އެޑިއުކޭޝަނުން މަޝްވަރާ ނުކޮށްފިނަމަ ކިޔަވައިދިނުން ހުއްޓައިލާނަން: ޓީއޭއެމް
20 ސެޕްޓެމްބަރ 2014 7:44
ޓީޗަރުންނަށް ދިމާވެފައިވާ މައްސަލަތަކާ ގުޅޭގޮތުން މަޝްވަރާ ކުރުމަށް މިނިސްޓްރީ އޮފް އެޑިއުކޭޝަނުން ދެކޮޅުހަދާނަމަ ކިޔަވައިދުން ހުއްޓައިލުމަށްފަހު އިހުތިޖާޖަށް ނުކުންނާނެކަމުގެ އިންޒާރު ޓީޗާސް އެސޯސިއޭޝަން އޮފް މޯލްޑިވިސް (ޓީއޭއެމް) އިން ދީފިއެވެ.
ޓީއޭއެމުން ރޭ އަމީނިއްޔާ ސްކޫލުގައި ބޭއްވި ބައްދަލުވުމެއްގައި ވާހަކަ ދައްކަވަމުން އެ އެސޯސިއޭޝަނުގެ ރައީސް އާތިފް އަބްދުލް ހަކީމް ވިދާޅުވީ މާދަމާ އަނެއްކާވެސް ސްކޫލުތަކުގެ މުވައްޒަފުން ކަޅުހެދުމުގައި ސްކޫލަށް ނުކުތުމަށް ނިންމާފައިވާކަމަށެވެ. އަދި އެމީހުންގެ މައްސަލަތަކާ މެދު އެޑިއުކޭޝަނުން މަޝްވަރާ ކުރުމުގެ ފުރުސަތު އަންނަ ހޯމަ ދުވަހު ހުޅުވައިލާނެކަމަށް ވެސް އޭނާ ވިދާޅުވިއެވެ. މަޝްވަރާ ކުރުމަށް އެޑިއުކޭޝަނުން މަސައްކަތްނުކޮށްފިނަމަ، އަންގާރަ ދުވަހުން ފަށާއިގެން މުއްދަތެއް ނެތް ގޮތެއްގައި ކިޔަވައިދިނުން ހުއްޓައިލާނެކަމުގެ އިންޒާރު އޭނާ ދެއްވިއެވެ.
ޓީއޭއެމްއިން ބުނީ އެއެސޯސިއޭޝަނުން އިންތިޒާމުކޮށްގެން ހަޅުތާލުކުރަން ނިންމީ، ޓީޗަރުންނަށް ލިބެމުންދާ އިޖުތިމާޢީ އަދި އިޤްތިޞާދީ ޙައްޤުތައް ހޯދައި ހިމާޔަތް ކުރުމަކީ ކޮންމެހެން ކުރަންޖެހިއްޖެ ކަމަކަށް ވާތީ ކަމަށެވެ.
އިހުތިޖާޖު ކުރުމަށްޓަކައި ހަޅުތާލު ކުރުމުގެ ގޮތުން މަސައްކަތް ހުއްޓާލައިގެން ތިބުމުގެ ހައްޤު ދިވެހިރާއްޖޭގައި ވަޒީފާ އަދާކުރާ މީހުންނާއި އެނޫންވެސް މަސައްކަތްތެރިންނަށް ލިބިގެންވާކަމަށް ޤާނޫނު އަސާސީގެ 2 ވަނަ ބާބުގެ 31 މާއްދާގައި ބަޔާންކޮށްފައިވެއެވެ.
ކިޔުންތެރިންގެ ހިޔާލު