އަޅުގަނޑުގެ ސަރުކާރަކީ މާލެއާއި އަތޮޅުތައް ތަފާތުކުރަން ދަންނަ ސަރުކާރެއް ނޫން-ރައީސް ޔާމީން

މިއަދުގެ ސަރުކާރަކީ މާލެއާއި އަތޮޅުތައް ތަފާތުކުރަން ދަންނަ ސަރުކާރެއް ނޫންކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ "24 ގަޑިއިރު ކަރަންޓް ޔަގީން" މަޝްރޫޢު އިފްތިތާހު ކޮށްދެއްވުމުގެ ހަފްލާގައި ވާހަކަފުޅު ދައްކަވަމުންނެވެ.

އެމަނިކުފާނު ވިދާޅުވީ މާލެއާއި އަތޮޅުތަކާ ދެމެދު ކޮންމެވެސް ވަރެއްގެ ތަފާތުތަކެއް ގެނައުމަށް ނޫސްތަކުންވެސް މަސައްކަތް ކޮށްފައިވާ ކަމަށެވެ. "އަޅުގަނޑުގެ ސަރުކާރަކީ މާލެއާއި އަތޮޅުތަކުގެ ތަފާތެއް އޮންނަކަން ދަންނަ ސަރުކާރެއްނޫން. އަޅުގަނޑަށް ކޮންމެ ދިވެހިރައްޔިތަކީ ކޮންމެތާކު ހުއްޓަސް ލޮބުވެތި ދިވެހި ރައްޔިތެއް. އެހެންވީމާ ބައެއް ނޫސްތަކުން މިދޭތެރެއިން މިކުރެއްވި މަސައްކަތުގައިވެސް އަޅުގަނޑު ދަންނަވާލަން ބޭނުންވަނީ އެކުރެއްވީ ބޭކާރު މަސައްކަތެކޭ،" ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ މާލެއާއި އަތޮަޅުތައް ތަފާތު ކުރުމުގެ ވާހަކަތަކަކީ މާޒީ ކަމަށެވެ. މާލެއާއި އަތޮޅުތަކުގެ ތަފާތުގެ ވާހަކަ މީހާރު ދައްކައިގެން ރައްޔިތުންގެ މެދުގައި ހިތްހަމަ ނުޖެހުންތައް އުފައްދަން ދައްކާ ވާހަކަތަކަކީ ބޭކާރު ވާހަކަތައް ކަމަށްވެސް އެމަނިކުފާނު ވިދާޅުވިއެވެ.

އެމަނިކުފާނު ވިދާޅުވީ މާލޭގައި ދިރިއުޅެމުން ގެންދަނީ ހަމައެކަނި މާލޭ މީހުންނޫންކަމަށެވެ. "ހުޅުމާލޭގެ ތަރައްގީއަކީ ހަމައެކަނި މާލޭގެ ރައްޔިތުންނަށް އޮތް ކަމެއްނޫން،" ކަމަށްވެސް އެމަނިކުފާނު ވިދާޅުވިއެވެ. ރައީސް ވިދާޅުވީ މިދުވަސް ވަރަކީ ރާއްޖޭގެ ބޯހިމެނުމުގެ މަސައްކަތް ކުރަމުންދާ ދުވަސްވަރު ކަމަށެވެ. އޭގެ ނަތީޖާއިން ހަގީގަތްތަކެއް ހާމަވެގެންދާނެ ކަމަށެވެ. މާލޭގައި އުޅެމުންދަނީ ރަށްރަށުން އައިސްތިބި ދިވެހި ރައްޔިތުން ކަމަށްވެސް ވިދާޅުވިއެވެ. "އަޅުގަނޑުގެ ސަރުކާރެއްގައި އެއްވަނަ ދަރަޖައިގެ ރައްޔިތުންނާއި ދެވަނަ ދަރަޖައިގެ ރައްޔިތުންނެއް ނުތިބޭނެ. ހުރިހާ ރައްޔިތުންނަކީވެސް އެއްވަނަ ދަރަޖައިގެ ރައްޔިތުން،" ރައީސް ވިދާޅުވިއެވެ.

ރައީސް ވިދާޅުވީ ސަރުކާރުން މާލެއަށް ކޮށްދެއްވާ ކަންކަމަކީ މާލޭގައި ދިރިއުޅޭ ރައްޔިތުންނަށް ފޯރުކޮށްދޭ ޚިދުމަތްތައް ކަމަށެވެ. މާލެއާއި ހުޅުމާލެއާ ދެމެދު ބުރިޖެއް އަޅުއްވައިދެއްވަނީ މުޅި މިސަރަހައްދުގައި އުޅޭ ރައްޔިތުންނަށް ކަމަށްވެސް ރައީސް ވިދާޅުވިއެވެ. "އެއި މާލޭގެ ރައްޔިތުންނަށް އެކަންޏެއް ކޮށްދޭކަމެއް ނޫން،"

ރައީސުލްޖުމްހޫރިއްޔާ ވިދާޅުވީ މާލެއާއި ހުޅުމާލެ ގުޅާލުމުން މި ދެރަށުގައި ދެލައްކައަށްވުރެ ބޮޑު އާބާދީއެއް ދައުރުކުރާނެ ކަމަށް އުންމީދު ކުރައްވާ ކަމަށެވެ. "މިއީ އިގްތިސާދުގައި ބޭނުންވާ، މަސައްކަތްކުރާ ގޮތަކީ،" ރައީސް ވިދާޅުވިއެވެ.

މިރޭގެ ޖަލްސާގައި ރައީސް ޔާމީން ވިދާޅުވީ އަންނަ އަހަރުގެ މެދުތެރޭގައި ފުރަތަމަ ފަހަރަށް ރާއްޖޭގައި 24 ގަޑިއިރުގެ ކަރަންޓް ޔަގީން ވެގެންދާނެ ކަމަށެވެ. މިކަން ކުރުމަށްޓަކައި ސަރުކާރުންވަނީ 77 ޖެނެރޭޓަރުސެޓް ރާއްޖެ ގެނެސްފައެވެ. މިިޖެނެރޭޓަރު ސެޓްތައް ކުންފުންޏަކާ ހަވާލުކޮށްގެން ރަށްރަށަށް ފޮނުވުމުގެ މަސައްކަތް ވަރަށް އަވަހަށް ފެށިގެންދާނެއެވެ.