އެމްޑީއެންގެ ރިޕޯޓުގައިވާ މީހުންނާއި ރިޟްވާނާ ގުޅުމެއްނެތްކަން ކަށަވަރު ކޮށްދިނުމަށް އެދެފި

މޯލްޑިވިއަން ޑިމޮކްރަސީ ނެޓްވޯކް (އެމްޑީއެން) އިން ހާމަކޮށްފައިވާ ރިޕޯޓުގައި ހިމަނާފައިވާ މީހުންނާއި ރިޟްވާން ގެއްލުމާ އެއްވެސް ގުޅުމެއްނެތް ކަން ކަށަވަރު ކޮށްދިނުމަށް ރިޟްވާންގެ ޢާއިލާއިން ފުލުހުންގެ ކިބައިން އެދިއްޖެއެވެ.

ޢާއިލާއިން މިއަދު ނެރެފައިވާ ބަޔާނެއްގައި ބުނެފައިވަނީ އެމްޑީއެންގެ ރިޕޯޓުގައި "ވަކިފަރުންދުންގެ ނަމާއި، އެހެން މައުލޫމާތު ހާމަކޮށްފައިވާތީ އެފަރުދުންނާއިރިޟްވާން ގެއްލުނު މައްސަލައާ އެއްވެސް ގުޅުމެއް ނުވާނަމަ އެކަން ކަށަވަރުކޮށް ދެއްވުން އެދެމެވެ." އަދި އެކަމުގައި ހިމެނޭ ބަޔަކު ވީހާވެސް އަވަހަށް ހޯދައި އެބަޔަކާމެދު ޤާނޫނީ ފިޔަވަޅު އަޅުއްވައި ދެއްވުން އެދޭ ކަމަށް އެރިޕޯޓުގައި ބުނެފައިވެއެވެ.

ޢާއިލާއިން ބުނެފައިވަނީ އެމްޑީއެން އިން މިމަހުގެ 22 ވަނަ ދުވަހު ނެރެފައިވާ ރިޕޯޓަކީ އެއާއިލާއާވެސް އަދި އެހެން އިތުރު ފަރާތަކާ ގުޅުމެއްނެތް މިނިވަން ރިޕޯޓެއް ކަމަށެވެ. އެހެން ކަމުން އެރިޕޯޓުގައި ފާހަގަ ކޮށްފައިވާ ކަންކަން ބައްލަވައި ދެއްވުމަށް ފުލުހުންގެ އިދާރާގައި އެދޭ ކަމަށެވެ.

އެމްޑީއެންގެ ރިޕޯޓާ ގުޅިގެން ފުލުހުން ބުނެފައިވަނީ އެއީ ޒިންމާދާރު ކަމެއްނެތި ސިޔާސީ ބޭނުމަކަށް ނެރުނު ރިޕޯޓެއް ކަމަށެވެ. އެހެން ކަމުން އެކަން ކުރިބަޔަކު ހޯދައި ފިޔަވަޅު އަޅާނެ ކަމަށެވެ. އަދި ބަޔާނުގައި ވަކި ފަރުދުންގެ މައުލޫމާތު ތަކެއް ހާމަކޮށްފައިވާތީ އެމީހުންނަށް އިންޒާރު އަންނަމުންދާ ކަމުގެ ޝަކުވާވެސް އެފަރާތްތަކުން ހުށަހަޅާފައިވާ ކަމަށް ފުލުހުން ބުނެފައިވެއެވެ.

ރިޟްވާންގެ ޢާއިލާއިން ނެރެފައިވާ ބަޔާނާ ގުޅިގެން ފުލުހުން ބުނީ ކުރިއެކޭ އެއްގޮތަށް ރިޟްވާން ހޯދުމުގެ މަސައްކަތް ކުރިއަށް ގެންދާނެ ކަމަށެވެ. ޢާއިލާއަށް ދޭންޖެހޭ މަޢުލޫމާތުވެސް ދެއްވަމުން ގެންދަވާނެ ކަމަށެވެ.