ސަރުކާރުން އަޅުގަނޑުމެން ގަބޫލު ކުރެއްވީތީ އުފާކުރަން- ޓީއޭއެމް

ސަރުކާރުން ޓީޗާސް އެސޯސިއޭޝަން އޮފް މޯލްޑިވްސް (ޓީއޭއެމް) ގަބޫލު ކުރައްވައިފި ކަމުގެ އިހުސާސް މިހާރު ކުރެވޭ ކަމަށް އެ އެސޯސިއޭޝަނުން ބުނެފިއެވެ.

ޓީއޭއެމް ގެ ރައީސް އާތިފް އަބްދުލް ހަކީމް ވިދާޅުވީ ޓީޗަރުންގެ ކަންބޮޑުވުންތަކަކީ ތައުލީމީ ނިޒާމުގެ ތެރޭގައި ހުރިކަންކަން ކަމަށް ސްޓޭޓް މިނިސްޓަރ އޮފް އެޑިޔުކޭޝަން އާދަމް ޝަރީފްވެސް ވިދާޅުވެފައިވާ ކަމަށެވެ. އެެހެން ކަމުން އެކަންކަން ހައްލު ކުރުމަށް މިނިސްޓްރީއާ ގުޅިގެން ޓީއޭއެމް އިން މަސައްކަތް ކުރެވޭނެ މަގު މިހާރު ފަހިވެފައިވުމަކީ ލިބުނު ވަރަށް ބޮޑު ކުރިއެރުމެއް ކަމަށެވެ.

"މީގެ ކުރިން އެޑިޔުކޭޝަނުން އަޅުގަނޑުމެން ބަލައެއް ނުގަނޭ. ޕޮލިސީ ފެންވަރުގައި ކަންކަން ނިންމާއިރު އަޅުގަނޑުމެންގެ ބަހެއް ނުހޯއްދަވާ. ތައުލީމާ ބެހޭ ބިލެއް މަޖިލިހަށް ހުށަހެޅިއިރުވެސް އަޅުގަނޑުމެންގެ ޚިޔާލެއް ނުހޯއްދަވާ. އެއިން ދޭހަވަނީ އެޑިޔުކޭޝަނުން އޭރު އަޅުގަނޑުމެން ބަލައި ނުގަންނަކަން. ނަމަވެސް މަޖިލީހުން އަޅުގަނޑުމެންގެ ބަސް ހޯއްދެވި،" އާތިފް ވިދާޅުވިއެވެ.

އޭނާ ވިދާޅުވީ ތައުލީމާ ގުޅޭ ކަންކަން ޕޮލިސީ ފެންވަރުގައި ނިންމާއިރު އެޖަމިއްޔާގެ ބަހެއް ހޯދުމަކީ މުހިންމު ކަމެއް ކަމަށް ދެކެވަޑައިގަންނަވާ ކަމަށެވެ. "އެއީ އަޅުގަނޑުމެން ކުލާސްތަކަށްވަދެ ކުދިންގެ ހަރަކާތް އެންމެ ގާތުން ކޮންމެ ދުވަހަކުވެސް ބަލަނީ. އަޅުގަނޑުމެންނަށް ބޮޑަށް އެނގޭނީ ތައުލީމީ ނިޒާމުގައިހުރި މައްސަލަތައް. އެހެންވީމާ މަޝްވަރާގެ އުސޫލުން ކަންކަން ގެންދިޔައިމާ ގައުމަށާއި ދަރިވަރުންނަށް ފައިދާވާނީ،" އާތިފް ވިދާޅުވިއެވެ.

އޭނާ ވިދާޅުވީ ސަރުކާރުން އެޖަމިއްޔާ ގަބޫލުކޮށް އެއްކޮށް މަސައްކަތް ކުރުމުން އެކަމުގެ ހެޔޮބަދަލު ދަރިވަރުންނަށްވެސް ފެންނާނެ ކަމަށެވެ. އެންކަމުން ކުރިއަށްއޮތީ ތައުލީމީ ނިޒާމަށް ވަރަށް ރަނގަޅު ދުވަސްތަކެއް ކަމަށް އުންމީދު ކުރައްވާ ކަމަށް ވިދާޅުވިއެވެ.

އެޑިޔުކޭޝަން މިނިސްޓްރީއާއެކު ބައްދަލުވެ މަޝްވަރާ ކުރެވޭގޮތްވީ ރައީސް ޔާމީނުގެ އިސްނެންގެވުމުގެ މަތިން ކަމަށް ކަމަށްވެސް އާތިފް ވިދާޅުވިއެވެ. އޭނާ ވިދާޅުވީ ރައީސް ޔާމީނާ ބައްދަލު ކުރުމުގެ ފުރުސަތު ވަރަށް އަވަހަށް ލިބޭނެ ކަމަށް އުންމީދު ކުރައްވާ ކަމަށެވެ.

މިއަދު ބައްދަލު ކުރާ ގޮތަށް އޮވެފައި މިހާރު ފަސްވެފައިވާ ކަމަށް އޭނާ ވިދާޅުވިއެވެ. ނަމަވެސް އެޖަމިއްޔާއިން ރޭ ވަނީ ޕީޕީއެމްގެ ޕާލިމެންޓްރީ ގްރޫޕުގެ ލީޑަރު އަދި ރައްޔިތުންގެ މަޖިލީހުގެ މެޖޯރިޓީ ލީޑަރު މުޙައްމަދު ނިހާނާ ބައްދަލު ކުރައްވާފައި ކަމަށެވެ. ނަމަވެސް އެބައްދަލުވުމާ ބެހޭ ތަފްސީލެއް ނުދެއްވައެވެ.

މިއަދު ބާއްވަން ހަމަޖެއްސި ހަޅުތާލުވެސް މިއަދު ނުބާއްވާ ގޮތަށް ހަމަޖެއްސީ މަޝްވަރާ ކުރަމުންދާތީ ކަމަށްވެސް އޭނާ ވިދާޅުވިއެވެ.