އެމްޑީޕީ އޮތީ ރައްޔިތުންގެ ސާފް އަޣުލަބިއްޔަތާއެކު: ރައީސް ނަޝީދު

އެމްޑީޕީ މިހާރުވެސް އޮތީ ރައްޔިތުންގެ ސާފު އަޣުލަބިއްޔަތާ އެކުގައި ކަމަށް އެޕާޓީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އައްޑޫ ސިޓީ ކައުންސިލުން ހުސްވެފައިވާ ފޭދޫ ދާއިރާގެ ގޮނޑި އެމްޑީޕީ ކާމިޔާބު ކުރުމާ ގުޅިގެން ކުރައްވާފައިވާ ޓްވީޓެއްގައެވެ. "މިއަދުގެ ބައިއިލެކްޝަނުން މި ފެނުނީ އެމްޑީޕީ މިއަދުވެސް މިތިބީ ރައްޔިތުންގެ ސާފް އަޣުލަބިއްޔަތުގެ ތާއީދާ އެކުކަން،" ޓްވީޓުގައި ވިދާޅުވެފައިވެއެވެ.

ރައީސް ނަޝީދުވަނީ އެމްޑީޕީގެ ފަރާތުން އެގޮނޑި ކާމިޔާބުކުރެއްވި އަލީ ފަހުމީ އަޙުމަދަށް މަރުހަބާ ވިދާޅުވެފައެވެ.

މިއަދު ބޭއްވި ބައި އިލެކްޝަން އެމްޑީޕީގެ ކެންޑިޑޭޓް ޢަލީ ފަހުމީ އަހުމަދު ކާމިޔާބު ކުރެއްވީ 1068 ވޯޓު ހޯދައިގެންނެވެ. އޭނާއާ ވާދަ ކުރެއްވި ޕީޕީއެމްގެ ކެންޑިޑޭޓް އީނާ އަށް ލިބިވަޑައިގެންނެވީ 869 ވޯޓެވެ. ނަމަވެސް މިނަތީޖާއަކީ ވަގުތީ ނަތީޖާއެވެ. ފޭދޫ ދާއިރާގެ ބައި އިލެކްޝަންގައި 3،782 މީހުންނަށް ވޯޓު ލިބުމުގެ ހައްގު ލިބިފައިވެއެވެ.

އައްޑޫ ސިޓީ ކައުންސިލުން ހުސްވެފައިވާ ފޭދޫ ދާއިރާގެ ބައި އިލެކްޝަނުގެ އިތުރަށް ނ. ވެލިދޫ ކައުންސިލްގެ ބައި އިލެކްޝަންވެސް މިއަދުވަނީ ބާއްވައިފައެވެ. އެ ގޮނޑި ކާމިޔާބުކުރެއްވީ ސަރުކާރު ކޯލިޝަންގައި ހިމެނޭ އެމްޑީއޭގެ ކެންޑިޑޭޓް ޢަލީ މުޖުތަބާ ވެ.

ވަގުތީ ނަތީޖާ ދައްކާ ގޮތުން އޭނާއަށް ލިބިވަޑައިގެންފައިވަނީ 648 ވޯޓެވެ. އޭނާއާ ވާދަކުރެއްވި އެމްޑީޕީގެ ކެންޑިޑޭޓް ޢަބްދުﷲ އަޙުމަދު ޝަފީގަށް ލިބިވަޑައިގެންފައިވަނީ 524 ވޯޓެވެ.

ވެލިދުއަކީ އެމްޑީޕީގެ މެޖޯރިޓީ އޮންނަ ރަށެކެވެ. ވެލިދޫ ކައުންސިލުގައި މިހާރު ތިއްބެވީ ޕީޕީއެމްގެ ދެ މެންބަރުންނާއި، އެމްޑީޕީގެ ދެ މެންބަރުންނެވެ. އެމްޑީއޭގެ ކެންޑިޑޭޓް މިއަދު އިންތިޚާބު ވެވަޑައިގެންނެވުމުން ޖުމްލަ ފަސް މެންބަރުން އެ ކައުންސިލްގައި ތިއްބަވާނެއެވެ.

އެކައުންސިލްގެ ބައި އިލެކްޝަން ބާއްވަން ޖެހުނީ އެމްޑީޕީ އަށް ނިސްބަތްވެ ވަޑައިގެންނެވި މުޙައްމަދު އަލިފުޅު އިސްތިއުފާ ދެއްވުމުންނެވެ.