ޓީމު ގުޅިގެން ސަރުކާރުގެ ސިޔާސަތު ތަންފީޒުކޮށް ރައްޔިތގުންނަށް ނަތީޖާ ދެއްކެވުމަށް އެމަނިކުފާނު އެދިވަޑައިގެންނެވިއެވެ.
އެމަނިކުފާނު ވިދާޅުވީ ސަރުކާރުން މަސައްކަތް ކުރައްވަނީ، ސަރުކާރު ހިއްސާވާ ކުންފުނިތައް މެދުވެރިކޮށް، ދިވެހި ރައްޔިތުންގެ އުއްމީދުތަކާއި، މުޅި ދިވެހިރާއްޖެއަށް ބޭނުންވެފައިވާ ކަންތައްތައް ޙާޞިލް ކޮށްދެއްވުމަށް ކަމަށެވެ.
ކިޔުންތެރިންގެ ހިޔާލު