އެމްޑީޕީގެ ޗެއަރ ޕާސަންގެ ކާރަށް ގެއްލުންދީ އެމްޑީޕީ އޮފީހުގެ ބިއްލޫރިތައް ތަޅައިލައިފި
25 ސެޕްޓެމްބަރ 2014 10:11
އެމްޑީޕީގެ އައު ޗެއަރޕާސަން އަލީވަހީދުގެ ކާރަށް ގެއްލުން ދީ އެމްޑީޕީ އޮފީހުގެ ބިއްލޫރިތައް ތަޅައިލައިފިއެވެ.
ރޭ މެންދަމު 3:00 ހާއިރު ތަޅާލާފައިވަނީ އެމްޑީޕީ އޮފީހުގެ ދެވަނަ ފަންގިފިލާގެ ބިއްލޫރިތަކެވެ. އޭގެ އިތުރުން އެ އޮފީހުގެ ނަންބޯޑުވެސް ވަނީ ހަލާކުކޮށްލައިފައެވެ.
ބުދަ ދުވަހުގެ ރޭވެސް އެމްޑީޕީ އޮފީހު ބިއްލޫރިތައް ވަނީ ތަޅައިލައިފައެވެ.
މިހަމަލާތަކުގެ އިތުރުން އެމްޑީޕީގެ ރައީސްގެ ގެކޮޅުކަމުގައިވާ ކެނަރީގެއަށް ކަޅުތެޔޮ ޖަހާފައިވާކަމަށް ވެސް މައުލޫމާތު ލިބެއެވެ. އެހެން ނަމަވެސް އެފަދަ މައްސަލައެއް ހުށަހަޅާފައިނުވާކަމަށް ފުލުހުން ބުނެއެވެ.
ފުލުހުންނަށް ހުށަހަޅައިފައިވަނީ އެމްޑީޕީ އޮފީހުގެ ބިއްލޫރިތައް ތަޅައިލި މައްސަލައާ، ވަހީދުގެ ކާރަށް ގެއްލުންދިން މައްސަލައެވެ. އެ ދެ މައްސަލަ ފުލުހުން ގެންދަނީ ތަހުގީގުކުރަމުންނެވެ.
އެމްޑީޕީން ދެން ބާއްވާ ޖަލްސާއަކަށް ޖާނުންފިދާވުމުގެ ހަމަލާއެއްދޭނެ ކަމުގެ އިންޒާރު ވެސް ވަނީ ދީފައެވެ. އެ އިންޒާރު ދީފައިވަނީ، ގަލޮޅު އުތުރު ދާއިރާގެ މެމްބަރު އީވާ އަބްދުﷲ އަށެވެ. އީވާއަށް ފޮނުވި މެސެޖުގައި ބުނެފައިވަނީ "ދެން އޮންނަ އެމްޑީޕީގެ ޖަލްސާއެއްގައި ޖާނުން ފިދާވުމުގެ ހަމަލާދީ މަރައި ހުސްކުރާނެ" ކަމަށެވެ. އެހެން ނަމަވެސް އެ މެސެޖު ފޮނުވާފައިވަނީ ކޮން ކޮން ޖަމާއަތަކުންކަމެއް ބުނެފައެއްނުވެއެވެ.އެ މައްސަލަ މިހާރު ވަނީ ރައްޔިތުންގެ މަޖިލީހަށްވެސް ހުށަހަޅައިފައެވެ.
ކިޔުންތެރިންގެ ހިޔާލު