ހަމައެކަނި ޓީޗަރުންގެ މުސާރަ ބޮޑުކުރުމަކީ އިންސާފެއް ނޫން- އެމްސީއެސްއޭ

ހަމައެކަނި ޓީޗަރުންގެ މުސާރަ ބޮޑުކުރުމަކީ އެއްގޮތަކަށްވެސް އިންސާފުވެރި ގޮތެއް ނޫންކަމަށް މޯލްޑިވްސް ސިވިލްސާވަންޓްސް އެސޯސިއޭޝަން (އެމްސީއެސްއޭ) އިން ބުނެފިއެވެ.

އެ އެސޯސިއޭޝަނުގެ ރައީސް މުޙައްމަދު ޝައުގީ ވިދާޅުވީ ޓީޗަރުންނަކީވެސް ސިވިލްސާވަންޓުން ކަމަށެވެ. އެހެން ކަމުން އެމީހުން ހަމަ ހަޅުތާލެއް ކޮށްލަން ބުނާއިރަށް މުސާރަ ބޮޑުކުރުމަކީ ސިވިލްސާވިސްގެ އެހެން މުވައްޒަފުންނަށް ކުރެވޭ ބޭ އިންސާފެއް ކަމަށެވެ.

މީގެ ކުރިން ސިވިލްސާވަންޓް އެސޯސިއޭޝަނުންވަނީ އެމީހުންގެ ކަންބޮޑުވުންތަކާއި މުސާރައިގެ ހަމަހަމަކަން ގެނައުމަށް އެދި ރައީސް އޮފީހަށާއި، ހިޔުމަންރައިޓްސް ކޮމިޝަނަށާއި، ސިވިލްސާވިސް ކޮމިޝަނަށް ޕެޓިޝަނެއް ހުށަހަޅަން ތައްޔާރުވެފައެވެ. ނަމަވެސް އެފަހަރު އެކަން ނުކޮށް ހުއްޓާލީ ސަރުކާރުން ދެއްވި ޔަގީން ކަމެއްގެ މައްޗަށް ބަރޯސާވެގެން ކަމަށްވެސް އޭނާ ވިދާޅުވިއެވެ.

ޝައުގީ ވިދާޅުވީ ހަމައެކަނި ޓީޗަރުންގެ މުސާރަ ބޮޑުކޮށްފި ކަމަށްވާނަމަ ސިވިލްސާވަންޓްސް އެސޯސިއޭޝަނުން ނުރުހުން ފާޅުކުރާނެ ކަމަށެވެ. ނަމަވެސް ނުރުހުންފާޅުކުރާނެގޮތެއް އޭނާ ވިދާޅެއް ނުވެއެވެ. "ހަމައެކަނި ޓީޗަރުންގެ މުސާރަ ބޮޑުކޮށްގެން ފުދޭކަށްނެތް. މިދޭތެރެއަކުން އަޅުގަނޑުމެން ޕެޓިޝަނެއް ހުށަހެޅުމުގެ ކަންތައް ވަރަށް ބާރަށް ކުރިއަށް ގެންދިޔައިން. އެންމެފަހުން ސަރުކާރުންދިން ޔަގީންކަމާއި، ސަރުކާރުގެ ފަރާތްތަކުގެ ޕްރެޝަރާހެދި ހުއްޓާލަންޖެހުނީ،" ޝައުގީ ވިދާޅުވިއެވެ.

އޭނާ ވިދާޅުވީ ޕެޓިޝަން ހުށަހެޅުން ހުއްޓާލިއިރު ސަރުކާރުން އެކުލަވާލަން އުޅުނު ޕޭކޮމިޝަންވެސް އެކުލަވާ ނުލެވޭ ކަމަށެވެ. އެހެން ނަމަވެސް 2008 އިން ފެށިގެން ޕޭރިވިއު ބޯޑެއް އޮންނަ ކަމަށް ވިދާޅުވިއެވެ. އެބޯޑުގެ މަސައްކަތްތައް ނިމިފައިވާ ކަމަށް އެބޯޑުގެ ޗެއާމަން ޑރ. ލަތީފްގެ ފަރާތުން މައުލޫމާތު ލިބިފައިވާ ކަމަށްވެސް ޝައުގީ ވިދާޅުވިއެވެ. އެބޯޑުގެ މަސައްކަތްތައް ނުހިނގާ އޮތަސް ދޭތެރެ ދޭތެރެއިން ސިޔާސީ ބޭފުޅުންނާއި، ޑޮކްޓާރުންނާއި، ނަރުހުންނާއި، ޓީޗަރުންގެ މުސާރަ "އެކިގޮތްގޮތަށް ބޮޑުވަމުންދާއިރު" އޮފީސްތަކުގައި މަސައްކަތް ކުރަމުންދާ ސިވިލް ސާވިސް މުވައްޒަފުންގެ މުސާރައިގެ އޮނިގަނޑަށް ރަނގަޅު ބަދަލެއް އަންނަތަނެއް ނުފެންނަ ކަމަށްވެސް ވިދާޅުވިއެވެ.

"ސަރުކާރަށް ޕްރެޝަރކޮށްގެންވިޔަސް ނޫނީ އިހުތިޖާޖު ކޮށްގެން ކަމުގައިވިޔަސް އިހުތިޖާޖުކުރާ ކޮންމެ ބަޔަކަށް މުސާރަ ބޮޑުކުރާ ކަމަށްވާނަމަ އޭގެ މާނައަކީ ސިވިލްސާވިސްގެ އެހެން އޮފީސްތަކަށްވެސް އިހުތިޖާޖު ކުރުމުގެ ފުރުސަތެކޭ އެހުޅުވާދެވެނީ. އެކަމަކު ރައީސުލްޖުމްހޫރިއްޔާ ވަކިބައެއްގެ މުސާރަ ބޮޑުނުކޮށްދެއްވާނެ ކަމަށް އަޅުގަނޑު ގަބޫލުކުރަން،" ޝައުގީ ވިދާޅުވިއެވެ. އޭގެ ބަދަލުގައި އެންމެންނަށްވެސް ހަމަހަމަ މުސާރައެއް ދެވޭނެ އުސޫލެއް ގާއިމް ކުރުމަކީ އެންމެ ރަނގަޅުގޮތް ކަމަށް ދެކެވަޑައިގަންނަވާ ކަމަށްވެސް ޝައުގީ ވިދާޅުވިއެވެ.ޝައުގީ ވިދާޅުވީ ޓީޗާސް އެެސޯސިއޭޝަނުން ހަޅުތާލުކުރަން ނިންމުމުން އެމީހުންގެ މުސާރަ ބޮޑުކުރަން އުޅޭކަމުގެ މައުުލޫމާތު ލިބިފައިވާ ކަމަށެވެ. އެކަމުގެ ޝަކުވާގެ ފޯންކޯލްތައްވެސް ސިވިލްސާވަންޓްސް އެސޯސިއޭޝަނަށް އަންނަ ކަމަށް އޭނާ ވިދާޅުވިއެވެ.

މިކަމާ ބެހޭ ގޮތުން ޓީޗާސް އެސޯސިއޭޝަންގެ ރައީސް އާތިފް އަބްދުލް ހަކީމް ވިދާޅުވީ ޓީޗަރުންގެ މުސާރަ ބޮޑުކުރަން ނިންމި ކަމެއް އެނގިވަޑައިގެންފައިނުވާ ކަމަށެވެ. ރައީސް އޮފީހުގެ ތަރުޖަމާނު އިބްރާހީމް މުޢާޒު ޢަލީ ވިދާޅުވީ ޓީޗަރުންގެ މުސާރަ ބޮޑުކުރުމާ ބެހޭ ގޮތުން އެއްޗެއް ދަންނަވަން އަދި އެނގިވަޑައި ނުގަންނަވާ ކަމަށެވެ.

ރައީސް ޔާމީން މިއަދުވަނީ ޓީޗާސް އެސޯސިއޭޝަންގެ ވެރިންނާ ބައްދަލުކުރައްވައިފައެވެ.