ހިއުމަން ރައިޓްސް ކޮމިޝަނުގެ މެމްބަރުންނާ ދެކޮޅަށް ސްޕްރީމްކޯޓުން ދައުވާއުފުލައިފި
22 ސެޕްޓެމްބަރ 2014 14:46
ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރުސީއެމް) އިން ނެރުނު ރިޕޯޓަކާއި ގުޅިގެން އެ ކޮމިޝަނުގެ މެމްބަރުނާ ދެކޮޅަށް ސްޕްރީމް ކޯޓުން އެ ކޯޓުގައި ދައިވާއުފުލައިފިއެވެ.
މައުލޫމާތު ލިބިފައިވާގޮތުގައި ސްޕްރީމް ކޯޓުން ސްމޯޓު (ފަނޑިޔާރުން އަމިއްލަށްބަލާ) މައްސަލައެއް އެޗްއާރު ސީއެމްގެ މެމްބަރުންނާ ދެކޮޅަށް އުފުލާފައިވަނީ، ޝަރުއީ ދާއިރާ އަށް ސުޕްރީމް ކޯޓުގެ ނުފޫޒު ވަރަށް ބޮޑަށް ފޯރާފައިވާ ކަމަށް އެ ކޮމިޝަނުން ނެރުނު ރިޕޯޓެއްގައި ބުނެފައިވާތީއެވެ. އެގޮތަށް އެޗްއާރުސީޢެމުން ބުނެފައިވަނީ އެ ކޮމިޝަނުން ނެރުނު "ޔުނިވާސަލް ޕީރިއޮޑިކް ރިވިއު" ރިޕޯޓުގައިއެވެ.
އެމައްސަލައިގެ ފުރަތަމަ އަޑުއެހުން އަންނަ ބުދަދުވަހު ބޭއްވުމަށްވަނީ ތާވަލުކޮށްފައިއެވެ. އެކަން އަންގައި އެ ކޮމިޝަނުގެ މެމްބަރުންނަށް މިއަދު ވަނީ ޗިޓުވެސް ހަވާލުކޮށްފައިއެވެ.
މިއަހަރުގެ މާޗުމަހުގައި ވެސް ސުޕްރީމްކޯޓުން ވަނީ އިލެކްޝަންސް ކޮމިޝަނުގެ މެމްބަރުންގެ މައްޗަށް ވެސް މިފަދަ ދައުވާއެއް އުފުލައިފައެވެ. އެ ދައުވާއަށްފަހު އިލެކްޝަންސް ކޮމިޝަނުގެ އޭރުގެ ރައީސް ފުވާދު ތައުފީގާއި ނާއިބް ރައީސް އަހްމަދު ފަޔާޒު ހަސަން ކޮމިޝަންގެ މެމްބަރުކަމުންވަނީ ވަކިކޮށްފައެވެ. އެ ކޮމިޝަނުގެ މެމްބަރުންގެ މައްޗަށް ހުކުމްކޮށްފައިވަނީ ސްޕްރީމް ކޯޓުގެ ހުރުމަތްކެނޑިކަމށް ބުނެއެވެ.
ކިޔުންތެރިންގެ ހިޔާލު