ރައީސް ޔާމީން ޓީޗަރުން މަގުމަތި ނުކުރައްވާނެ: ޓީއޭއެމް
21 ސެޕްޓެމްބަރ 2014 14:39
ޓީޗަރުންތަކެއް ކަޅުހެދުުނުގައި ތިބެ ޝުޢޫރު ފާޅުކުރަނީ: ފޮޓޯ- ފޭސްބުކް
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމް ޓީޗަރުން މަގުމަތި ނުކުރައްވާނެ ކަމުގެ ފުރިހަމަ އުންމީދާއި އިތުބާރު އެބައޮތް ކަމަށް ޓީޗާސް އެސޯސިއޭޝަން އޮފް މޯލްޑިވްސް (ޓީއޭއެމް) އިން ބުނެފިއެވެ.
ޓީއޭއެމްގެ ރައީސް އާތިފް ޢަބްދުލް ޙަކީމް ވިދާޅުވީ ރާއްޖޭގެ ތަޢުލީމީ ނިޒާމުގެ ކަންކަން ރައީސް ޔާމީނަށް އަދި އެންމެ ރަނގަޅަށް އެނގިވަޑައި ނުގަންނަވާ ކަމަށެވެ. އެކަންކަން އެނގިވަޑައިގަންނަވާނަމަ ވަގުތުން އެކަންކަމަށް ގޮތެއް ނިންމަވާނެ ކަމަށެވެ.
"އަޅުގަނޑު ގަބޫލު ކުރަނީ ހަގީގަތުގައި ތަޢުލީމީ ނިޒާމުގައި މިހިރަ ކަންކަން ރައީސް ޔާމީނަށް އަދި އެންމެ ރަނގަޅަށް އެނގިވަޑައެއް ނުގަންނަވާ. މިސާލަކަށް އަޅުގަނޑުމެން މިހިސާބަށް ދިޔުމުގެ މައިގަނޑު އެއްސަބަބަކީ އެޑިޔުކޭޝަން މިނިސްޓަރ މަޝްވަރާގެ ފުރުސަތު ނުދެއްވުން. 6 ސިޓީ ލައިގެން އެއްވެސް ސިޓީއަކަށް ޖަވާބު ނުދެއްވާ. ޖަވާބު ނުދެއްވިތާ ބައްދަލުވެސް ނުކުރައްވާ. ރައީސް ޔާމީނަށް އެކަން އެނގި ވަޑައެއް ނުގަންނަވާ. އެކަން އެނގިވަޑައިގަންނަވާނަމަ އެމަނިކުފާނު ޑިޒިޝަން މޭކް ކުރައްވާނެ. އަޅުގަނޑަށް އެނގިފައިވާ ގޮތުގައި ރައީސްގެ އިސްނެންގެވުމަކަށް މިކަން މިހާރު ކުރިއަށް މިދަނީ،" އާތިފް ވިދާޅުވިއެވެ.
އެޑިޔުކޭޝަން މިނިސްޓްރީން މިހާރުވަނީ ޓީއޭއެމް އާއެކު މަޝްވަރާ ކުރަން ފަށައިފައެވެ. އިއްޔެ ބޭއްވި މަޝްވަރާތައް ދިޔައީ ވަރަށް އެކުވެރި ކަމާއެކުގައި ކަމަށް އާތިފް ވިދާޅުވިއެވެ. ނަމަވެސް އަދި ދެކެވިފައިވަނީ ވާހަކަ ކަމަށްވެސް ވިދާޅުވިއެވެ. ނަމަވެސް މިއަދު ޓައިމްލައިނެއް ހެދޭނެ ކަމަށް އުންމީދު ކުރައްވާ ކަމަށްވެސް އޭނާ ވިދާޅުވިއެވެ.
އިއްޔެގެ މަޝްވަރާއަކީ ރައީސް ޔާމީންގެ އިސްނެންގެވުމުގެ މަތިން ބޭއްވި ބައްދަލުވުމެއް ކަމަށް އެނގިވަޑައިގެންފައިވާ ކަމަށް އާތިފް ވިދާޅުވިއެވެ. ޓީއޭއެމް އިން އެޑިޔުކޭޝަން މިނިސްޓްރީގެ އިސްބޭފުޅުންނާއެކު މަޝްވަރާ ކުރައްވަން ކުރިން މަސައްކަތް ކުރިކަން ރައީސް ޔާމީނަށް އޭރުވެސް އެނގިވަޑައިގެންނެވިނަމަ އެމަނިކުފާނު އެކަމަށް އެއްބާރުލެެއްވުން ދެއްވާނެ ކަމަށް އާތިފް ވިދާޅުވިއެވެ.
"އަޅުގަނޑުމެންގެ ކަންބޮޑުވުންތައް އެބަހުރި. އެކަންކަން އެޑިޔުކޭޝަނުން ރައީސަށް ދެންނެވިނަމަ އެމަނިކުފާނު ވަަގުތުން އެކަންކަމަށް ފިޔަވަޅު އެޅުއްވީސް. އަޅުގަނޑު އުންމީދު ކުރަނީ ރައީސް ޔާމީން ޓީޗަރުން މަގުމަތިކޮށް ނުލައްވާނެ ކަމަށް،" އާތިފް ވިދާޅުވިއެވެ.
އޭނާ ވިދާޅުވީ ޓީޗަރުންގެ ކަންބޮޑުވުންތަކަކީ އެއްދުވަހުން ދެދުވަހުން ހައްލުވާނެ ކަންކަން ނޫންކަން ގަބޫލު ކުރައްވާ ކަމަށެވެ. އެހެންނަމަވެސް އެކަންކަން ހައްލު ކޮށްދެއްވުމަށް ޓައިމްލައިނެއް ހެދުން ވަރަށް މުހިންމު ކަމަށް ވިދާޅުވިއެވެ. އެކަން އެގޮތަށް ނުކުރެވޭ ކަމަށްވާނަމަ އަންގާރަ ދުވަހު ސީދާ ހަރަކާތަށް ނިކުންނާނެ ކަމަށް ވެސް ވިދާޅުވިއެވެ. ނަމަވެސް އެކަން ކުރާނީ އެންމެ ފަހުގެ ކަމެއްގެ ގޮތުގައި ކަމަށްވެސް އާތިފް ވިދާޅުވިއެވެ.
ކިޔުންތެރިންގެ ހިޔާލު